Na Cava na Vuna Eda Gadrevi Ira kina na Parofita?

E baleta ni Tamada Vakalomalagi e lomani ira na Luvena, e sega kina ni laivi ira o Koya me ra lakova na bula vakayago oqo me sega na ivakasala kei na veidusimaki. Na ivakavuvuli ni Tamada Vakalomalagi e sega ni vaka ga na kena ivakarau, tukuni taumada, vakatautauvatataki kei na dua na ivola e mamare na waqana ka rawa me tauri mai na sitoa vakaitaukei. Oqori na nona vuku e dua na Ka Bula vakaselesitieli ka tu vua na kaukauwa kecega, ka kila na ka kecega ka dau lomani ira na Luvena. Na Nona vosa e vakavolivolita na ka vuni uasivi duadua—ka sa idola ki na mamarau ena bula oqo kei na vuravura sa bera mai.

E vakaraitaka na Tamada Vakalomalagi na vosa vuni oqo kivei ira na Luvena e vuravura mai vei ira na Nona dauveiqaravi na parofita (raica na Emosi 3:7). Mai na gauna i Atama, a vosa na Kalou kivei ira na Luvena mai vei ira na vakailesilesi vakabete me ra vunautaka na Nona lewa ka vakasalataki ira eso tale. Era qasenivuli veivakauqeti na parofita ka ra ivakadinadina kilai tani i Jisu Karisito e veigauna kece ga (raica V&V 107:23). Era sega ni vosa walega kivei ira na tamata o ira na parofita ena nodra gauna, ia era vosa tale ga kivei ira na tamata ena veigauna kece. E tautauvata tu ga ena veigauna sa oti ka yacova mai oqo na nodra vosa me vaka e dua na veiyalayalati ena lewa ni Kalou kivei ira na Luvena.

E sega ni duidui na siga nikua mai na veiyabaki sa oti. E sega ni veisau na loloma ni Turaga vei ira na tamata ena gauna oqo mai na veigauna sa oti. E dua na itukutuku lagilagi ni Vakalesuimai ni Lotu i Jisu Karisito sa ikoya ni Kalou e tomana tiko ga Nona vosa kivei ira na Luvena. O Koya e sega ni vuni tiko mai lomalagi ia e vosa nikua me vaka ga Nona dau cakava ena veigauna sa oti.

E vuqa na ka e vakaraitaka na Turaga kivei ira Nona parofita ka sa kena inaki me taqomaka na noda rarawa baleti keda na tamata vakayadua kei na veitokani. Ni vosa na Kalou, e cakava o Koya me veivakatavulici, veiuqeti, veivakasavasavataki, ka vakasalataki ira na Luvena. Ena nodra vakalecalecava na tamata vakayadua kei na veitokani na ivakaro ni Tamada Vakalomalagi, era cakava tiko ena bolebole ni veivakatovolei, veivakararawataki, kei na cakacaka bibi.

Na Kalou e lomani ira kece na Luvena. Oqori na vuna e vakamamasu vakaukauwa kina o Koya vei keda mai vei ira na Nona parofita. Me vaka ga ni da vinakata na veika uasivi duadua me baleti ira na noda daulomani, e vinakata na Tamada Vakalomalagi na veika uasivi duadua me baleti keda. Sa ikoya oqori na vuna era sa rui bibi kina na Nona ivakaro ka vakatotolotaki ena so na gauna. Sa ikoya oqori na vuna e sega ni biuti keda tani kina o Koya nikua ia e tomana na vakaraitaki ni Nona lewa kivei keda mai vei ira na Nona parofita. Na noda ivotavota kei na ivotavota ni vuravura e vakatau ena noda vakarorogo ka vakamuria na vosa vakatakilai ni Kalou kivei ira na Luvena.

Na ivakaro taleitaki ni Kalou ki na itabatamata era kunei ena i Vola Tabu, Ai Vola i Momani, na Vunau kei na Veiyalayalati, kei na Mataniciva Talei. Me kena ikuri, na Turaga e vosa kivei keda mai vei ira na Nona dauveiqaravi, me vaka ni na vosa tale ga o Koya ena koniferedi raraba mai oqo.

Kivei ira kece era lomatarotarotaka tiko kevaka e rawa me yaco na ka oqo—era na taroga, “E rawa ni vosa vei keda nikua na Kalou?”—mai na vu ni yaloqu taucoko au sureti kemuni mo ni “lako mai mo raica” (Joni 1:46). Wilika na vosa ni Kalou e kunei ena ivolanikalou. Vakarorogo ki na koniferedi raraba vata kei na daliga e gadreva me rogoca na domo ni Kalou mai vei ira na Nona parofita ni yalododonu. Lako mai, rogoca, ka raica ena vu ni yalomu! Ia kevaka dou sa kerea “ena yalodina, ena lomamudou taucoko, ka vakabauta na Karisito, [na Kalou] ena vakatakila vei kemudou ko Koya ena kaukauwa ni Yalo Tabu ni sa dina” (Moronai 10:4). Mai na ivurevure ni kaukauwa oqo, au kila ni bula tiko o Jisu Karisito ka dusimaka na Nona Lotu vua e dua na parofita bula, o Peresitedi Thomas S. Monson.

Kemuni na taciqu kei na ganequ, na Kalou sa vosa vei keda nikua. Ka gadreva o Koya me ra rogoca ka talairawarawa ki na Nona vosa o ira kece na Luvena. Ena noda cakava oqo, na Turaga ena vakalougatataki keda ka vakadeitaki keda vakalevu sara, ena bula oqo kei na vuravura sa bera mai.