Te Mwakuri Bon te Reirei ae Akea Tokina

Tamara are i Karawa ao Iesu Kristo a mwakuri ni karaoa karawa ao aonaaba. A karika taai, namwakaina, ao itoi. A boboti taari ao a karika te aba ae mwau bwa e na riki ao a na riki iai aroka. Imwiina ao a karikii bwaai ni kabane aika a maiu i taari ao iaon te aba. (Taraa Karikan Bwaai 1; Moses 2.) Aia katooto a kaotia nakoira bwa te mwakuri e rangi ni kakaawaki i Karawa ao iaon te aba. (Taraa naba Ioane 5:17; 9:4.)

Ngke e tia te Atua ni karika te mwane ao te aine n ai Arona, E katikuia n te Onaroka are I Eten. (Taraa Karikan Bwaai 1:26–27; 2:8). Imwiina, ngke a kakioaki nako man te onaroka, te Uea e taku nakon Atam, “Ko na amwarake n te amwarake man maononi moam” (Karikan B’ai 3:19). Man te tai anne, Atam ao Ewa a mwakuri ni karekea oin kainnanoia ao kainnanoia natiia. (Taraa Moses 5:1).

Man ana tai Atam ao Ewa, te mwakuri e a tia n riki bwa aron te maiu ibukira ni kabane iaon te aba. Ti mwakuri ni katauraoi ibukin rabwatara, maiun tamneira, ao kukurein nanora ao ara utu. Kaaro a mwakuri korakora ni katei mweenga ike a reirei iai aron te mwakuri. A anganiia natiia katabeaia are e na bootau ma aia konabwai ao ni kamoamoai aroia n tokanikai ni buokiia ni karekean namakin ni bwaai aika rinanona ni karaoan te mwakuri. N tokina, a kona ni karikirakea te anua ni mwakuri ae korakora, te katei ae tamaroa, ao konabwai aika aki kanganga.

Ti riai ni ukoukora kakaean te kabaeranti ae tau imarenan te mwakuri ao te motirawa. Onoua te bong n te wiiki, kakabwaia a kona n roko iroura ngkai ti uringa n irengana te mwakuri ao waaki ni kakukurei are a na kamarurungiira. N te Tabati, te Uea e berita nakoira kakabwaia aika onoti ngkana ti ongotaeka nakon ana Tua ni motirawa man ara mwakuri ao ni kawakina mimitongin te bong ae te Tabati (Taraa Otinako 20:9–11; D&C 59:9–19).

Te mwakuri bon mwakoron ana babaire ibukira Tamara are i Karawa ao iaon te aba. Ngkana ti karaoa ae raoiroi, ti na manga oki ni maeka ma Ngaia. Ikekei ti na reitinako ni karekei tibwangara ni mwakuri ao ni buoka katean uean te Atua (Taraa Moses 1:39).

Ti katabeaki bwa ti na tararuaira ao ara utu.

1. Kaaro iai tibwangaia ae tabu n taruraia natiia (taraa D&C 83).

2. Naati ana bon kakabwaiaaki ngkana a tararuaia aia karo aika kara (Taraa 1 Timoteo 5:3–4, 8).

3. Ti riai ni buokiia membwa n ara utu aika bubura ngkana e riai.

Kakabwaia a roko iroura imwiin te mwakuri.

1. Ti kakorakorai arora ao ni karikirakei ara konabwai n te mwakuri.

2. Ti namakina te kukurei n ana babaire te Atua ibukira iaon te aba.

3. Ti kona riki n tatauraoi ao n tei iaon waera ngkai ti kawakin kanara ibukin teniua namwakaina, ran, ao bwaai tabeua aika a kakaawaki.