Mga Leksyon gikan sa Agalon

Kutob sa akong mahimumduman ako adunay espesyal nga paghigugma ni Jesukristo. Gitudloan ko nga Siya mao ang Anak sa buhi nga Dios. Gitudloan ko nga Siya mao ang akong higala, akong magtutudlo, ug akong kusog. Sa nanglabay nga mga tuig, sa dihang ang calling ug responsibilidad ug pasidungog sa pagpamatuod og linain nga pagsaksi kabahin Kaniya miabut sa akong kinabuhi, naningkamot ko pag-ayo nga matudloan sa Iyang kinabuhi ug sa Iyang mga pamaagi. Sa pagkatinuod, Siya mao ang Gamhanan nga Magtutudlo. Sa pagtabang kanako sa akong mga buluhaton ug pasalig, nakaplagan nako ang akong kaugalingon nga kanunayng mopakli sa ikawalo nga kapitulo sa Juan diha sa Bag-ong Tugon alang sa kalig-on, alang sa paggiya, ug alang sa ehemplo. Kon ganahan kamo, atong basahon ang pipila ka mga bersikulo aron sa paglig-on sa atong mga kinabuhi ug sa atong relasyon uban ni Jesus. Kini nga mga linya ug mga pulong nakatabang kanako nga mas makasabut og maayo Kaniya ug naghatag kanako og tinguha nga mobuhat ug mahimong mas mahisama Kaniya. …

[Ang mga eskriba ug mga Pariseo] midala ngadto Kaniya og babaye nga nanapaw. Kining mga kaaway … misulay sa paglingla Kaniya. Ilang gipatindog siya sa tunga-tunga isip usa ka exhibit, isip usa ka makasasala, isip usa ka tawo nga hugaw. Siya wala mopalayo sa iyang presensya. … Kini nga babaye nasakpan nga nanapaw—sa akto gayud. Walay pagduda nga nakasala siya. Ila Siyang gibutang sa ingon og imposible nga sitwasyon. Ang balaod ni Moises miingon nga pagabatohon siya. “Unsa may imong makasulti mahitungod kaniya?” [Juan 8:5] sila nangutana, nagtintal Kaniya, naglit-ag Kaniya—nagbutang Kaniya sa usa ka posisyon nga walay dag-anan.

Bisan unsa ang Iyang isulti, Siya paga-akusahan og sayop nga buhat, sayop nga hukom. Sila nagtintal Kaniya nga mawala ang Iyang pailub ug makalimot kon si kinsa Siya. Ang pagbato sa babaye mapintas kaayo. Ang dili pagtagad kaniya mahimong sayop. … Siya mitikubo ug misulat sa yuta nga mora og wala makadungog kanila (nagkuha sa ilang atensyon ug nag-andam sa tanan nga makadungog aron tudloan). … Ug samtang hilum, sila nagpadayon sa pagpangutana. Makahunahuna ko sa mga pangutana sa pagbiay-biay: “Sige na, sulti na. Wala na kay mahimo. Nahadlok ba ka nga motubag?” Apan si Jesus mao ang nagdumala. …

Si Jesus mibayaw sa Iyang kaugalingon, sa mapainubsanon ug sa harianon nga kaaghop, ug miingon niining gamhanan kaayo nga mga pulong: “Kinsa kaninyo ang walay sala maoy paunahag labay kaniyag bato” [Juan 8:7]. Usa ka hingpit nga tubag gikan sa usa ka hingpit nga tawo.

Karon sa atong mga responsibilidad, mga sitwasyon, ug mga calling, kinahanglan nato nga mapahinumduman niini sa makadaghan. Sa atong pagpakig-uban sa tanang mga tawo, si kinsa kadtong walay sala maoy paunahon og pagpanaway o sa pagpangita og sayop o sa pagtamay. … Siya mitikubo ug misulat sa yuta. Ilang nadungog unsa ang Iyang gisulti. Ilang nabati ang epekto sa Iyang kakalma samtang Siya walay gisulti. Mibati nga sad-an pinaagi sa ilang kaugalingong konsensya, sila mismo mibiya, wala gipapahawa. Sila tagsa-tagsa nga mibiya—wala mangita og bato apan sa pag-ayo sa ilang espiritwal nga mga samad.

Siya gibiyaan nga nag-inusara kauban ang babaye. Nalipay ko nga kini natala. Ang pipila kanato adunay posibilidad nga molikay niadtong nakasala. … Siya miingon, “Hain na sila? Wala bay mihukom kanimog silot?” [Juan 8:10]. … Si Jesukristo migahin og panahon sa pagpangutana ug pagpaminaw. O, unta kita makahimo og daghan nga sama niana! Ang atong mga tubag mas mahimong sayon, nindot pa kaayo. …

Ang babaye nga nanapaw mitubag sa pangutana sa Ginoo kabahin sa iyang mga tigpasangil pinaagi sa pag-ingon, “Wala, Senyor.” Ug dayon kining makapatandog kaayo nga deklarasyon gipamulong: “Lumakaw ka, ug ayaw na pagpakasala” [Juan 8:11]. Ang Agalon nagtudlo niadtong adlawa ug nagtudlo usab niining mismong orasa. Ang Iyang mahinungdanon nga mensahe: kasilagan ang sala, apan higugmaon ang makasasala. Ako naglaum nga kini makahatag kanato og kalig-on ug pagsalig ug mas suod nga relasyon ngadto sa atong Manluluwas, si Jesukristo. Wala ibaliwala ni Jesus ang pagpanapaw. Siya mihatag sa babaye og gugma imbis sa usa ka mamandoon nga panudlo. Ang babaye ug ang iyang mga tigpasangil nanginahanglan og leksyon sa gugma. Ang sitwasyon nanawagan og kalooy ug kapuangod. Magantihon kaayo nga masayran nga si Jesus nagtuo nga ang tawo mas labaw pa kaysa tanan niyang mga sala. Ikatingala pa ba nga siya ang gipasabut isip “Maayong Magbalantay”? Siya nahigugma sa tanan Niyang mga karnero bisan kon sila nahisalaag, gipanggutom, walay mahimo, gipangtugnaw, o nawala.

Sa pagtapos niining talagsaong kasinatian sa pagtudlo, kini nga leksyon sa gugma ug kapuangod, mao ang usa ka importante nga bersikulo.

“Ug ngadto kanila si Jesus misulti pag-usab, nga nag-ingon, Ako mao ang kahayag alang sa kalibutan: siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag ug kinabuhi” (Juan 8:12).

Sundon nato ang Iyang kahayag. Modangup kita kanunay niini nga mga pulong. Ako mopamatuod kaninyo nga kini gipreserbar alang sa kaayohan sa tanan.