Tadra nei Liai

Na bibi ni wiliwili, vulici, vakasaqaqara, kei na vakasamataki vakatitobu ni ivolanikalou vakakina vakatabakidua na iVola i Momani, sa vakaraitaki tiko ena nona a tadra o Liai na vunikau ni bula (raica na 1 Nifai 8).

Na uto ni tadra nei Liai sa ikoya na vunikau ni bula—ai vakatakarakara ni nona loloma na Kalou” (raica na 1 Nifai 11:21–22). “Ni sa lomani ira na kai vuravura vakaoqo na Kalou, me solia kina na Luvena e duabauga sa vakatubura, me kakua ni rusa ko ira yadua era sa vakabauti koya me ra rawata ga na bula tawamudu” (Joni 3:16). Sa ikoya o ya na sucu, bula, kei na veisorovaki ni Turaga o Jisu Karisito sa ivakaraitaki cecere duadua ni nona loloma na Kalou vei ira na luvena. Me vaka sa vakadinadinataka tu o Nifai, ni loloma oqo “sa ikoya na ka sa uasivi duadua” kei na veika sa tukuna na agilosi ena nona kaya, “sa ikoya na ka sa uasivi duadua vei ira na tamata” (1 Nifai 11:22–23; raica talega na 1 Nifai 8:12, 15). Na Wase 11 ni 1 Nifai e tiko kina na matailalai ni kena vakatakarakarataki na vunikau ni bula me ivakatakarakara ni bula, cakacaka ni kaulotu, kei na nona solibula na iVakabula —“na levu ni nona loloma na Kalou” (1 Nifai 11:16).

Na vuanikau sa ivakatakarakara ni veivakalougatataki ni Veisorovaki. Na kena laukana na vuanikau e vakatakarakarataka na ciqomi ni cakacakatabu vakalotu kei na veiyalayalati, me na qai rawa ni vakaibalebale na Veisorovaki ena noda bula.E tukuni ni vuana “ena marau kina na tamata” (1 Nifai 8:10) ena kauta mai na marau ka na vakavuna me vinakati me veiwaseitaki na marau o ya.

Sa matata sara ga e ke ni yavu ni iVola i Momani—na sureti ira na tamata mera lako mai vei Karisito—e vakaliuci sara ga ena tadra nei Liai. Vakabibi na ititoko kaukamea ka dodo yani kina vunikau (raica na 1 Nifai 8:19). Na ititoko kaukamea sa ikoya na vosa ni Kalou

E a raica o Liai e va na iwasewase ni tamata ena nona tadra. E tolu vei iratou na iwasewase era sasaga yani ena sala dodonu ka qiqo mera laki kania na vuanikau. Na ika va ni iwasewase era sega ni sasaga yani kina vunikau, ia era sasaga ga kina valevakaitamera mera yacova (raica na 1 Nifai 8:31–33).

Ena 1 Nifai 8:21–23 eda vulica kina ni imatai ni iwasewase ni tamata era sasaga ena sala ka basika kina vunikau ni bula. Ia, ni ra sotava na butobuto ka vakatakarakarataka tiko na “veitemaki ni tevoro” (1 Nifai 12:17), era sega ni kila na sala, muri cala, ka ra yali.

Vakasamataka toka ni sega ni tukuni ena tikina oqo na ititoko kaukamea. O ira era lecava se ra dau taura vakamamada tu na vosa ni Kalou era na sega ni rawata na kabasi ka na dusi ira yani kina iVakabula.Vakasamataka ni o ira na iwasewase oqo era sa yacova na sala ka ra sa sasaga yani, era sa vakaraitaka na nodra vakabauti Karisito kei na ivakadinadina vakayalo, ia era sa qai temaki mai vua na tevoro ka yali yani.

Ena 1 Nifai 8:24–28 eda na wilika kina na ikarua ni iwasewase ni tamata kara sa yacova na sala ka sa sasaga yani kina vunikau ni bula. Na iwasewase oqo “era sa taura na ititoko kaukamea, era sa sasaga mai ena butobuto loaloa ka tautauri matua tikoga ena ititoko kaukamea me yacova ni ra sa mai kania na vuanikau (tikina e 24). Ia ena gauna era sa vakalialiai ira mai kina na tamata isulusulu rairai totoka mai na vale vakaitamera o ira na ikarua ni iwasewase ni tamata oqo, “era sa madua” ka “ra sa muria na sala tani ka ra sa lako sese kina” (tikina e 28). Raica sara vakavinaka ni o ira na iwasewase oqo e tukuni ni ra “taura na mua ni kaukamea” (1 Nifai 8:24; vakabibitaki).

Me laurai vakavinaka ni o ira na ikarua ni iwasewase era toso yani ena vakabauta kei na yalodina. E tiko talega vei ira na kalougata ni ititoko kaukamea, ka ra sa tautauri tu kina! Ia, ni ra sa mai sotava na veivakacacani kei na dredre, era sa mai lutu kina sala tani ka yali yani. E dina ga ni tiko vei ira na vakabauta, yalodina, kei na vosa ni Kalou, era mai yali talega na iwasewase oqo—baleta beka ni ra vakagauna taka na nodra wiliwili se vulica se vakasaqara na ivolanikalou. Ni tauri na ititoko kaukamea e kena ibalebale vei au ni tauri tu ga vagauna “kasere” ni vulici se vagauna na kena tarai ka sega ni sa caka tikoga, na kena wiliki na vosa ni Kalou.

