Au a Vakila e Dua na Bukawaqa e Lomaqu

Niu sa tubucake tiko au a dau laki tiko ena Matawilivola ni Siga Tabu ena dua na lotu volekata na vanua au a susu cake kina mai Michigan, e Amerika. E totoka o noqu qasenivuli ni dau vakasinaiti au ena loloma i Jisu Karisito.

Ena veimacawa e dau veisoliyaka mai na kadi e vakaraitaki tu kina na cakacaka ni iVakabula e na vuravura oqo, oka kina na ivakavuvuli a vakavulica o Koya kei na cakamana a vakayacora. Ena veimacawa au na dau vakabira na kadi oqo ena dua na ivola ka wilika lesu na italanoa mai na iVola Tabu. Niu sa qase cake mai, au sa laki vulica sara tiko na Kosipeli ena Veiyalayalati Vou.

Ni oti e vica na yabaki, ena vulai ikatakata ni 1968, rau a sikova yani na daukaulotu ni Lotu i Jisu Karisito ni Yalododonu Edaidai na nona vale e dua na lewe ni noqu matavuvale. A besetaka na nodrau veisureti na daukaulotu me vulica na veika baleta na Lotu ka talai rau mai ki vale.

Ena imatai ni neitou vuli rau a vakavulica vei au na daukaulotu ni a yaco “na vuki tani” ena Lotu a tauyavutaka o Jisu Karisito (raica na 2 Cesalonaika 2:3). E rau veiriti vinaka na veika rau vakatavulica kei na veika au a vulica tiko, ni gauna rau kerea kina me sikovi au tale mai, au a vakadonuya sara.

Ena ikarua ni nodrau veisiko mai, sa toka vei au eso na taro. Era veipapitaisotaki beka na Yalododonu Edaidai ena tabadromuci? Era vakabauta beka na lewa ni matabete? Era vakabauta beka na nodra vakabulai na tauvimate? Na nodrau isau ni taro e tokona na veika au a vulica tiko ena Veiyalayalati Vou. Ni oti na nodrau veisiko, rau solia sara mai e dua na ivola e vakadinadinataki Jisu Karisito.

Au a biuta toka na ivola oqo ena dela ni TV kau laki moce. Ia ena lomaloma ni bogi, au a vakayadrati ena dua na yalo qaqa au a qai kila ni Yalo Tabu. Au sa vakauqeti sara ga meu sa wiliwili, au sa qai wiliwili me dua veimama na auwa kau laki moce tale. Ni oti vakalailai, au a vakayadrati tale ena yalo vata ga o ya, kau sa mani wiliwili tale.

A yaco tiko vakaoqo ena rua na bogi veitaravi. Au taleitaka na veika au a wilika tiko kau sa kila kina ni iVola i Momani e vakadinadinataki Jisu Karisito.

Au sa kerea kina vua na Kalou me dusimaki au. Vakatekivu mai niu se goneyalewa lailai, oqo na imatai ni gauna, meu tekiduru ka masu. Au a kerea vua na Tamada Vakalomalagi me vukei au ena cava meu cakava ki na bukawaqa e tiko e lomaqu. Ni oti na noqu masu, au vakila niu sa vakauqeti meu raica tale mada na nodra saumaki mai na Leimani ena 3 Nifai 9. Au a wilika ni ra a “papitaisotaki ena bukawaqa kei na Yalo Tabu, ia era a sega ga ni kila” (tikina e 20).

A qai vosa mai vei au na malanivosa “era a sega ga ni kila.” Au a vakasamataka sara: “Sa tiko dina e vuravura na Lotu i Jisu Karisito ni Yalododonu Edaidai!” Au sa maqusa sara meu vosa vei rau na daukaulotu me baleta na veika au sa wilika kei na veika au sa mai kila oqo. Ia ena gauna rau sa mai sauma kina na noqu taro ka sureti au meu papitaiso, au qai tukuna ni sega ni rawa. E sega ni kila rawa o watiqu na vuna.

Niu mai vakasamataka tiko na tikina o ya, au raica ni sa dusimaki au tiko vakadodonu meu vakacabora e dua na madrali ni “dua na yalo raramusumusu ka bibivoro.” Au a masu ka kerea vua na Tamada Vakalomalagi me vukei au, ka a vakayacora o Koya. Ni oti na nona tauri lesoni o watiqu, a solia na nona veivakadonui meu sa papitaiso.

Au sa vakavinavinaka kina vakalevu vua na Tamada Vakalomalagi dauloloma me baleta na veika talei ka qaqa au a sotava niu se tinani gone vou ena noqu a wilika na iVola i Momani. A muataki au ki na kosipeli vakalesuimai i Jisu Karisito. Sa mai yaco kina na veivakauqeti ni Yalo Tabu au a vakila ena vica na bogi o ya ena 1968 me sa dua na isolisoli tudei ena gauna oqo—sa mai dusimaki au tiko ena loma ni siva e 40 na yabaki au sa mai lewe ni Lotu tiko kina.