Parau poro‘i na te mau tuahine hahaere, Tenuare 2012
Te tia‘iraa e te utuuturaa na roto i te hahaereraa a te mau tuahine
A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i to outou mau tuahine e ia faariro i te Sotaiete Tauturu ei tuhaa itoito no to outou iho oraraa.
Te Faaroo, Te Utuafare, Te Totauturu
« Te aroha, e ere noa ïa i te mana‘o tavini no te faaho‘iraa ore », te haapiiraa ïa a te peresideni Henry B. Eyring, tauturu matamua i roto i te Peresideniraa Matamua. « Ua fâ mai te aroha mai roto mai i te faaroo i te Fatu ra ia Iesu Mesia e o te hoê tupuraa no Ta’na Taraehara ».1 No te mau tuahine no te Sotaiete Tauturu, te hahaereraa na te mau tuahine, o te aroha ïa i roto i te ohipa, te hoê rave‘a faufaa roa no te faaite i to tatou faaroo i te Faaora.
Na roto i te hahaereraa na te mau tuahine, te horo‘a ra ïa tatou i te tia‘iraa na roto i te farereiraa i te tuahine tata‘itahi, te faaiteraa i te hoê parau poro‘i o te evanelia, e te tamataraa ia ite ia’na e i te mau hinaaro o to’na utuafare. « E riro te hahaereraa utuafare ei ohipa na te Fatu mai te mea e, e faatumu tatou i ni‘a i te taata, eiaha râ i ni‘a i te numera », te na reira ra o Julie B. Beck, te peresideni rahi o te Sotaiete Tauturu. « Te parau tano maori râ, aita to te hahaereraa utuafare e hopearaa. E au te reira mai te hoê huru oraraa eiaha râ ei ohipa. Ua riro ta tatou taviniraa ei orometua hahaere mai te a‘o haapa‘o ei faaiteraa i to tatou ti‘araa pĭpĭ mau ».2Na roto i ta tatou tia‘iraa tamau e te pure
e haapii mai tatou nahea ia utuutu maitai a‘e e ia pahono maitai a‘e i te mau hinaaro o te tuahine tata‘itahi e to’na utuafare. Ua rau te huru o te utuuturaa te tahi e mea rahi, te tahi e ere i te mea rahi. « I te rahiraa o te taime ua riro te mau ohipa taviniraa ha‘iha‘i e, o te reira ana‘e te mea tei titauhia no te faaitoito e no te haamaitai i te tahi taata : te hoê uiraa no ni‘a i te utuafare o te hoê taata, te mau parau vitiviti no te faaitoitoraa, te hoê haapoupouraa no roto mai i te aau, te hoê rata iti no te haamauruuru, te hoê niuniu poto », te haapiiraa ïa a te peresideni Thomas S. Monson. « . … Eita e noaa i te tai‘ohia te mau ohipa taviniraa tei ravehia e te nuu rahi a te mau tuahine hahaere a te Sotaiete Tauturu ».3
No roto mai i te mau papa‘iraa mo‘a
Ioane 13:15, 34–35; 21:15; Mosia 2:17; Te Parau Haapiiraa e te Mau Parau Fafau 81:5; Mose 1:39
No roto mai i to tatou aamu
I te matahiti 1843, ua vahihia te mau melo o te Ekalesia i Navu Illinois i roto e maha paroita. I te ava‘e tiurai no taua matahiti ra, ua ma‘iti te feia faatere no te Sotaiete Tauturu i te hoê tomite hahaere e maha tuahine no te paroita tata‘itahi. Te mau hopoi‘a a te mau tomite hahaere o te hi‘opo‘araa ïa i te mau hinaaro e te ohiraa i te mau ô. E faaohipa te Sotaiete Tauturu i te reira mau ô no te tauturu i te feia nava‘i ore.4
Aita te mau tuahine hahaere e ohi faahou i te mau ô, e tape‘a noa râ ratou i te hopoi‘a no te hi‘oraa i te mau hinaaro pae varua e te pae tino, e na ratou atoa e imi i te rave‘a no te pahono i te reira mau hinaaro. Ua haamaramarama mai o Eliza R. Snow (1804–87), te piti o te peresideni rahi o te Sotaiete Tauturu: « . … A taparû i mua i te Atua e i te Varua Maitai no te farii i [te Varua] ia ti‘a ia outou ia farerei i taua varua e vai ra i roto i taua fare ra… e hinaaro paha outou i te parau i te mau parau no te hau e no te tamahanahanaraa, e mai te mea e ite outou i te hoê tuahine huru to‘eto‘e rii, a rave mai ia’na i ni‘a i to outou mafatu mai ta outou e na reira i te hoê tamarii rii i ni‘a i to outou ouma e a tamahanahana atu [ia’na].5
© 2012 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/11. Parau faati‘a no te iritiraa: 6/11. Iritiraa no Visiting Teaching Message, January 2012. Tahitian. 10361 895
Eaha ta’u e nehenehe e rave ?
-
Eaha ta’u e rave nei no te tauturu i to’u mau tuahine ia ite e, e hoa vau e te here nei e te mana‘ona‘o nei au ia ratou ?
-
Nahea vau ia riro ei taata maitai a‘e no te tia‘i e no te atuatu ia vetahi ê ?