Kaumakiia Bwa A ana Tataro

Ngke I uarereke, a reireinai au karo n tataro n aia banna ni katooto. I moanna man iangoan Tamau are i Karawa n au iango ae raroanako. Ngke I a ikawai, ao au atatai n te tataro e a bitaki. Te tamnei n au iango e riki bwa teuana tamnein Tamara are i Karawa ae e kaan, ae e rabunaki n te oota ae e otamwaaka, ao ae e kinaai raoi.

E roko te bitaki anne ngke I karekea te kakoaua ae koaua bwa n ana ribooti Iotebwa Timiti iaon te bwai are e nooria n te 1820 i Manchester, New York, e boni koaua:

“I noora te oota iaon atuu, ae raka riki otana nakon otan taai, are e ruo ni karaurau nako aou.

“Ni waekoan kaotina ao I a kunea bwa I a kainaomataki iroun au kairiribai are e tauai Ngke e ruo te oota nako aou, ao I nooria uoman Aomata, are otaia ao mimitongia akea aron kabwarabwarakiia, a tei iaou iaon te eea. Temanna mai ibuakoia e taetae nakoiu, ni weteai n arau ao e taku, e kotea are temanna—Aio Natiu Ae Tangiraki. Ongo Irouna!” (Iotebwa Timiti—History 1:16–17.)

Tamara are i Karawa e mena n te buakonikai n tain te tiburing ae tikiraoi anne. E wetea Iotebwa n arana. Ao E kabwarabwara bwa te Tia Kamaiu are e a tia n uti bon “Natina Ae Tangiraki.” N te tai raa ke tabo raa ae ko tataro iai, am kakoaua ibukin koauan te atatai ae moan te kakukurei anne e na kona ni kakabaiako.

Te Tama ae ti tataro nakoina bon te Atua ae kakimwareirei ae karika te aonaaba rinanon Natina ae Tangiraki. E ongo ara tataro n aron are E ongo ana tataro Iotebwa—ni matata raoi n aron te tataro ake a tia n taekinaki I matana. E tangirira raoi ngaia are E anga Natina bwa ara Tia Kamaiu. Man te bwaintangira anne E kariaia bwa ti na kona ni karekea te maiu ae aki mamate ao ae akea tokina. Ao E anganiira, rinanon te tataro n aran Natina, ke n reitaki ma Ngaia inanon te maiu aei n aron are ti rineia.

Naake iai irouia te Nakoanibonga n Ana Ekaretia Iesu Kristo Ibukiia Aika Itiaki ni Boong Aika Kaitira iai irouia te onimakinaki ae tabu bwa ana kawarii aia auti membwa, ao ni kaumakiia n tataro ni bwanaia ao n ae onoti (taraa D&C 20:47; kabwarabwaraana).

A mwaiti kawai ake ti kona iai ni kaunga temanna bwa e na tataro. Te katoto, ti kona ni kakoaua bwa e a tia te Atua n tuangiira bwa ti na teimatoa n tataro, ke ti kona ni kabwarabwarai katoto man booki aika tabu ao man oin ara atatai n taian kakabwaia ake a reke man te tataro ni kakaitau, te bubuti, ao kaekaan am bubuti. Te katoto, I kona ni kakoaua bwa Tamara are i Karawa e kaekai ara tataro. I a tia ni karekei kaetieti ao karaunano man taeka ake a tia n reke n au iango, ao I ataia mairoun te Tamnei bwa bon taeka mairoun te Atua.

Iai iroun te Burabeti Iotebwa Timiti te aekan atatai anne, ao ngkoe ko kona naba. E karekea te kaeka aei man te tataro ae nako raoi man te nano:

E beritana te rau te Atua nakoina n tamneina ao e tuanga bwa ana kanganga ma karawawatakina a na riki n te tai ae uarereke.

E taku bwa ngkana e teimatoa nako iai, ao te Atua e na karietata riki (taraa D&C 121:7–8).

Anne bon te kaotioti mairoun te Tama ae Tangira nakon te nati ae kaitara ma kangaanga aika korakora. Ni kabane natin te Atua a kona n reitaki ma Ngaia n te tataro. Namakinan te tangira ao te kabebeteaki are e a tia n roko irou bwa te kaeka nakon au tataro n nanorinano e a tia n rangin ni korakora mwiina nakoiu nakon kaunganano n tataro tabeua.

Ti karekea te kakoaua nakon ana tua te Atua man kawakinan ana tua (taraa Ioane 7:17). Aio koauan te tua are ti na tataro ni bwanaara ao n te tabo ae onoti. Ngkai am tia reirei ao raoraom, I berita bwa e na kaekai ami tataro te Atua ao man mwaakan te Tamnei ae Raoiroi, ko na ataia bon iroum bwa te kaeka bon mai Irouna.