Liutaki tiko mai vua e dua na Parofita Bula

Ena noqu yabaki 16, au ciqoma na madigi meu tiko ena imatai ni gauna ena koniferedi raraba. E vakaitikotiko na noqu matavuvale ena ra kei Oregon, e Amerika, ka keitou draiva ki Utah me keitou tiko ena koniferedi ka vakasoburi tuakaqu tagane ena koronivuli ni kaulotu.

Au a gole ki na koniferedi ena gagadre meu vakatavulici mai vua na Yalo Tabu. Na ka e qai yaco, au a ciqoma e dua na ivakatakila mai vua na Yalotabu ka rairai a sega beka ni rawa meu ciqoma kevaka au a sega ni vakavakarautaki au.

Ena loma ni dua na iwasewase ni soqoni, era tucake taucoko na tamata ka lagata na serenilotu ni ivavakoso “Ni tuberi au Jiova.” Ni keimami sa lagasere tiko, a basika mai vei au na vakasama veivakurabuitaki meu raica wavoki na Vale ni Koniferedi. Au qai cakava ka lauti au na kaukauwa ena duavata ni udolu na tamata era tu e kea ena neimami kailavaka na vakavinavinaka kivua na Kalou.

Au a qai sotava na veika au vakila me vakataki Nifai ena nona a raica na raivotu ni vunikau ni bula, ni kaya vei au na Yalotabu, “Raica” (raica na 1 Nifai 11–14). Au raici Peresitedi Thomas S. Monson kau vakila ni tiko na duavata ena Lotu baleta ni da liutaki tiko mai vua e dua na parofita bula. Mai na ivakadinadina ni Yalo Tabu, au kila ni o Peresitedi Monson e parofita dina ni noda gauna, kau kila ni o Jisu Karisito e liutaka mai vua na Lotu oqo.