Walageg, Gub Yul’yul’

Sak’iy l’agruw i walag ni pagal nga dakean taban ba clif ni yow be guy ba lake ni rib falel’ ram’en e raen riy nib ra’en i mak’ef. Giney e bang ni yigo’ yi manang, ma fare gal walag e yow ma yog ni ngar og—gow ni boed ni yow ma guy boech e gidii’ nima rrin’.

Mus ni yow l’agruw ni ba’adag ni nge og, ma dariy bagyow ni ba’adag ni nge yan ko somm’on. Tolngin fare clif e ri dani tolang, machane rogon ko fare gal pagal nib bitir, ma boed ni rib tolang ni gubin ngiyal’ ni yow ra ga’ar boch’uw nga m’on—ma athamgil rorow e ribe mil nga biyang.

Tomuriy, me tay bagyow ay nga taban fare clif me yan nga m’on nib tumgin. Ko ngiyal nem me kathkath walagen ngak, “Sana ngad soen gow nge taw ko bin migid e summer.”

Machane, gelngin e bin somm’on fare gal walag, kan mu’ i tel nga m’on. “Walageg,” be fulweg, “Gub yul’yul’!”

Ke aw nga miran me yib papay ngalang nibe tolul nike falfalen’. Me og e bin migid fare gal walag. Tomuren, miyow be minmin ko bin tomur e thin ni yog e bin somm’on e pagal nike og nga miraen: “Walageg, gub yul’yul’.”

N’en ni ngan rrin’, fa yul’yul’, e boed ni ngan og nga miraen. Gur gab yul’yul’ fa danga’. Gabe yan nga m’on fa gabe paer u loem. Dariy e haf riy. Gadad gubin ma yima mada’ nag boch ban’en ni ma thilyeg e yafas rodad. Gadad ni gothon fare Galasia, e ngarin fith dad, “Ragu og fa kemus ni ngug sak’iy u loeg? Ragu waen nga m’on fa kemus ni ngug guy ko borogon fare raen nga buguli eg?”

Boech e denen e dariy ya darni rrin’ed e kireb; boech e denen e dariy ya dariy ban’en ni gadad be rrin’. Paer ni kemus ni ngam paer u loem ko fare gospel e ra fekey ko ngochngochaen’, kirbaen’, nge kalngan’. Biney e dabi uneg gadad ya gadad e gidii’ nib m’ag. Gadad ma fal’eg e m’ag ngak Somoel napan nikad tawfe gad nge napan ni gadad ra yean nga lane na’un ku Somoel. Pumo’on e ma fal’eg e m’ag ngak Somoel napan ni kar yibliy gad ko fare priesthood. Dariy ban’en ni rib ga’ fan ko bin ni ngan cha’riy e n’en ni ngan rrin ni gadad ma fal’eg ngak Someol. Ngad tafney gad ko fulweg rok Rachel nge Leah ngak Jacob u lan fare Bin Kakrom e M’ag. Ba moem ma ba pufpuf ma yaed ba adag e n’en ni ngar rrin’ed: “Ngan rrin’ e tin ni keyog Got ngom, mu rrin’ ” (Genesis 31:16).

Picha’an ni kemus ni yad ba yul’yul’ e ra i leam nag ni kemus ni ngeyog e pi tawa’ath ko mich, falfalen’, nge gapas ngorad. Kemus ni bathake ra mab mban e tharmiy ngorad. Gathi ra ga’ar e picha’an nib kireb, “Ragu yul’yul’ ngog ni 50 pasent e chiney, machane napan ni ra m’ug Kristus ko fare Yan L’agruw Yay e Wub, mug yul’yul’ nigeg ni 100 pasent”?

Yul’yul’ ko pi m’ag rodad ngak Somoel e wam’ngin e n’en nibe thil u thilin dad. Yul’yul’ ngak Somoel nge Galasia Rok e ma ngongliy dad me gel nag e kan thothup rodad ya ngeyog ni ngad mada’ niged Kristus, ma ra falfalen’ ngodad me ga’ar, “Rib manigil, ye gur reb e tapigpig ni gab fel’ ma gab yulyul’” (Matthew 25:21).

Bay e n’en nib thil u thilin e tanam nge mithmith. Picha’an ni kemus nima tanam nag ni nge yul’yul’ e ra pir’eg boech excuse. Picha’an ni ri kar yul’yul’ gad ko n’en ni ngar rrin’ed e yad ra ga’ar ngorad, “Arogon, binir e ban’en e fal’ ni ngan pag, machane ku m’ag u wun’ug, ere ragu rrin’ e n’en ni gub yul’yul’ ngay. Kar guyed fapi chep nib thothup miyad ning e ayuw ngak e Chitamangraed u Tharmiy. Yad ba’ adag ma kar daged e muruwel rorad u Galasia. Yad ma un ko mo’olung rorad. Yad ma yaen ni nang salpey min fil ban’en fa tabinaew rorad.

Ke ga’ar e yu German, “Pi micheg ni ngan rrin’ e boed e ful mun. Fa’anra tay ta’abiyay, ma gubin e raan ma ra ma’y ya’an nga biyang.” Gadad ni gothon Fare Galasia ku Yesus Kristus ni Fan ko Gidii’en Got ko Tin Tomur e Rran, e ngad yul’yul’ gad ni ngad darod ko fare kanawo’en e gachalpen. Kad yul’yul’ gad ni ngad laked e kanawo’ ko Tathapeg rodad. Tafney nag ya’an rogon ni ra thil e fayleng ni nge mangil napan ni gubin gothon e Galasia ku Somoel e yad ra paer u fithik—e rogon ni kar thil gad mar yul’yul’ gad ni ngar toyed e gil’ilungun Got.

Boech e kanawo’, e ra bagdad ma yugma sak’iy ko bang nib tolang ni yibe guy e raen. Ba meybil rog ni ngeyog e mich ngodad, ngad yan nga m’on, dakun rus man gel, man ga’ar ngodad, “Gub yul’yul’!”