Pundo alang sa Akong Misyon

Nahibalo ako nga ingon og lahi kini nga paminawon, apan nagtigom na ako og kwarta nga ibayad sa akong misyon bisan sa wala pa ako matawo. Sa dihang nahibalo ang akong mama nga duna na siyay umaabut nga anak, mikuha siya og basiyo nga lata sa gatas, gilungagan kini, ug gisulatan, “Pundo alang sa Misyon.” Sukad nianang adlawa, ang akong pamilya ug ako nagtigom na alang sa akong misyon.

Ang pagtigom alang sa akong misyon nahimo nang usa ka paningkamot sa pamilya. Human ako matawo, ang akong mga tiyo ug mga tiya nga mobisita mohulog og kwarta ngadto sa lata sa pundo alang sa misyon. Ug kon ang holiday sama sa Pasko o Bag-ong Tuig moabut, ang mga sakop sa pamilya mohatag kanako og kwarta nga idugang sa pundo alang sa akong misyon.

Usahay ang akong mga apohan mohatag kanako og kwarta kon maayo ang akong mahimo sa eskwelahan ug sa mga kompetisyon. Kini nga mga gasa isulod usab ngadto sa pundo alang sa akong misyon. Kausa, dihang nakadawat ako og daghang medal, ang akong tiya miihap sa tanang medal nga akong nadawat ug gihatagan ko og kwarta tukma sa matag usa. Human nako mabayari ang ikapulo, kini nga kwarta usab gipasulod ngadto sa pundo alang sa akong misyon.

Sa dihang gibunyagan ko, ang akong tinguha nga magmisyon mas midako. Ang akong pamilya mihimo og tumong nga magtigom og igong kwarta nga makabayad sa akong tibuok nga misyon. Tungod kay ako karon duna nay mga igsoon, ang kwarta nga among gitigom gidugang usab ngadto sa ilang mga pundo alang sa misyon.

Siyam na karon ang akong edad ug hapit na katunga sa edad nga ako magmisyon. Ang akong tinguha nga magmisyon milambo tungod kay nahibalo ako nga adunay daghan kaayong tawo kinsa nakaamot sa pundo alang sa akong misyon.

Padayon akong magtigom alang sa akong misyon. Nahibalo ako nga ang Langitnong Amahan mopanalangin kanako aron makaserbisyo ako Kaniya isip misyonaryo ugma damlag.