Iren Mahsen en Presidensi Keieu, Senweri 2012
Momouriki Mour Audapan
Ni tepin pahr kapw ehu, I kangoangih Souleng en Imwin Rahn Akan wasa koaros en tapiada ong pein irail, ni ngoang, ropirop laud ehu ong dahme I kin kahdaniki mour audapan—mour ehu me direki pweida, me mwahu, oh kapai kan. Duwehtehte atail kin kasukuhlki mesen nting kan nan sukuhl, I kihda pein ahi kasukuhl en mesen nting kan pwehn seweseikitail alehdi mour audapan.
Ahniki Lamalam en Kak
L nan mesen nting kan me I piladahr doke lamalam. William James, mehn America men me iang tepin samanih kasukuhl en pali en madamadau oh mwekid en aramas oh pali en madamadau, ntingihdi, “Wikidekla keieun laud en atail dih iei dierekdahn me aramas, sang ni ahr kin wikidala lamalam en ahr mwahliel kan, kak wikidala pali liki en arail mour.”1
Me laud mehlel nan mour pahsan atail lamalam. Mwomwen atail kin pilada en kilang soahng kan oh ehuong de pahsan mehteikan me katapan. En wia uwen atail kak koaros oh eri pilada kitail en pereniki irair me kitail mih loale, sohte lipilipil irair dah, kak wahdo meleilei oh nsenamwahu.
Charles Swindoll—soun ntingih pwuhk , soun kasukuhl, oh kaun men en Souleng—nda: “Lamalam, ong ie, kesempwalsang … dah me wiawi mahs, … sang mwohni, sang irair, sang soh pweida kan, sang pweida kan, sang dahme aramas teikan kin medewe de nda de wia. E kesempwalsang mwohmw, mai en wia mehkot, de koahiek. E pahn wiahda de kawehla pwihn en pesines ehu, mwomwohdiso ehu, ihmw ehu. Dahme kapwuriamwei iei me kitail ahniki pilipil rahn koaros me pid lamalam me kitail pahn ahniki ong rahno.”2
Kitail sohte kak kaweid kisiniengo, ahpw kitail kak kapwungala serengko. Ong peren, meleilei, oh nsenamwahu me keieu laud, kitail kak pilada lamalam en kak.
Kamehlele Pein Kowe
K iei mesen nting ong kamehlele—pein kowe, irail kan me kapil uhk, oh padahk soutuk kan.
Mehlel ong pein kowe, ong mehteikan, oh ong Semomw Nanleng. Emen me sohte kin mehlel ong Koht lao eh pwandalahr iei Cardinal Wolsey me, Shakespeare koasoaiahda, ahniki mour reirei ni eh kin papah sohpeidi silimen oh kin paieki kepwehpwe oh kehlail laud. Ni imwilao, nanmwarki soukanengamahmen ketkihsang ih mene oh eh pai koaros. Cardinal Wolsey sengkihla:
Ma I papahte ahi Kohto ni elep en ngoang me
I papahki ahi nanmwarkio, E sohte pahn nan ahi sounpar wet
Ketkihiengie en kilisou mwohn ahi imwintihti kan.3
Thomas Fuller, olen mwomwohdiso men en England oh sounpoad men me momour nan pahr kid wenepwiki samwahu, ntingiedi kahk mehlel pwoatet: “E sohte kamehlele me sohte kin momouriki dahme e kamehlele.”4
Dehr irehdi pein kowe oh dehr mweidehng mehteikan en kahrehieng omw kamehlele me ke irairdi ni dahme ke kak wia. Kamehlele pein kowe oh eri momour pwehn lel uwen ahmw kak unsek.
Ke kak kapwaiada dahme ke kamehlele me ke kak. Koapwoaroapwoar oh kamehlele oh ahniki pwoson.
Sohpaiki Kahpwal kan Soupeikasal
Soupeikasal kin wiahla mehkot me katapan oh kesempwal ni ansou me e kin doadoahk kaidehn ong mehla duwen ohl ahpw ni ngoang en momour ni mwahu.
Souninting en America Ralph Waldo Emerson nda: “Sohte lipilipil dahme ke wia, ke anahne soupeikasal. Sohte lipilipil ahl me ke pilada, e pahn ansou koaros mie emen me pahn ndahwei me ke sapwung. Uhdahn kahpwal kan pahn kin pwarada me pahn kasongosongihiuk ken kamehlele me irail akan me kin kaweiuk me pwung. Pwehn koasoanehdi ahl me ke pahn mwekidki oh idawehn lel imwi kin anahne soupeikasalohte me sounpei men kin anahne. Ansoun meleilei kin mie ah pweida, ahpw e anahne ohl oh lih kommwad kan en kapwaiada.”5
E uhdahn pahn mie ansou kan me ke pahn masepwehk oh peikasal. Ke mwein pahn pehm me ke pehrdi. Omw kak en pweida mwein pahn mwomwen apwal mehlel. Ekei ansou ke pahn mwein ahniki pepehm duwehte Depit ni ah songosong en peieng Kolaiad. Ahpw tamataman—Depit uhdahn kana!
Soupeikasal kin anahn ni emen eh pahn tepin nantihwei ong dahme e inangih alehdi, ahpw soupeikasal ahpwete laudsang kin anahn ong ansou me emen kin dipekelekel oh udahn anahne nantihong keriapak pwehn pweida.
Ahniki kehlail en madamadau en nantihong, loaloapwoat en doadoahk ong koasoandi katapan ehu, oh soupeikasal kaidehnte en sohpai kahpwal kan me udahn pahn kohdo ahpw en pil nantihieng keriapak, ma anahnepe pahn mie. “Ekei pak soupeikasal iei ngihl tikitik ni imwin ehu rahn me kin inda, ‘I pahn pwurehng song lakapw.’”6
Kitail en tamataman mesen nting pwukat ni atail pahn tapiada atail seiloak ong nan pahr kapw wet, kakairada lamalam en kak, kamehlele me kitail kak alehdi dahme kitail men alehdi oh koasoanehdi, oh soupeikasal en sohpai sohte lipilipil kahpwal me pahn kodohng kitail. Eri kitail ahpw pahn ahniki mour audapan.
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, January 2012. Pohnpeian. 10361 885
Padapadahk sang Iren Mahsen Wet
Medewe en luke towe kan en peneinei en ehukihda irair kan me re pein lelohngehr ni ansou me lamalam en kak, kamehlele pein irail, de soupeikasal sewese irail. De luke irail en rapahkihda karasaras kan en padahk siluh pwukat nan pwuhk sarawi kan. Komw mwein pahn men kaunop en padahk sang ni medemedewe ni kapakap iren pwuhk sarawi kan de irair kan me komw pein lelohngehr.