Vakauqeti Ira me ra Dau Masu

Niu se gone lailai, erau vakavulici au mai na nodrau ivakaraitaki ena masu na noqu itubutubu. Au tekivuna ena noqu raitayaloyalotaka ena noqu vakasama na nona tu yawa tu na Tamada Vakalomalagi. Niu sa qase cake, sa veisau na veika au sotava ena masu. Na raitayaloyalo ena noqu vakasama sa yaco me dua na Tamada Vakalomalagi ka sa voleka sara ga mai, ka serauni tu ena dua na cina ramase, ia e kilai au vakavinaka sara.

A lako mai na veisau o ya ena noqu vakadeitaka na dina ni itukutuku a tukuna o Josefa Simici ena veika a sotava ena 1820 mai Manchester e Niu Yoka:

“Au sa raica kina e cake e dua na duru bukawaqa, donuya tiko na uluqu, ni sa lako sobu tiko mai ka serauni au; ni sa sivia sara na ramase ni matanisiga.

“Ena gauna ga sa rairai mai kina, au vakila sara ni sa tasere na qau ivesu. Ia ni sa mai toka e mataqu au sa qai raica e rua na Tamata, ia na kedrau iserau kei na iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A vosa vei au e dua vei rau, kaciva na yacaqu, dusi koya na kena ikarua ka kaya—Oqo na Noqu Gone ni Toko. Mo Rogoci Koya!” (Josefa Simici—Ai Tukutuku 1:16–17).

Ena siga totoka ni vulaitubutubu o ya a tu kina ena loma ni veikau na Tamada Vakalomalagi. A kacivi Josefa ena yacana. A qai vakaraitaka ni Nona “Gone ni Toko” na iVakabula kei Vuravura sa vakaturicake tale. Ena gauna cava ga kei na vanua cava ga o masu kina, e rawa me vakalougatataki iko na nomu vakadinadinataka na dina ni veika lagilagi a sotavi o ya.

Na Tamada eda masuta tiko sa ikoya na Kalou lagilagi ka a bulia na vuravura mai vua na Nona Gone ni Toko. E rogoca tu na noda masu me vaka ga Nona a rogoca na masu nei Josefa—na kena matata e vaka ga ni cabori tiko ena Nona iserau. Na levu ni Nona lomani keda sa solia kina o Koya na Luvena me noda iVakabula. Eda na rawa ni rawata na tawamate rawa kei na bula tawamudu mai na Nona isolisoli o ya. Ka solia vei keda o Koya, mai na masu ena yaca ni Luvena, na madigi me da veivosaki vata kei Koya vakawasoma ena bula oqo kevaka eda vinakata.

Sa tu na veivakabauti tabu vei ira na matabete ni Lotu i Jisu Karisito ni Yalododonu Edaidai “me dausikova na nodra vuvale na lewe ni lotu yadua, ka vakaroti ira me ra daumasu tiko ga, ena masu votu kei na masu vuni ” (V&V 20:47; vakaikuritaki).

E levu sara tu na sala me vakauqeti kina e dua me dau masu. Me kena ivakaraitaki, e rawa me da vakadinadinataka ni Kalou e sa vakaroti keda me da dau masu tiko ga, se e rawa me da vakamacalataka na kena ivakaraitaki mai na ivolanikalou vakakina na noda sotava na veivakalougatataki ka yaco mai ena masumasu ni vakavinakavinaka, vakamamasu, kei na vakatataro. Me vakaoqo, e rawa meu vakadinadinataka niu kila ni Tamada Vakalomalagi e dau sauma na masu. Au dau ciqoma na veidusimaki kei na vakacegu mai na veivosa e dau lako mai ena noqu vakasama, kau kila mai na Yalotabu ni veivosa o ya sa mai vua na Kalou.

Sa sotava oti na veika oqori na Parofita o Josefa Simici, ka rawa vakakina vei iko. A ciqoma na kena isau oqo ena masu mai vu ni yalona.

“Ia na luvequ, me vakacegu na yalomu; raica sa lekaleka wale ga na gauna ni nomu rarawa kei na vutugu;

“Ia kevaka ko sa vosota rawa, ena laveti iko cake na Kalou” (V&V 121:7–8).

Oqori na ivakatakila mai vua e dua na Tama dauloloma kivua e dua na luvena tagane yalodina e sotava tiko na dredre vakaitamera. E rawa vei ira yadua na luve ni Kalou me ra veitaratara vata kei Koya ena masu. Na vakilai ni loloma kei na rarama e yaco mai vei au me isau ni noqu masu ena yalomalumalumu e tarai au vakalevu cake sara mai na veivakauqeti ni masu.

Eda rawata e dua na ivakadinadina ni dua na ivakaro cava ga ni Kalou mai na kena taqomaki na ivakaro o ya (raica na Joni 7:17). E dina oqo ena ivakaro me da dau masu tiko ga ena masu votu kei na masu vuni. Me vaka niu nomu qasenivuli ka nomu itokani, au yalataka ni Kalou ena sauma nomu masu kei na kaukauwa ni Yalo Tabu o ya, e rawa kina mo kila vakataki iko ni kedra isau ni masu era sa mai Vua.