2011
Hoê Totaiete no te mau Vahine Mo‘a
Atete 2011

Parau poro‘i na te mau Tuahine Hahaere, Atete 2011

Hoê Totaiete no te mau Vahine Mo‘a

A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.

Faaroo • Utuafare • Tamahanahana

Ua haapii mai o Eliza R. Snow, te piti o te peresideni rahi o te Sotaiete Tauturu e : « Ua parau na te Aposetolo Paulo i tahito ra no te mau vahine mo‘a. E hopoi‘a na tatou tata‘itahi ia riro ei vahine mo‘a. Mai te mea e, e mau vahine mo‘a tatou, ei mau opuaraa teitei ïa ta tatou e ti‘a ai. Ia ite tatou e, ua piihia tatou no te faaoti i te mau titauraa faufaa roa. Aita roa te hoê noa‘e i ere i ta’na. Aita e tuahine i vai otare noa, e to’na vahi piriha‘o roa, tera râ te mea o ta’na e nehenehe e rave rahi no te paturaa ïa i te basileia o te Atua i te fenua nei ».1

E te mau tuahine, aita tatou i vai otare noa aita atoa to tatou vahi i piriha’o. Na roto i te fariiraa i te horo‘a no te ohiparaa i roto i te Totaiete Tauturu, e riro mai tatou ei tuhaa no te mea ta te peropheta Iosepha i parau ra, ei totaiete « tei taa ê i te mau ino atoa o te ao nei – no te ma‘iti, te viivii-ore, e te mo‘a ».2

E tauturu teie totaiete ia tatou ia haapuai i to tatou faaroo e ia tupu i te rahi i te pae varua na roto i te horo‘araa ia tatou te mau rave‘a ia arata‘i, ia tavini e ia haapii. I roto i ta tatou taviniraa e tuuhia mai te hoê faito apî i roto i to tatou oraraa. E nuu tatou i mua i te pae varua, e e tupu i te rahi to tatou iteraa i to tatou taatiraa, to tatou ihotaata, e to tatou faufaa. I reira tatou e ite ai e, te opuaraa no te faanahoraa o te evanelia, o te horo‘araa ïa ia tatou i te rave‘a ia tae’ahia ia tatou te îraa o to tatou faito.

E tauturu te Totaiete Tauturu ia tatou ia faaineine no te farii i te mau haamaitairaa o te hiero, ia haapa‘o i te mau fafauraa ta tatou i rave, e ia tomo atu i roto i te opuaraa a Ziona. E tauturu te Totaiete Tauturu ia tatou i te faarahi i to tatou faaroo e to tatou iho parau-ti‘a, ia haapuai i te mau utuafare, e ia imi e ia tauturu i te feia ati.

E mea mo‘a te ohipa a te Totaiete Tauturu, e te raveraa i te ohipa mo‘a, e faatupu te reira i te mo‘a i roto ia tatou.

Silvia H. Allred, tauturu matamua i roto i te peresideniraa rahi o te Totaiete Tauturu.

No roto mai i te mau papa‘iraa mo‘a

Exodo 19:5 ; Salamo 24:3-4 ; 1 Tesalonia 4:7 ; Tito 2:3-4 ; Te Parau Haapiiraa e Te Mau Parau Fafau 38:24 ; 46:33 ; 82:14 ; 87:8 ; Mose 7:18

No roto mai i To Tatou Aamu

A paraparau ai oia i te mau vahine no te Totaiete Tauturu no Nauvoo, ua haapapû te peropheta Iosepha i te mo‘araa, ma te faataa e, a riro ai te mau tuahine ei mau tuahine mâ e te mo‘a, e riro ratou ei faaururaa papû i ni‘a i to te ao nei. Ua faataa oia e : « Te marû, te here, te mâraa – o te reira te mau mea o te faahanahana ia outou. … Teie Totaiete… e mana to’na ia faaue i te mau arii vahine i rotopu ia ratou. … E haere mai te mau arii e te mau arii vahine o te ao nei i Ziona, e e faaite i to ratou faatura ». E faaue te mau tuahine o te Totaiete Tauturu e ora ra i ta ratou mau fafauraa i te faatura eiaha noa i te mau hui mana, tera râ « mai te mea e ora outou e tae roa i to outou ti‘araa », ua fafau Iosepha i te mau tuahine e, « eita te mau melahi e opanihia ia riro ei apiti no outou ».3

Mai te mea e, e amui te mau tuahine i roto i te ohipa taviniraa e te faaoraraa ia vetahi ê, e riro ïa ratou tata‘itahi ei mau tuahine haamo‘ahia. Ua faaite o Lucy Mack Smith, te metua vahine o te peropheta, i te maitai ta te Totaiete Tauturu e rave : « E mea ti‘a ia tatou ia here te tahi i te tahi, ia hi‘o te tahi i te tahi, ia tamahanahana te tahi i te tahi e ia roaa te ite, ia ti‘a ho‘i ia tatou paatoa ia parahi amui i te ao ra ».4

© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/10. Parau faati‘a no te iritiraa : 6/10. Iritiraa no Visiting Teaching Message, August 2011. Tahitian. 09768 895

Te mau nota

  1. Eliza R. Snow, « An Address » Woman’s Exponent, 15 no tetepa 1873, 62.

  2. Iosepha Semita, i roto i te History of the Church, 4:570.

  3. Iosepha Semita, i roto i te History of the Church, 4:605,606.

  4. Lucy Mack Smith, i roto i te Buka minuti a te Totaiete Tauturu Mati. 1842–Mati. 1844, entry for 24 no mati 1842, Church History Library, 18–19.

Eaha Ta’u e Nehenehe E Rave?

  1. Eaha ta‘u e rave nei no te tauturu i te mau tuahine ta‘u e hahaere ra ia faatupu e ia faaoti i te « mau opuaraa teitei ? »

  2. Eaha ta‘u e rave nei no te faariro i to‘u oraraa ei oraraa « ma‘itihia, te viivii-ore, e te mo‘a ? »