Te oraraa i te oraraa auhune

Te A i roto i ta’u ABC o te huru ïa. Ua papa‘i o William James, te hoê feruri parau e taote hi‘opo‘a atoa i te feruriraa taata no te fenua Marite i tahito ra, « te iteraa rahi roa‘e tei noaa mai i to tatou u‘i o te iteraa ïa e, e nehenehe ta te taata e taui i te hi‘oraa rapae o to ratou oraraa, na roto i te tauiraa i te huru roto o to ratou mau feruriraa ».¹

Ua rahi roa te mau mea e tupu nei i roto i te oraraa no to tatou ho‘i huru. Na te huru o ta tatou ma‘itiraa ia hi‘o atu i te mau mea e ia pahono atu ia vetahi ê, e faatupu i te taa-ê-raa atoa. Te raveraa i te mea maitai roa‘e ta tatou e nehenehe e rave e te ma‘itiraa i muri iho ia oaoa i te mau mea atoa e tupu mai i ni‘a iho ia tatou, noa’tu te huru o taua mau mea ra, e nehenehe ïa te reira e afa‘i mai i te hau e te oaoa.

Ua parau o Charles Swindoll, e taata papa‘i buka, e orometua haapii e e orometua keresetiano e : « No’u nei, e mea faufaa a‘e te huru… i te mau mea i tupu… i te moni, i te huru oraraa, i te mau manuia-ore-raa i te mau manuïaraa, i te mea ta te tahi atu mau taata e feruri aore râ e parau aore râ e rave. E mea faufaa a‘e te reira i te mau hi‘oraa, i te aravihi aore râ i te ite. Na te reira e faatupu e aore râ e vavahi i te hoê taiete, te hoê ekalesia, te hoê utuafare. Te mea faahiahia râ maori râ ïa, tei ia tatou ïa te ma‘itiraa i te mau mahana atoa i te huru ta tatou e rave no taua mahana ra ».²

Eita ta tatou e nehenehe e arata‘i i te tereraa o te mata‘i, e nehenehe râ ta tatou e faatano i te vairaa o te mau ‘ie. No te hoê oaoa rahi, te hau e te poupou, e mata na tatou i te ma‘iti i te hoê huru maitai.

Te B no te ti‘aturi ïa— outou iho, i te feia e haati nei ia outou, e i te mau ture mure ore.

Eiaha outou e haavare ia outou iho, ia vetahi ê e i to outou Metua i te Ao ra. Te hoê taata tei haavare i te Atua e tae noa’tu e, ua maoro roa, o te Karatino Wolsey ïa, tei ora na, mai te au i te papa‘iraa a Shakespeare, i te hoê oraraa roa i te taviniraa e toru arii e tei fana‘o i te tao‘a rahi e i te mana. I te pae hopea, ua faaerehia oia i to’na mana e ta’na mau tao‘a na te hoê arii faaoroma‘i ore. Ua parau te karatino Wolsey ma te ta‘i :

Ua papa‘i o Thomas Fuller, te hoê taata peretane arata‘i Ekalesia, e e taata papa‘i aai atoa tei ora na i te tenetere 17, i teie nei parau mau : « Te taata o te ore i ora mai te au i to’na faaroo, aita ïa oia e ti‘aturi ra ».⁴

Eiaha e ta‘oti‘a ia outou iho, e eiaha e vaiiho ia vetahi ê ia parau mai ia outou e, ua ta‘oti‘ahia outou i roto i te mea ta outou e nehenehe e rave. A ti‘aturi ia outou iho e i muri iho, a ora mai te reira te huru, ia tae‘ahia ia outou to outou faito mau. E nehenehe ta outou e faaoti i te mea ta outou e ti‘aturi e, e nehenehe ta outou e rave.

A ti‘aturi e a mau i te faaroo.

E riro mai te itoito ei viretu hoona e te faufaa rahi ia ore ana‘e te reira e faarirohia mai te hoê hinaaro o te hoê taata ia pohe, mai te hoê râ faaotiraa ia ora maitai.

Ua parau te taata papa‘i buka Marite o Ralph Waldo Emerson : « Noa’tu te mea ta outou e rave, ei itoito to outou e ti‘a ai. Noa’tu te huru o te e‘a ta outou e rave, te vai ra ihoa te hoê taata o te parau mai ia outou e, ua hape outou. E vai noa mai â te mau fifi o te tupu mai no te faahema ia outou ia ti‘aturi e, ua tano te mau faahaparaa. No te faanaho i te hoê tereraa e, no te haapa‘o i te reira e tae roa’tu i te hopea, e titauhia ïa te itoito mai to te hoê faehau te huru. Te vai ra te mau upooti‘araa no te hau, e titauhia râ te mau tane e te mau vahine itoito no te faatupu i te reira ».⁵

Te vai ra te mau taime e ri‘ari‘a e e paruparu outou. E mana‘o paha outou e, ua pau outou. E au ra e, e ohipa iti rahi te noaaraa te upooti‘araa. I te tahi mau taime e feruri outou mai ia Davida i te tamataraa i te aro ia Golia. A haamana‘o râ, ua upooti‘a o Davida !

E titauhia te itoito no te tuu i te taahiraa matamua e tae atu ai i te fâ ta te hoê taata e titau ra, tera râ, e itoito rahi atu te titauhia ia marua ana‘e te hoê taata i raro e ia tapiti faahou te tutavaraa e oti ai.

A faaoti papû te mana‘o ia tutava, ia haa ma te rotahi te mana‘o i ni‘a i te hoê fâ maitai, e ia roaa te itoito eiaha no te faaruru noa i te mau titauraa o te tae papû mai, no te rave atoa râ i te piti o te tutavaraa, mai te mea e titauhia. « I te tahi taime, te itoito, o te reo ha‘iha‘i ïa e faaroohia i te hopea o te mahana o te parau mai e, ‘ e tamata faahou â vau ananahi ».⁶

E mata na tatou i te haamana‘o i teie mau ABC a omua‘i tatou i to tatou tere i roto i te matahiti apî, ma te faatupu i te hoê huru maitai, te hoê ti‘aturiraa e, e nehenehe ta tatou e faaoti i ta tatou mau fâ e i ta tatou mau faaotiraa, ei reira te itoito no te faaruru i te mau tamataraa atoa e tae mai ai i ni‘a i to tatou e‘a. I reira ïa e roaa ai ia tatou te oraraa auhune.