Dahme Kitail Anahnehki Soukohp Akan?

Pwehki Sahm Nanleng eh ketin poakohng Sapwellime serihkan, E sohte ketkihdi irail en weid nan mour wet en pohn sampah ni eh sohte ketikihieng irail kaweid oh utuht. Padahk kan en Samatail Nanleng kaidehn kaweid mwahl kei, me ke kak mengei en kasik, soahng me ke kak alehda nan kisin pwuhk sohte lipilipil nan sidohwahn pwuhk. Sapwellime padahk kan iei eripit en Kahlap sarawi, wasa lapalahpie, me mwahngih mehkoaros oh poakohng Sapwellime serihkan. Nan Sapwellime mahsen iei me rir me aramas kin rapahki nan mwehi kan koaros kohkohdo—kih en peren nan mour wet oh nan mour me pahn kohdo ehu rahn.

Sahm Nanleng kin ketin kapwarehda eripit wet ong Sapwellime serihkan pohn sampah sang rehn Sapwellime ladu kan soukohp akan (tehk Eimwos 3:7). Sangete nan mwehi en Adam, Koht kin ketin mahsenohng Sapwellime serihkan sang ohl sarawi kan me kin idihdida pwehn kasalehda Kupwure oh sapwellime kaweid ong mehteikan. Soukohp akan iei sounpadahk kei me kin alehdi kamarain me kin ansou koaros wia sounkadehde tohrohr en Sises Krais (tehk D&C 107:23). Soukohp akan sohte kin mahsen ohngete aramas akan en arail mwehi, re pil kin mahsen ong aramas nan mwehi koaros. Ngilarail kan kin peido dadaur sounpar akan kohkohdo ni duwen kadehdehpen kupwuren Koht ong Sapwellime serihkan.

Rahn wet sohte weksang mwehi kan en kawao. Kauno sohte ketin poakohng aramas en atail mwehi tikitiksang irail akan en mwehi kan en kawao. Ehu padahk kaselel me pid Kopwurupwurdohn Mwomwohdiso en Sises Krais iei me Koht wie mahmahsente ong Sapwellime serihkan! E sohte ekiekla nan lahng kan ahpw kin mahsen rahn wet duwehte me E ketin wia nan rahn akan en kawao.

Palilaud en dahme Kauno kin ketin kasalehiong Sapwellime soukohp akan iei en doareikitailsang pahtou ni duwen aramas oh ni duwen wehi. Ni ansou me Koht kin ketin mahsen, E kin mahsen pwehn padahkih, kamarainih, kamwahuih, oh doarehla Sapwellime serihkan. Ni ansou me aramas akan oh wehi kan kin soikala kaweid kan en Samarail Nanleng, irail kin wia ni arail kakete alehdi kasongosong, lokolok, oh doadoahk mwahl.

Koht ketin poakoahng Sapwellime serihkan koaros. Ih me kahrehda E kin mahsen ni ngidingid ong kitail sang Sapwellime soukohp akan. Duwehte atail kin inangih me keieu mwahu ong kompoakapahtail kan, Sahm Nanleng pil ketin kupwurki me keieu mwahu ong kitail. Ihme kahrehda Sapwellime kaweid kan ahr inenen kesempwal oh kin ekei pak karuwaru. Ihme kahrehda E sohte likidmelieikitailla rahn wet ahpw kin doulahte kapwkapwarehda Kupwure ong kitail sang Sapwellime soukohp akan. Imwilahn kitail oh imwilahn atail sampah mwotousang atail pahn rong oh idawehn mahsen kasansalda kan en Koht ong Sapwellime serihkan.

Sapwellimen Koht kaweid kesempwal me sohte kak pweipweida kin dierek nan Pwuhk Sarawi, Pwuken Mormon, Doctrine and Covenants, oh nan Pearl of Great Price. Me patehng met, Kauno kin ketin mahsen ong kitail sang Sapwellime ladu kan, ni duwen me E pahn pwurehng wia ni tiepene lap me kohkohdo.

Ong koaros me kin medewe ma soahng wet kak wiawi—me mwein pahn peidek, “Mehlel me Koht kak mahsen ong kitail rahn wet?”—sang nan mohngiongi unsek I lukeikumwail en “kohdo oh kilang” (Sohn 1:46). Wadek mahsen en Koht ni duwen me dierek nan pwuhk sarawi kan. Ni ansoun tiepene lap rongki saleng me inangih rong mahsen en Koht me kin kohsang Sapwellime soukohp en imwin-rahn akan. Kohdo, rong, oh kilangki mohngiongumw! Pwe ma komw pahn rapahki “ni mohngiong mehlel, ni ineng mehlel, sang ni amwail pwoson Christ, [Koht] pahn ketin kasalehiong kumwail mehlelo, sang ni manaman en Ngehn Sarawi” (Moroni 10:4). Pwehki manaman wet oh sang manaman wet, I ese me Sises Krais ketin ieias oh kawkaweid Sapwellime Mwomwohdiso sang rehn soukohp ieias, me iei President Thomas S. Monson.

Riei ohl oh lih akan, Koht kin ketin mahsen ong kitail rahn wet. Oh E ketin kupwurki me koaros Sapwellime serihkan en rong oh idawehn Kapitie. Ni atail pahn wia met, Kauno pahn kapaikitailda oh utungkitailda, koaros nan mour wet oh nan sampah kan me kohkohdo.