Inou Kesempwal Kan en Pwuken Mormon

Sounpar tohto samwalahro I kesihnen limwahn pahpa pwulopwul men ni eh wie wonohnehr nanpwungen mour oh mehla. Ah pwoud nsensuwedo oh neira seri riemeno kesihnen kerendo. E koledi pehie nan peho, oh kilengkidohngie mesen pekipek, nda “Pisop, I ese me I pahn melahr. Ndahiengie dah me pahn wiawihiong ngenie ni ansouo.”

I kihda kapakap nan kapehdi pwehn alehdi kaweid sang nanleng oh tehkada me mie limwahn ah pehto pwuhk sarawi kan me Pwuken Mormon, Pearl of Great Price oh Doctrine and Covenants mih loale. I doahkalahng pwuhko oh pahkseli teh kan. I mwadangete diarada me, ni ei sohte koasoanehdi, I uhdihier nan iralaud 40 en Alma nan Pwuken Mormon. I wadekohng ih lepin mahsen pwukat:

“Kilang, e sansalohngiehier sang rehn tounleng emen, me ngenen aramas koaros, ni ansou ohte me irail mwesel sangehr paliwahr en sampah wet, … pahn kolahng deurail rehn Koht me ketikihong irail mour.

“Oh … ngenen me pwung kan pahn kasamw ong wasahn pereperen, me kahdaniki paradais, wasahn kommoal ehu, wasahn meleilei ehu, wasa me irail koaros pahn kommoaldi sang arail kehnaudek kan oh arail pwukoah, oh arail pahtou” (Alma 40:11–12).

Ni ei doula pwehn wadawad duwen Iasadao, pohn mesen ohlo marainda oh e tepida sirei. Ni ei kaimwsekiala ahi pas rehn peneinei kaselel wet, I rahnmwahuihirailla.

I pwurehng kilangada liho oh serihko ni mehlao. I medewehla duwen nihpwongo me ohl pwulopwul men pekipek ni ngidingid en rong mehlelo, oh sang nan Pwuken Mormon, rongada pasapengpen ah peideko.

Sang Pwuken Mormon kohdo inou kesempwal teikan, me iangahki inou kan en meleilei, saledek, oh kapai kan ma kitail pahn te papah Koht en sahpwo, me iei Sises Krais (tehk Ether 2:12).

Sang nan teh kan kin kohdo inoupen “popohl” soutuk ong “irail akan me kin dadauhr kosonned en Koht akan. Pwe kilang, irail kapaidahr ni mehkoaros, ong ni paliwar oh pali ngehn” (Mosiah 2:41).

Sang nan teh kan kin kohdo inou en peren me kitail sohte kak medewehda ong irail akan me kin wiahla dipwisou kan nin limen Koht ong doarehla Sapwellime pwutak oh serepein keneinei kan (tehk Alma 28:8; 29:9).

Sang nan teh kan kin kohdo inou me Israel mwerpesengo pahn kopwurupwurpene—doadoahk ehu me kitail koadkoadoahke sang ni atail mwekid kan en misineri nan sampah pwon (tehk 3 Nephi 16; 21–22).

Sang nan teh kan kin kohdo inou me ni atail pahn kapakap ong Sahmo ni mwaren Sises Krais, atail peneinei kan pahn kapaida (tehk 3 Nephi 18:21).

Sang ni onopiki teh kan kin kohdo pweidahn inou kokohpada me “e pahn kohdo nan amwail mour kan oh nan imwamwail kan laudilahn Ngehn en Kauno, kakehladahn ngoang en alu ni peikiong Sapwellime kosonned akan, oh kadehde ahpwete kehlailla en mehlelpen ieias en Sapwellimen Koht Iehroso.”¹

Oh sang nan teh kan en Pwuken Mormon kohdo inou en Moroni me sang kapakap, ngoang mehlel, oh pwoson Krais, kitail kak esehda mehlel en inou pwukat “sang ni manaman en Ngehn Sarawi” (tehk Moroni 10:4–5).

Patehng soukohp en imwin rahn teikan, I kadehde duwen mehlelpen met “pwuhk me keieu pwung nanpwungen pwuhk koaros pohn sampah,”² me iei Pwuken Mormon, pil ehu kadehdehpen Sises Krais. Audepe padahk lella wasa tohto nan sampah oh wadohng me kin wadek arail ese mehlelo. Ahi kadehde met me Pwuken Mormon kin wekidala mour. Emenemen kitail en wadek oh pil pwurehng wadek. Oh kitail en ehukihda ni peren atail kadehde kan duwen sapwellime inou kesempwal kan ong koaruhsiehn sapwellimen Koht serihkan.