Uiuiʻi ke Tākiekina

ʻI hono ui au ko e ʻetivaisa ki he Maea Meití ʻi he houalotu ʻa e Kau Finemuí, naʻá ku veiveiua pe te u lava ʻo fua e fatongiá. Naʻá ku pehē he ʻikai saiʻia e tamaiki fefiné ʻiate au pe ako ha meʻa meiate au, tautefito ki heʻeku ʻilo ʻoku kehekehe e meʻa ʻoku nau aʻusiá mei he meʻa ne u aʻusia he taimi ne u hangē ai ko kinautolú.

Naʻe liliu e ongo ko iá ʻi ha ngaahi uike siʻi hili ia haʻaku ʻalu ki ha polokalama ʻa e Kau Finemuí naʻe fai. Naʻe fakahaaʻi ai ʻe ha faʻē ʻene houngaʻia he polokalama ʻa e Kau Finemuí koeʻuhí he naʻe fakamālohia ai hono ʻofefiné mei he ʻahiʻahí. Naʻe tokoni ʻene leá ke mahino kiate au ʻa e mahuʻinga moʻoni hoku fatongiá.

Ne u ʻiloʻi ko hoku fatongiá ʻoku ʻikai ko hono akoʻi pē ʻo e ngaahi lēsoni he Sāpaté mo tokoni ke palani e ngaahi ʻekitivitií. Ka ko ha ui ke tokoniʻi e kau finemuí ni ke teuteu ki he kahaʻú—ke ʻalu ki he temipalé, ngāue he Siasí, pea hoko ko ha ngaahi faʻē lelei. ʻOku fie maʻu ke u tokoniʻi kinautolu ke nau mateuteu ki he moʻuí.

ʻOku ʻomi e ngaahi fatongia he Siasí mei heʻetau Tamai Hēvani ʻofá. ʻOkú Ne ʻafioʻi ʻetau fie maʻú mo e fie maʻu ʻanautolu ʻoku tau ngāue ki aí. ʻI hono ʻiloʻi iá ʻe lava ke tokoniʻi ai kitautolu ke maʻu ha tui kiate Ia pea loto falala, neongo ʻoku ʻikai ke mahino kiate kitautolu hono ʻuhinga ʻoku vahe mai ai e fatongia ko iá pe taimi ʻoku ʻikai ke tau fakapapauʻi ai e meʻa te tau malava ʻo fai ki hono fakahoko ha fatongiá. ʻE lava ke tau houngaʻia he ngaahi faingamālie ke ngāue aí pea ʻoku tau feʻunga ke maʻu ha fatongia, pea ʻe lava ke tau fakaʻaongaʻi e faingamālie ko iá ke ako ki he lahi taha te tau malavá lolotonga ʻetau fakalakalaka ʻi he ongoongoleleí.