Ngaahi Fakakaukaú

Ne u tautau ʻeku kato akó he kōpaté peá u sio ki hoku ʻatá he siʻoata lahi he matapaá. Ne u tuʻu ʻo sio ki he mafuefue hoku ʻulú, sote manusinusí, mo e sitōkeni ngatōtoó. Naʻe ongo mai e lea ʻeku faiako Palaimelí: “Ko ha ʻofefine makehe koe ʻo ʻetau Tamai Hēvaní. ʻOku lahi ʻene ngaahi tāpuaki maʻau ʻi he kahaʻú.”

Naʻá ku ʻunu ki muʻa ʻo sio ki he sioʻatá, ʻo fakaʻamu naʻe lava ke u sio ki he kahaʻú. Te u fēfē nai heʻeku taʻu 12 pe 22? Te u talavou nai? Pe te u poto? Te u mali nai he temipalé? ʻE ʻi ai nai haʻaku fānau fakaʻofoʻofa? Ko ʻeku ngaahi fakaʻamú ʻeni, ka ko e ngaahi tāpuaki nai ʻeni ʻoku teuteu mai ʻe he ʻOtuá maʻakú?

Naʻe ongo mai ʻe leʻo ʻofa ʻo ʻeku faʻeé. “Ko e hā ʻokú ke sio ki aí?”

Naʻá ku sio atu he sioʻatá ki heʻeku fineʻeikí ʻoku tuʻu mai hoku tuʻá he matapaá.

Naʻá ku tali atu, “Ko au pē. Ko au pē ia ʻi he sioʻatá.”

Ne haʻu e fineʻeikí ʻo tuʻu mai ʻi hoku tuʻá. Peá ne pehē mai, “‘Ko koe ia’ ko ha taha makehe moʻoni.”

“Ko e meʻa ia naʻe talamai heʻeku faiako Palaimelí. Naʻá ne talamai ʻoku lahi e ngaahi tāpuaki ʻoku teu mai ʻe he ʻEikí maʻakú. Ka ko e hā ha meʻa ʻoku teuaki mai ki heʻeku moʻuí?”

Naʻe talamai heʻeku faʻeé, “Haʻu ki hoku lokí. ʻOku ʻi ai e meʻa ʻoku ou fie fakaʻaliʻali atu kiate koe.”

Naʻe fakaava hake ʻe he fineʻeikí ʻi hono lokí ha kiʻi puha siʻisiʻi pea toʻo hake ha kiʻi sioʻata kau siliva.

Naʻá ku pehē ange, “Fakaʻofoʻofa moʻoni,” mo ala ki he mataʻitohi ko e P naʻe tohiʻi he tuʻá.

Naʻe talamai heʻeku faʻeé, “Ko e kiʻi sioʻata ʻeni ʻeku kui fefiné. ʻI heʻeku fakangingila e sioʻatá, ʻoku ou feinga ke fakakaukau pe ko e hā e meʻa naʻe sio ki ai ʻeku kui fefine ko Petilisá. Mahalo pē naʻá ne sio ki ha kiʻi finemui, hangē ko koé, ʻo ne fakaʻanaua loto ai ki he kahaʻú.

“ʻOku ou fakakaukau ki he fiefia naʻá ne maʻu heʻene mamata ki hono ʻulu loloá ki muʻa peá ne papitaisó. ʻOkú ke ʻiloʻi naʻe ʻikai lava ke papitaiso ia kae ʻoua kuo toki taʻu 18?”

Ne u kalokalo ange.

“Pea hili ʻene mali mo ʻeku kui tangatá, naʻe ʻi ai ʻene pēpē fefine naʻe moʻui pē he ʻaho ʻe ua. ʻOku ou fakakaukau atu ki he fufula hono matá heʻene tangí he taimi naʻe sio ai ki he sioʻatá.

“Hili ha ngaahi taʻu lahi, pau pē naʻe fakafiefia hono ʻatá ʻi heʻene teuteu ke ʻalu ki he temipalé ke sila ai mo hono husepānití mo e fānau ʻe toko tolú.

“ʻI heʻene hoko ko ha fefine matuʻotuʻá, mahalo naʻá ne fakaʻaongaʻi e sioʻatá ke tui hono tataá pea toki ʻalu ki he ngaahi fakataha ʻa e Fineʻofá.

“Pea faifai, ʻi heʻene hoko ko ha uitou ʻulu hinaá, mahalo naʻá ne sio ki he loto-toʻá ʻi hono matá ʻi heʻene moʻui tokotaha he taʻu lahi kae kei faivelenga pē ki he ngataʻangá.”

Ne u fehuʻi ange, “Naʻe hanga nai ʻe he Tamai Hēvaní ʻo tāpuakiʻi ʻeku kui uá?”

Naʻe tali mai heʻeku faʻeé, “ʻIo, naʻá Ne tāpuakiʻi ia.”

“Naʻe fiefia nai ʻeku kui uá ʻi heʻene moʻuí?”

“ʻIo. Naʻe ʻikai hangē ia ko ʻene palaní. Ne ʻi ai e taimi naʻe fuʻu faingataʻa, ka naʻá ne falala ki he ʻOtuá, pea tokoni e ngaahi meʻa ko iá ke ne hoko ai ʻo hangē ko Iá.”

“ʻOku ou tui ʻe ʻikai fie maʻu ia ke u ʻilo ki he kahaʻú,” ko ʻeku talí ia, mo tuku fakalelei e sioʻata silivá ki hono puhá. “Te u falala pē ki he Tamai Hēvaní pea muimui kiate Ia.”

Naʻe pehē mai ʻe heʻeku faʻeé, “ʻOku ou ʻilo ʻoku ʻosi teuteu mai ʻe he ʻOtuá ha moʻui fakafiefia maʻau. Kapau te ke muimui kiate Ia, ʻe hā mai Hono ʻīmisí ʻi he fofonga ʻokú ke sio ki ai he sioʻatá. Pea ko e toki hoko moʻoni ia ʻa e misí.”