Pwii, Ua Pwoneni

Ruemon pwii mi kukun ierir mi uta won eu kukun chukuchukuta mi asan seni eu watten konikmi arau me mi fakkun ningoch. Ikkei eu nenien tuken mi fakkun itefouno me ekkewe pwipwi mi poporaus fan chommong usun ar repwe mweteno— eu mettoch ra kuna ekkoch aramas mi föri.

Ina mo pwe ir me ruemon ra mochen mweteno, ese wor emon me neir mi mochen feino akkomw. Ewe chukuchukuta ese fakkun tekia, nge me ren ekkewe ruemon at, a ita usun pwe a atekiata nupwen ra arap ngeni panan— me a mwittir kisikisino ar pwara.

Iwe, emon pwii a ipwetiw won panan ewe chuk me a poputa ne mweteno. Non ena chok fansoun pwiin we a kapas, “Meni sipwe witiwit tori non nan ier.”

Ewe aewin pwii a fen mwokutokut, nge, ese tongeni kouno. “Pwii,” a ponueni “Ua pwoneni!”

A turuno non ewe konik me a muttir pwar sefan me a pupuchor non an pwapwa. Ewe oruemon pwii a muttir tapweno mwirin. Mwirin, ir me ruemon ra takir usun kapasen atewe me mwen a mweteno non ewe konik: “Pwi, ua pwoneni.”

Pwon mi usun chok turunong non ewe konik. Iwe ka pwon are kese pwon. Ka feinfeino mwom are ka chok nonnom. Ese wor eu neni mi nom nukunap. Kich meinisin mi kuna och fansoun nupwen sipwe finata eu mettoch minne epwe ekkesiwini manauach feinfeino. Pwe kich chon ewe Mwichefen, mi namot pwe sipwe pwisin eisinikich, “Upwe turunong are upwe chok nonnom won panan? Upwe mweteno are upwe chok cheki patapatan ewe konik ren autun pechei kewe?”

Ekkoch tipis mi fis pokiten sia föfför mwan; ekkoch tipis mi fis pokiten sise föri och mettoch. Ekkis chok pwon ngeni ewe kapas allim mi tongeni emwen ngeni osukosuk, netipechou, me mengiringir. Ei esap tori kich pokiten kich chon aramasen pwon. Sia föri pwon mi pin ren ewe Samon nupwen sia paptais me nupwen sia tonong non imwen ewe Samon. Ekkewe mwan mi föri pwon mi pin ren ewe Samon nupwen ra efeioch ngeni ewe pristut. Ese wor och mettoch mi auchea nap seni ach anneasochisi eu pwon sia föri ren ewe Samon. Sipwe chechemeni kapasen Rachel me Leah ngeni Jacob non ewe Testamen Nom. Mi mecheres me fatafat me a pwäratä ar pwon: “Ami mi sinei pwe ua fakkun achocho ne angang ngeni sememi we” (Genesis 31:16).

Ekkewe ir mi chok ekkis pwon repwe chok ekkis angei ewe feiochun kapasen pwäratä pwapwa, me kinamwe. Ekkewe asamachon nang mi chok ekkis suk ngenir. Epwe fen umwes ne ekieki, “Upwe chok pwon esop iei, nge nupwen Kraist a pwa non ewe Oruan Niwinsefanito, upwe pwon unus”?

Anneasochis ngeni ach kewe pwon mi pin ren ewe Samon mi eu uwan ach siwinin manauach. Pwon ngeni ewe Chon Amanau me An we Mwichefen mi achuono pwisin kich me a apochokuna ngunuch pwe nupwen sia churi Kraist, Epwe turufi kich me apasa, “Fakkun murinno, en emon chon angang mi murinno o nikitu” (Matthew 25:21).

Mi wor sokkofesenin mochen me föfför. Ekkewe ir mi chok mochen pwon repwe kuna kapasen asusu iteitan. Ekkewe ir mi wesewesen pwon mi nenegeni ar kewe osukosuk mi kunu ngeni me apasata, “Ewer, ena epwe eu popun mi och ai upwe amangeno, nge ua föri pwon mi pin, me upwe apwonueta met ua pwon ne fori.” Ra attonaoch ekkewe pukfel me ra wesewesen kutta emwen seni Semach won Nang. Ra etiwa me apwonueta wiser non ewe Mwichefen. Ra fiti ar kewe mwich. Ra apwonueta ar sensen famini me an fefin chon amwa.

Eu tutunapen Germany a apasa, “Pwon mi usun chok ewe maram mi unus. Ika sise anneasochis iei, ra kisikisino seni ran me ran.” Kich chon Ewe Mwichefenin Jises Kraist ren Aramas mi Pin non Fansoun Soponon, sia pwon ne fetan won ewe anen ekkewe chok kuno. Sia pwon ne tapweno mwirin an ewe Chon Amanau nenien appiru. Kopwe ekieki ifa usun ewe fonufan epwe efeioch me ekkesiwinoch nupwen meinisin chon an ewe Samon we Mwichefen mi manau ngeni unusen ar tufich—ekkesiwin non annonnonun ngunur me pwon ngeni ar kouta ewe muun Kot.

Non eu napanap, emon me emon kich mi uta won eu nenien finata mi nom asan seni ewe konik. Iwe ai iotek pwe epwe wor ach nuku, pwe sipwe mwokutokut mwach, nenengeni ach nuokus me tipitipingaw ren pwara, me sipwe pwisin kapas ngenikich, “Ua pwoneni!”