Fas Presidensi Mesej, Jenuware 2012
Stap long Laef we I Fulap Gud long Evri Samting
Long stat blong wan niufala yia, mi jalenjem Ol Lata-dei Sent raon long wol blong traehad blong lukaotem blong olgetawan, wetem fasin blong stap strong, wanem we mi singaotem laef we i fulap gud long evri samting—wan laef we i fulap gud wetem evri sakses, gud samting, mo ol blesing. Semmak olsem we yumi lanem ol ABD (alfabet) long skul, mi stap givim ol ABD blong miwan blong helpem yumi evriwan i kasem wan laef we i fulap gud long evri samting.
Gat Wan Fasin we I Gud
Fas prinsipol long ol ABD blong miwan hem i fasin. William Jemes, wan paeonia blong Amerika we i dokta blong olgeta we oli gat problem long tingting, mo man blong raetem ol buk, i bin raetem, “Bigfala jenis long taem blong yumi tedei hem i stadi ia we i faenem se ol man, taem oli jenisim ol fasin blong tingting blong olgeta, oli save jenisim tu ol fasin blong wok blong olgeta.”1
Plante samting long laef i dipen long fasin blong yumi. Wei we yumi jusum blong lukluk ol samting mo fesem ol nara man i lidim wei blong evri samting. Sapos yumi mekem bes blong yumi mo afta, jusum blong stap glad long laef we yumi stap long hem nomata wanem situesen, yumi save gat pis mo glad long ol laef blong yumi.
Jals Swindol—man blong raet, tija, mo Kristin pasta—i bin talem: “Fasin, long mi, i moa impoten bitim … taem blong bifo, … bitim mane, bitim situesen blong laef blong yumi, bitim ol samting we yumi no winim, bitim ol sakses, bitim wanem ol naraman i tingting o talem o mekem. Hem i moa impoten bitim wei we wan i dresap, fasin blong givim presen, o skil. Bae i mekem, o brekem wan kampani, wan jos, wan hom. Samting we i spesel hem i we yumi gat wan joes, evri dei, abaot fasin we bae yumi gat blong dei ia.”2
Yumi no save kontrolem win, be yumi save kontrolem bot. Blong gat bigfala hapines, pis, mo glad, bae yumi jusum wan fasin we i gud.
Biliv long Yuwan
Nambatu prinsipol i blong biliv—long yuwan, long olgeta we oli stap raon long yu, mo long ol prinsipol we oli no save finis.
Stap ones long yuwan, wetem ol narawan, mo wetem Papa blong yu long Heven. Man we i no ones wetem God afta we i faenem se i let tumas, i bin Kadinal Wolsi we, folem Sekspia, i bin spendem laef blong hem longtaem taem hem i stap givim seves long tri king mo stap glad long mane mo paoa we hem i bin kasem. Long en, wan king we i no gat fasin blong save wet longtaem i bin karemaot paoa mo ol samting we hem i gat. Kadinal Wolsi i bin krae:
Sapos mi bin givim seves long God blong mi nomo wetem haf taem
we mi bin stap givim seves long king blong mi, bae Hem i no save, wetem yia we mi gat,
Lego mi stap neked long fored blong ol enemi blong mi.3
Tomas Fula, wan Inglis man blong jos mo histri we i bin laef long yia 1700, i bin raetem trutok ia: “Man we i no laef folem bilif blong hem, hem i no biliv tru.”4
Yu no stopem yuwan mo no letem ol narawan oli winim yu se yu no save mekem moa long wanem we yu save mekem. Biliv long yuwan mo afta, laef long wan wei blong kasem ol samting we yu save kasem.
Yu save kasem wanem we yu biliv se yu save mekem. Gat tras mo biliv mo gat fet.
Fesem Ol Jalenj Wetem Strong Paoa long Tingting
Strong paoa long tingting i kam wan fasin we i gud inaf mo i gat mining taem yumi lukluk long hem, i no olsem taem wan we i rere blong givim laef blong hem mo ded from wan samting, be taem yumi lukluk long hem olsem taem wan we i gat strong tingting blong gat wan laef we i gud mo stret.
Ralf Waldo Imeson, wan man Amerika we i stap raet mo raetem poem i bin talem: “Long eni samting we yu mekem, yu nidim strong paoa long tingting. Long eni rod we yu jusum blong folem, oltaem i gat wan man blong talem long yu se yu rong. Oltaem i gat ol hadtaem we oli kam antap we oli save temtem yu blong bilivim se ol samting we yu stap tingting long olgeta, oli stret. Blong mekem wan plan blong aksen mo folem go kasem en i nidim sem strong paoa long tingting we wan soldia i nidim. Pis i gat ol viktri blong hem, be i nidim ol man mo ol woman we oli gat strong tingting, blong winim olgeta viktri ia.”5
Bae i gat ol taem we bae yu fraet mo yu no gat strong paoa long tingting. Bae yu filim se yu lus. I luk olsem se janis blong kasem viktri, bae hem i no isi. Samtaem bae yu filim olsem Deved we i stap traem blong faet agensem Golaeat. Be tingbaot—Deved i win!
I nidim strong paoa long tingting blong mekem wan kwik stat from wan gol we evriwan i wantem kasem, be i nidim moa strong paoa long tingting taem wan i mestem mo stop mo mas traehad bakegen blong kasem.
Gat wan strong tingting blong traehad. Gat wan samting nomo long maen we i blong yu blong wok from wan gol we i klin inaf, mo gat strong paoa long tingting, i no blong fesem ol jalenj nomo we bae i mas kam, be tu, blong traehad nambatu taem sapos i rili nidim. “Samtaem strong paoa long tingting i wan smol voes long en blong dei we i talem, ‘Bae mi traem bakegen tumoro.’”6
Bae yumi tingbaot ol ABD taem yumi statem rod blong yumi long niu yia ia, wok blong gat wan gudfala fasin, wan bilif we yumi save wok blong kasem ol gol blong yumi mo ol samting yumi nid blong mekem, mo gat strong paoa long tingting blong fesem eni jalenj we bae oli kam long rod blong yumi. Afta bae yu kasem laef we i fulap long evri samting.
© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong First Presidency Message, January 2012. Bislama. 10361 852
Ol Tingting blong Tij Wetem Mesej Ia
Tingting blong invaetem ol memba blong famle blong serem ol eksperiens blong olgeta taem we wan gud fasin, bilif long olgetawan, o strong paoa long tingting i bin helpem olgeta. O invaetem olgeta blong faenem ol eksampol blong ol trifala prinsipol ia long ol skripja. Ating yu save rere, wetem prea, blong tij mo tingting long ol skripja o eksperiens blong yuwan.