Ma Kitail Sohte Ahniki Peikasal

Nan Pwuken Mormon kitail kin wadek duwen mwahnakapw kaselel kei me inenen loaloapwoat, kommwad, oh kehlail. Irail wia ohl me mehlel oh waun, pwe irail alehdi padahk en kolokol kosonned akan en Koht oh en alu inenda mwohn sihlangih (tehk Alma 53:21). Mwahnakapw poadedi pwukat kawahuih arail nohno kan—arail karasaras kan oh arail sounpadahk kan.

Nohno kan en nein Helaman nah sounpeiko momour nan ansou kan me sohte weksang atail mwehiet. Irair kan me irail mih loale apwal oh keper, oh me pwulopwul kan alehdi poahngoak en doarehla saledek ni paliwar oh ni pali ngehn. Rahnwet kitail momour nan sampah wasa me “kaidehk aramas ekei me kitail mahweniong, pwe ong manaman en ngehn suwed kan en pahnlahng oh ong kaun akan oh me lapalap akan me ahneki manaman, oh pil ong kaun akan me kaunda dih rotorot wet” (Episos 6:12).

Ansou apwal akan kin anahne pahpa nohno kehlail kan oh karasaras akan me kin padahkih mehlel kan me nein Helaman sounpeiko ese: Ma irail sohte pahn peikasal, Koht pahn ketin doareirailla (tehk Alma 56:47). Padapadahk oh kaskasale mehlel wet kin anahne tetehk wasa. Ahpw, kitail sohte anahne masepwehk. Ni ansou me kitail kin ese ihs kitail oh ihs Koht oh kitail wiahdahier inou kan Reh, kitail—duwehtehte nohno kan en sounpeiko—pahn ahniki lipwalipw laud ong me mwahu.

Mweinte, emenemen nein Helaman sounpei 2,060 ahniki nohno men me mie lipwe ong ih. Ahpw nohno pwukat sohte mwekid kelehpw. Patehng ohl oh lih mwahu teikan, nohno pwukat mweinte kapatahpene arail pwoson oh karasaras pwehn padahkih manaman en inou sarawi kan. Mwahnakapw oh peinakapw en ansouo wehwehki inou sarawi me arail pahpa nohno kan wiahda en dehr mahwen. Oh ni ansou me e mwomwen sohte douluhl pahn pweida, Sahm Nanleng me limpoak ritingada ahl pwe pahpa nohno pwukat en kak kolokol arail inouo oh koledi arail saledek (tehk Alma 56:5–9). Kitail, pil duwehte, anahne kolokol atail inou sarawi kan pwe serihkan oh me pwulopwul kan—pein neitail serihkan oh mwohkan nan atail ward kan, atail prans kan, atail kahnihmw kan oh kousapw akan—en wehwehki oh utung kolokolpen inou sarawi kan.

Ni ansou me kitail kin wauniki atail inou sarawi kan, Sahm Nanleng kak ketin kaunopada ahlo ong kitail. Kitail en momouriki atail inou sarawi kan ni inen douluhl. Kitail kak, ni karasaras, inen nan atail kapakap, nan onop en pwuhk sarawi kan, nan kolokol kisin likoun mweimwei ong nan tehnpas sarawi, likou me sohte kasalawar, wauniki rahn en Sapad. Ni atail pahn wia met, neitail serihkan pahn ese oh kak nda me irail sohte peikasaliki me arail nohno kan ese (tehk Alma 56:48).

Lih Souleng en Imwin Rahn Akan me kin kasawiada me arail kehlail kin kohdo sang ni sapwellimen Kauno Tomw sohte kin kesehla mehkoaros nan ansou apwal oh kansensuwed akan. Ni atail wia aramas me kin kolokol inou sarawi kan, kitail kin pweida douluhl ni utuhtung, apwahpwalih, oh sinsile serihkan oh me pwulopwul kan pwe ehu rahn kitail en kak ndahki dih me kohkohda met me kitail sohte kin kilangada soupeikasal laud duwe met nanpwungen sohte lipilipil pwihn tohrohr (tehk Alma 56:45).