Riei Ohl, I Inoukihier en Ngoangki

Mwahnakapw perien riemen kesihnen pohnangin paip lap ehu kilikilengdilahng pohn pihl mwakelekel poh mei kan en leh ehu. Met iei ehu wasa popular en lusdilahng nan pihlo, oh pirieno kin kalapw koasoaia duwen ara pahn lus ehu rahn—mehkot me re kin kilang mehteikan wia.

Mendahte ara koaros men lus, sohte emen rehra men tep. Uwen ilehn paipo sohte nohn laud, ahpw ong mwahnakapw oko, e mwomwen me e kin laudila ni ara pahn kin tepida pengiei—oh ara soupeikasal kin mwadangete tikitikila.

Kedekedeo, emen pirieno kihla apali neh ni keilen paipo oh mwokidwei mwowe ni ngoang. Ni ansouohte rie pwutako mwenginingin, “Mwein kita konehng awih lao pahr pahn wade.”

Ahpw, ahn keieun pwutako eh mwekmwekidehr elehieng eh kohkohlahte mwowe. “Riei,” e sapengki, “I inoukihier en ngoangki!”

E luhsdihla nan pihlo oh mwadang pwarada ni eh weriki eh pweida. Keriemen en pirieno ansouohte idawehn. Mwuri, ira koaros kouruhrki dahme tepin pwutako ndahla mwohnte eh lusdihla nan pihlo: Riei, I inoukihier en ngoangki.”

Inouki en ngoangki ekis duwehte luslong nan pihl. Soangete riau, ke inoukihier en ngoangki de soh. Ehu rehn ke mwokmwokidwei mwowe de ke keskesihnente. Sohte nanpwunge ehu. Kitail koaros kin sohpai ansou kan en wiahda pilipil me kin wekidala pweidahn atail mour mwurin mwo. Ni atail wia towe kan en Mwomwohdiso, kitail uhdahn anahne pein idek rehtail, “I pahn luslong de I pahn kesihnente ni keile? I pahn sokala mwowe de doadoahngki sendin nehi ka oh songosongete uwen karakar en pihlo?”

Ekei dihp akan kin wiawi pwehki kitail kin wiahda sapwung; dihp teikan kin wiawi pwehki kitail sohte wia mehkot. En ahniki lamalam en inoukihier en ekiste ngoangki rongamwahuo kak en elehieng pwunod, nsensuwed, oh pepehm en dipada. Met sohte konehng dokeikitail pwehki kitail iei aramas en inou. Kitail kak wiahda inou kan rehn Kauno ni ansou me kitail pepdaisla oh ni ansou me kitail kin pidolong nan tehnpas en Kauno. Aramas kin wiahda inou kan rehn Kauno ni ansou me irail kin kasarawihiong priesthood. Sohte mehkot kak kesempwalsang kolokol inou ehu me kitail wiahda rehn Kauno. Kitail tamataman pasapeng en Resel oh Lia ong Seikop nan Kadehde Mering. E mengei oh sansal oh kasale arail ngoang: “Eri kapwaiada mehkoaros me Koht mahsanihong uhk ke en wia” (Senesis 31:16).

Irail akan me kin inoukihier en ekiste ngoangki kakete kasik en mwomwen ekis te alehdi kapai kan en kadehde, peren, oh popohl. Wenihmw tok kan en nanleng mwein pahn ekiste langohng irail. E sou pahn mwomwen sapwung en medewe, “I pahn kihieng ahi ngoang ni percent 50 met, ahpw ni ansou me Krais pahn pwarodo ni Ketido Keriauo, I pahn kihieng ahi ngoang ni percent 100”?

Inouki en ngoangki atail inou kan rehn Kauno iei wahn atail weliakapw. Inoukihi en ngoangki atail Sounkomouro oh Sapwellime Mwomwohdiso kin kakairada mwohmw oh kakehlailih ngehn pwe ni ansou me kitail pahn tuhweng Krais, E pahn pwoaleikitaildi oh mahsanih, “Keieu mwahu, papah lelepek oh mehlel men kowe” (Madiu 25:21).

Mie wekpeseng nanpwungen pilahne wia oh wia. Irail akan me kin ihte pilahne en inouki en ngoangki kakete diar kahrepe kan en dehr nan wet kan koaros. Irail akan me kin uhdahn kin inouki en ngoangki kin sohpai arail kahpwal kan ni inen oh kin ndahieng pein irail, “Ehng, men pahn wia kahrepe mwahu en kapwandala, ahpw I wiahda inou, oh eri I pahn wia dahme I inoukihier en ngoangki wia.” Irail kin rapahki pwuhk sarawi kan oh rapahki ni ngoang kaweid en Samarail Nanleng. Irail kin alehda oh kalaude arail pwukoa malipilip kan en Mwomwohdiso. Irail kin towehda arail mihting kan. Irail kin kapwaiada arail padahk kan en pas oh padahk en ni ihmw.

Lepin padahk audapan ehu sang mehn Sehmen nda, “Inou kan duwehte maram mat. Ma irail sohte pahn ansouohte kapwaida, irail pahn tikitikila nan ehuehu rahn akan me doula.” Ni duwen towe kan en Mwomwohdiso en Sises Krais en Souleng en Imwin Rahn Akan, kitail inoukihier en ngoangki alu nan ahl en tohnpadahk. Kitail inoukihier en ngoangki idawehn karasaras en atail Sounkomouro. Medewe duwen sampah eh pahn kapaida oh wekila ong me mwahu ni ansou me towe kan koaros en sapwellimen Kauno Mwomwohdiso kapwaiada arail mour en pahrekohng me re kak kapwaiada—weliakapwala nan idin loale en ngenirail kan oh inouki en ngoangki kauwada wehin Koht.

Ni wiepe ieu, emenemen kitail kin kesihnen ni wasahn wiahda pilipil kilikilenglahng pohn pihlo. E wia ahi kapakap me kitail pahn ahniki pwoson, sokala mwowe, sohpai dahme kitail masak oh atail peikasal kan, soupeikasal, oh ndahieng pein kitail, “I inoukihier en ngoangki!”