Iren Mahsen en Padahk en Pas, Sulai 2011

Kohdo ni Tehnpas Sarawi oh Alehdi Ahmw Kapai Kan

Onopiki iren mahsen wet, oh ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Pwoson • Peneinei • Sawas

Riei lih akan, kitail inenen kapaida. Sounkomouro uh ni moangen Mwomwohdiso wet. Kitail kin kaweid sang soukohp ieias kan. Kitail nainiki pwuhk sarawi kan. Oh kitail ahniki tohto tehnpas sarawi kan nan sampah wasa me kitail kak alehdi tiahk sarawi kan me anahn pwehn seweseikitail pwuralahng Samatail Nanleng.

Kitail kin kohla mahs nan tehnpas sarawi ong pein kitail. “Kahrepe keieu en tehnpas sarawi,” Elder Robert D. Hales en Pwihn en Wahnpoaron Ehk-riemeno kawehwe, “iei en kihda tiahk sarawi kan me anahn ong lapalapala nan wehin celestial. Tiahk sarawi kan en tehnpas sarawi kin kaweid kitail ong atail Sounkomouro oh kin kihieng kitail kapai kan me kin kohdohng kitail sang ni Tomw en Sises Krais. Tehnpas sarawi kan iei sukuhl me keieu laud en kasukuhl me mie ong aramas, kihkihieng kitail eripit me pid Kapikipik en sampah. Kaweid kan me pid endaumen kin kihda kaweid kan me pid duwen atail konehng katanga atail mour kan nan mour wet. … Tiahk sarawi kan audaudki kaweid kei me pid duwen atail konehng mour oh inou kan me kitail kin wiahda pwehn mour ni pwung sang idawehn atail Sounkomouro.”¹

Ahpw atail papah nan tehnpas sarawi sohte kin id wasao. President Boyd K. Packer, President en Pwihn en Wahnpoaron Ehk-riemeno, padahngki: “Wia weliepehmen ong emen aramas me samwalahr palio kahdengo, kumwail pahn kilang mwohmwail tehksapahlpen inou kan me kumwail wiadahr. Kumwail pahn katengehdieng nan moangamwail kan kapai kan me keieun lap me doke tehnpas en Kauno. … Nan inou kan oh tiahk sarawi kan kin me kapai kan mie me kumwail kak alehdi nan tehnpas sarawi.”²

Kohdo ni tehnpas sarawi oh eri pwurehng kohdo. Wiahda oh kolokol inou kan en tehnpas sarawi kin kolokol kitail pohn ahlo ong me keieu laud nan kapai kan—mour soutuk.

Barbara Thompson, sounsawas keriau nan presidensi lap en Pwihn en Sawas en Lih.

Sang Pwuhk Sarawi Kan

Aiseia 2:3; 1 Korint11:11; Kaudiahl 7:13–15; Doctrine and Covenants 109

Sang Atail Poadoapoad

Soukohp Joseph kin kalapw koasoaieng lih akan en Pwihn en Sawas en Lih nan arail mihting kan. Ni Tehnpas Sarawi en Nauvoo eh wie kokouda, Soukohpo kaweidki lih akan nan padahk kan, kaukaunop irail en alehdi ahpwete laudlahn eripit sang nan tiahk sarawi kan en tehnpas sarawi. Nan 1842 e ndahieng Mercy Fielding Thompson me endaumen “pahn weiukodohsang nan rotorot ong nan marain lingan.”³

Kerenieng Souleng en Imwin Rahn Akan 6,000 alehdi tiahk sarawi kan en tehnpas sarawi mwohn arail kohkohsang Nauvoo. President Brigham Young (1801–77) koasoaia, “Iei duwen eh sansalda pwunod en souleng kan en alehdi tiahk sarawi kan [en tehnpas sarawi], oh uwen pwunod me se ahniki en apwalihirailla, me I koasoandihiengehr pein ngehi ni unsek ong doadoahk en Kauno nan Tehnpaso nihpwong oh nihrahn, sohte kin meir laudsang awa pahieu, pali laud, ehuehu rahn, oh kin kohla nihmwo pak ehu nan wihk ehu.”⁴ Kehlail oh manaman en inou kan en tehnpas sarawi kin kakehlailih Souleng kan ni arail kohkohsang arail kahnihmwo oh tehnpas sarawio ong seiloak ehu ong wasa me re sehse.

© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen Visiting Teaching Message, July 2011. Pohnpeian. 09767 885

Dahme I Kak Wia?

Irair dah me I pahn ehukihda me pahn kakehlailih irail akan me I kin pwarek nan arail ngoang en “kohdo ni tehnpas sarawio”?
Ia duwen ahi kak alehdi kapai kan en tehnpas sarawio?