Athamgil ni Guy e Yiko’

Bin migid e nep ko Young Women camp u stake, ma keb e n’uw nib alamrin nge tornado ngomad. Ward rog e badke raliw’ nge aningeg urngin e Rugod nibe un ko fare camp ni bay l’agruw i toygang’ riy, ma ngug taw gad nga lane bochi na’un ni dabug mad’ad gad. Be aw fare n’uw nib alamrin, ma nifeng e be alamrin. Ma ngug pogran nag ngog ko ba meybil ni fan ko ayuw nike pi’ e stake president romad nga m’on riy. Ward romad e ku gogned e biromad e meybil u na’un, mug goeg reb e meybil rog.

Bo’or e ppin e kan rus, ma ba moem ni ngan guy ko mang fan. Na’un romad e dani gel, ma gamad bay u to’ban e lul’. Go’ napan raliw’ e ment be alamrin fare yiko’ ni oren e gidii’ ko stake e kar mil gad ko na’un rorad i yan ko na’un ko counselor, nib tolang ngalang. Stake president rog e yog reb e meybil, me yoen’ e tang, tang ko Primary, nge tang ko camp ni yibe guy rogon ni ngug gapas nag mad. Arogon, ku rus gad, machane ku thamiyed ni gubin ban’en ma ra mangil baley e awa’ ma keyog ni ngug warod ko na’un ko ward romad.

Ta’aboch mug pir’eged e n’en nike rrin’ fare tornado e binem e nep. Ke dar u but ke gaman l’agruw e yiko’. Reb e liyeg mad nibe yaen ko gilay’ ma reb e be yaen’ ko mataw’. N’en ni ke buch romad e gathi bin tha’abi alamrin riy!

Gumnang ni ke rung’ag Got e meybil romad e re nep nem ma gum nang ni be ayuweg mad ko tin nib magawon ban’en ko yiko’. Mongfan ni nge dar e tornado u but fa’anra ba tu’f ku Got ni nge rrin’? Gumnang ni yiko’ u lane yafas, ma gubin ngiyal’ ma rayog ni ngad meybil gad ngak e Chitamangiy nu Tharmiy ma ra runga’ag ma ra fulweg taban, me pi’ e athamgil ngodad nge n’en ni ra ayuweg dad u futhik.