Pwata Ekkewe Soufos Mi Namwot Ngeni Kich

Pokiten Semach won Nang a tongei Noun kewe semerit, I ese nikitireno ne fefetan non ar rese angei emwen me aninis non ei manauen inis. Ekkewe afanafanen Semach won Nang resap usun ekkewe afanafanen aramas ran me ran, minne ka tongeni angei seni ekkewe sitowan puk. Ra uren ewe miritin ewe emon Re selestial mi unusen manaman, unusen tipachem mi tongei Noun kewe. Aponuen ewe kapas monomonen fansoun meinisin mi nom non Anon kewe—ewe kien pwapwa non ei manau me non ewe manau epwap feito.

Semach won Nang a pwarata ei mirit ngeni Noun kewe semerit won fonufan me ren Noun kewe chon angang ekkewe soufos (nengeni Amos 3:7). Seni ewe fansoun Atam, Kot a kapas ngeni Noun kewe semerit me ren chon oesini mi kefinita pwe ra wisen pwarata netipan me an aurour ngeni aramas. Ekkewe Soufos ir sense mi uren pwarata me ir chon pwaratan Jises Kraist mi auchea (nengeni D&C 107:23). Ekkewe soufos rese chok fos ngeni ekkewe aramasen pwisin ar fansoun, nge ra pwan kapas ngeni aramasen fansoun meinisin. Mongungur kewe mi chou fetan ngeni pinon aramas meinisin pwe eu pwaratan netipen Kot ngeni Noun kewe semerit.

Ikenai esap sokofesen seni fansoun noom. An ewe Samon tong ngeni ekkewe aramasen ikenai esap kukkun seni an tongei aramasen noom. Ewe poraus mi amwarar pwe Kot mi chuen kapas ngeni Noun kewe semerit ena eu porausen Niwinsefaniton ewe Mwichefenin Jises Kraist! I ese aopano me nang nge a fofos ikenai usun chok a fofos non fansoun noom.

Chommong met ewe Samon a pwarata ngeni Noun kewe soufos mi wisen epetti noninen seni emon me emon me seni kich meinisin usun eu mwichen aramas. Nupwen Kot a kapas, a kapas pwe epwe aiti, amwasanga, aochu, me esinesinna Noun kewe semerit. Nupwen emon me emon me unusen mwichen aramas ra amonugawa aurouren Semer won Nang, repwe fori non ar weri sosot, riaffou, me weires.

Kot a tongei Noun kewe semerit meinisin. Ena popun a fokkun pesei kich me ren Noun kewe soufos. Usun chok sia mochen met mi murrino faniten ekkewe sia tongei, Semach won Nang a mochen met mi murrino fanitach. Ena popun An kewe annuk mi fokkun namwot me fan ekkoch mi wesewesen auchea. Ena popun I ese nikitikicheno ikenai nge a fen sopweino ne pwarata Netipan ngeni kich me ren Noun kewe soufos. Feiochuch me feiochun ach fonufan mi anongonong won ach rongorong me apwonueta ewe kapasen Kot mi pwarata ngeni Noun kewe semerit.

An Kot aurour sise tongeni awewe ukkukun auchean ngeni aramas meinisin mi nom non ewe Paipen, ewe Puken Mormon, ekkewe Annuk me Pwon, me ewe Faw mi Auchea. Ewe Samon a pwan fos ngeni kich me ren Noun kewe chon angang, usun epwe for sefan non feiton ewe mwichenapen mwichefen.

Ngeni meinisin ekkewe ra ekieki ika ei sokkun mi tongeni fis—meni repwe kapaseis, “Mi tuffich pwe Kot a kapas ngeni kich ikenai?”—ren unusen netipei uwa etiwa kemi ami oupwe pwisin “feito o nengeni” (John 1:46). Anneani ewe kapasen Kot usun met mi nom non ekkewe pukfel. Ausening ngeni mwichenapen mwichefen ren seningemi mi mochen rongorong ewe mongungun Kot ngeni kich me ren Noun kewe Soufos non fansoun soponon. Oune feito, rongorong, me nengeni ren netipemi! Pwe ika oua resin kutta “ren ennetin netipemi ren ami mochen sinei, fiti am nuku non Kraist, [Kot] epwe pwar ngenikemi ennetin pungun ekkei mettoch, ren ewe manamanen Ngun mi Fel” (Moroni 10:4). Seni me ren ei manaman, ua sinei pwe Jises Kraist mi manau me a emweni An we Mwichefen me ren emon soufos mi manau, ewer pwe Preseten Thomas S. Monson.

Pwi me fefinei kana, Kot mi fos ngeni kich ikenai. Me A anean pwe meinisin Noun kewe semerit repwe ausening ngeni me apwonueta Anon. Non ach fori iei usun, ewe Samon epwe fokkun efeiochu me apochokuna kich, non ei manau me pwan non ekkewe fonufan repwap feito.