Te ke Lava ʻo Tuku Mai Haku Tāpuaki?

Naʻe fuʻu tō lahi e sinoú heʻeku fakaʻuli māmālie hake he foʻi māʻolungá. Ne u fakakaukau, kapau te u aʻu ki ʻolunga, te u aʻu lelei leva ki ʻapi. Ka ʻi heʻeku feinga ke aʻu ki he foʻi pikó, ne u sio ki ha kā ʻoku sīfā mo hangatonu mai kiate au. Ne u kaikaila ki muʻa ia pea toki hoko e fepakí, ʻo ngata ai ʻeku ʻiló.

Ne ʻikai ke u ʻilo pe ko e hā hono fuoloa peá u toki ʻāʻā haké. Naʻe mokosia hoku matá he sinoú he naʻe hū mai ia he sioʻata kuo mafahí. Naʻá ku feinga ke manatuʻi ha meʻa, hangē ko e feituʻu ne u huʻu ki aí kimuʻa he fakatuʻutāmakí. Ne u toko taha peá u ilifia, pea naʻá ku toʻe he naʻe mātuʻaki mamahi hoku umá mo e fatafatá. Ne u tangi ki he Tamai Hēvaní ke ʻoua muʻa ʻe fuʻu lahi hoku kafó pea ke u sai pē.

Hili ha kiʻi taimi siʻi ne u ongoʻi ha nima ʻoku ala mai kiate au. Ne u puke mai ia he vave tahá. Ne u ʻāʻā hake ʻo sio ki ha tangata kote mo tatā ʻuliʻuli ʻoku tuʻu ʻi tuʻa heʻeku kā maumaú. Naʻá ne talamai naʻe sio mai hono uaifí mei hona ʻapí ki he fepakí, peá ne haʻu ke sio pē ko e hā ha tokoni te ne faí. Naʻá ne puke hoku nimá ʻo fakahā mai te u sai pē.

Ne u feinga ke ʻeke ki he tangatá pe ʻokú ne kau ki he Siasí, ka ko e meʻa pē ne u lavá ko e fafana atu, “Te ke lava ʻo tuku mai haku tāpuaki?”

Naʻá ne talamai ʻio pea fakahū mai hono nimá he sioʻata kuo mafahí ʻo hili ki hoku ʻulú.

ʻOku ʻikai ke u manatuʻi e meʻa naʻá ne lea ʻakí. Ka naʻa ku manatuʻi ʻeku fakakaukau te u sai koeʻuhí he kuo ʻosi tāpuakiʻi au. Ne u ongoʻi nonga mo fiemālie.

ʻI he taimi ne aʻu mai ai e meʻalele ʻa e falemahakí, ne ʻikai ke u toe sio ki he tangatá. Hili ha ngaahi houa siʻi mei ai ne u mavahe mei falemahaki ʻoku fasi hoku palalulú pea lahi e mamulumulú mo e makohikohí kau hao pē mei he lavelavea lalahí.

Naʻá ku lotu he pongipongi ko iá ke hao ʻeku fonongá, pea ne u tomuʻa fakakaukau naʻe ʻikai ke tali ʻe he Tamai Hēvaní ʻeku lotú. Ka naʻá ku fakatokangaʻi hake naʻá Ne tali ʻeku lotú pea naʻe ʻikai ke Ne liʻaki au. Naʻe tali ʻeku lotú ʻo fakafou mai ʻi ha tokotaha maʻu lakanga fakataulaʻeiki naʻe fie tokoni pea nofo ofi mai pē he feituʻu ne hoko ai e fakatuʻutāmakí, ko ha fakatuʻutāmaki ne u mei aʻu ai ki ha tuʻunga kovi ange.

He ʻikai ke u lava ʻo ʻilo e mata ʻo e tangatá kapau te u fetaulaki mo ia. He ʻikai ke u manatuʻi hono leʻó kapau ʻe fakalea mai kiate au. Ka ʻoku hounga kiate au ʻa e tokotaha ko ʻení naʻe ʻikai ke ma maheni ka naʻá ne moʻui taau pea fie tokoni ke tuku mai haku tāpuaki fakataulaʻeiki he taimi ne u fie maʻu aí.