Meinisin Ua Tongeni Fangeno

Ua osukosuk ren ifa usun upwe moni ekkewe mettoch ua mochen fori non ewe fansoun pwichikar klas, sukkun, fiti urumot, me pwan ekkoch. Ua ekiekin ai upwene kechiw. Mwirin ua chechemeni meinisin ekkewe mettoch ua kaeo usun ai upwe epinukunuku me nuku non ewe Samon. Ua finata ne wanong ewe osukosuk non poun ewe Samon me epinukunuku pwe ika mi nom fan mochenin Netipan, Epwe awora eu an.

Ese tam ewe fansoun mwirin, inei we a kuna echo taropwen moni seni ai angang use mo siwini non ewe bank, me nesoren ena ran ua angei ekkis moni seni postal ren ai fiti eu kitir. Iei eu kapasen pwäratä ngeniei pwe Kot mi manau, pwe A tongeiei me tumunuei me epwe awora met mi namot.

Ua wesewesen uren kinisou me tong ngeni Semei won Nang me ai Chon Amanau. Ua mefi ita pwe upwe ureno! Ua mochen pwäratä ukukun ai kinisou, ne mwareiti Kot non napanapoch, me aporausa ena memmef. Ekkoch mi fori ei me ren ar makkei echo kon, echo kon fel, are chunga echo nios, nge ua mefi pwe ese naf ekkena mettoch. Ua weweiti pwe ewe chok mettoch ua tongeni fangeno pwe epwe nafoch ne mwareiti ina pwisin manauei—pwe upwe “eu nenien appiru ngeni ekkewe chon nuku” (1 Timothy 4:12), ne fangeno manauei ngeni Kraist. Ina chok met A tingorei, me ina chok met ua tongeni fangeno.