Ena tikina e 30 eda na wilika kina na ikatolu ni iwasewase ni tamata ka ra sasaga yani “ka tautauri matua tikoga ena ititoko kaukamea ka ra sasaga tiko yani me yacova ni ra sa kania na vuanikau.” Na itomo ni vosa bibi ena tikina oqo na tautauri matua tikoga kina ititoko kaukamea.

O ira na ikatolu ni iwasewase oqo era sasaga talega yani ena vakabauta kei na yalodina, ia e sega ni vakaraitaki ni ra a lakosese, lutu ena sala tani, se era sa mai yali yani. O ira na ikatolu ni iwasewase ni tamata oqo era cakava tikoga na wiliwili kei na vulici kei na vakasaqaqara ena ivolanikalou. De rairai na nodra yalodina kei na gugumatua kina caka ni dua na [ka] “lailai ka rawarawa” (Alama 37:6) e vakabulai ira na ikatolu ni iwasewase mai na veivakarusai. De rairai na nodra “kila vinaka na Turaga” kei na “kila na dina” (Alama 23:5, 6) ka rawati ena yalodina ni vulici na ivolanikalou ka na kauta mai na isolisoli vakayalo ni yalomalumalumu—me vaka na iwasewase ni tamata oqo “yaco yani ka kania na vuanikau” (1 Nifai 8:30; vakabibitaki). De rairai beka na nodra sa vakani tiko vakayalo kei na veivakaukauwataki ni kena dau caka tikoga ka “tugana ki lomamudou na vosa i Karisito” (2 Nifai 31:20) ka rawa kina ki na iwasewase oqo mera vorata na veivakalialiai mai na vale vakaitamera (raica na 1 Nifai 8:33). Oqo na iwasewase ka dodonu vei iko kei au me daru laki semati kedaru kina

E ratou taroga na taci Nifai, “Na cava na ibalebale ni ititoko kaukamea ka raica o tamadatou, ka dodo yani kina vunikau?

“Sa qai kaya vei iratou ko [Nifai] ko ya na vosa ni Kalou, ia ko koya yadua sa vakabauta na vosa ni Kalou ka muria sara, era na sega ni rusa; ena sega talega ni rawai koya na vere kei na gasau vidi ni ca me vakamatabokotaki koya ka kauti koya yani kina veivakarusai” (1 Nifai 15:23–24; vakabibitaki).

Na cava sara mada na duidui ni tautauri kei na tauri matua ni ititoko kaukamea? Meu vakatura mada ni tauri matua ni ititoko kaukamea e tiko kina na, vakalevu sara na, masumasu, kena dau wiliki wasoma na ivolanikalou me ivurevure ni veika dina ka me idusidusi kina sala kina gaunisala rabailailai ka qiqo sa yaco kina vunikau ni bula—io sa i Jisu Karisito.

“Au sa kila ni sa vosa ni Kalou na ititoko kaukaumea ka raica ko tamaqu ni dodo yani ki na mata-ni-wai ni bula se ki na vunikau ni bula” (1 Nifai 11:25).

Na iVola i Momani e tiko kina na dina ka na gadrevi sara vakalevu ena gauna oqo kei na veika eda sotava tiko. E vakamatatataka o Moronai na veika vakayalo kei na veika vakayago ni iVola i Momani ena noda bula. “Ia, au sa vosa sara tikoga oqo vei kemudou. Raica sa vakatakilai kemudou vei au ko Jisu Karisito, kau sa kila kina na veika dou sa kitaka” (Momani 8:35). O ira na dauvolavola ena iVola i Momani era sa raica na noda veigauna kei na veika eda na sotava ena veidusimaki ni Kalou, era sa vola sara tu ga na ulutaga ka ivakaraitaki ni veika ena bibi kina nodra bula o ira era na mai bula e vuravura ena gauna oqo.

Au sureti kemuni moni vakasamataka vakavinaka na taro oqo: Na lesoni cava e rawa niu vulica mai na tadra nei Liai vakakina na ivakavuvuli ni kena caka tikoga na tautauri matua kina ititoko kaukamea ka na rawa kina vei au meu na vaqaqacotaki vakavinaka ena vuravura ka da sa bula tiko kina nikua?

Ni ko sasaga mo vaqara ka vakauqeti mo kila na isaunitaro oqo, ko na rawa ni kila ena veivakauqeti ni Yalo Tabu ena vu ni yalomu kei na nomu vakasama na bibi ni kena tauri matua na ititoko kaukamea. Ko na qai vakalougatataki ni ko sa na bulataka na lesoni oqo ena vakabauta kei na yalodina ena nomu bula kei na bula ni nomu matavuvale.

Me na qai raica ka rogoca na veilesoni tale e so mai na tadra nei Liai me na vukei keda meda “toso ki liu ka tudei vei Karisito ena nomudou vakanuinui taucoko mo dou lomana na Kalou kei na tamata kecega. Ia, kevaka dou sa toso ki liu ka tugana ki lomamudou na vosa iKarisito, ka vosota me yacova na ivakataotioti, raica sa kaya vakaoqo na Tamada: Dou na rawata na bulatawamudu” (2 Nifai 31:20).