2012
Nei Lih Akan nan Ahi Wehi
March 2012

Iren Mahsen en Padahk en Pas, Mahs 2012

Nei Lih Akan nan Ahi Wehi

Onopiki iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.

Pwoson, Peneinei, Sawas

Kitail wia sapwellimen Samatail Nanleng lih akan. E ketin mwahngih kitail, poakohng kitail, oh sapwellimaniki koasoandi ieu ong kitail. Kisehn koasoandi wet iei en kohdo pohn sampah pwehn esehla pilada me mwahu sang me suwed. Ni atail kin pilada en kolokol kosonned akan en Koht, kitail kin wauneki Ih oh pohnese atail wia sapwellimen Koht lih akan. Pwihn en Sawas en Lih kin seweseikitail taman sohso sarawi wet.

Pwihn en Sawas en Lih oh poadepe kin kakehlailih oh utung kitail. Julie B. Beck, president lap en Pwihn en Sawas en Lih mahsanih: “Ni duwen sapwellimen Koht lih akan, kumwail kaukaunop ong koasoandi poatoapoat kan, oh emenemen kumwail ahniki sohso, mwohmw, oh pwukoa en lih. Pweidahn peneinei kan, wehi kan, Mwomwohdiso wet, oh koasoandi keneinei en komour kin pahsan amwail loaloapwoat. … [Samatail Nanleng] koasoanehdi Pwihn en Sawas en Lih pwehn sewese kairada Sapwellime aramas oh kaunop irail ong kapai kan en tehnpas sarawio. E ketin kauwada [Pwihn en Sawas en Lih] pwehn kainene Sapwellime lih akan ong Sapwellime doadoahk oh alehda arail sawas ong kauwada Sapwellime wehi oh kakehlailih ihmw akan nan Saion.”1

Samatail Nanleng ketikihiengkitailehr pwukoa tohrohr en sewese kairada Sapwellime Wehi. E pil ketikihiengkitailehr kisakis kan en pali ngehn me kitail anahne pwehn kapwaiada doadoahk tohrohr wet. Sang Pwihn en Sawas en Lih, kitail ahniki ansou mwahu kan en doadoahngki atail kisakis kan pwehn kakehlailih peneinei kan, sewese irail me anahne sawas, oh esehla duwen momour ni duwen tohnpadahk kan en Sises Krais.

President Dieter F. Uchtdorf, Sounsawas Keriau nan Presidensi Keieu, mahsanih met me pid mour en tohnpadahk: “Sang ni alialu ni kanengamah pohn ahl en mour en tohnpadahk, kitail kin kasalehiong pein kitail uwen atail pwoson oh atail ngoang en alehda kupwuren Koht ah kaidehn pein nsenatail.”2

Kitail en tamataman me kitail iei sapwellimen Koht lih akan oh nantiong en mour ni duwen Sapwellime tohnpadahk kan. Ni atail pahn wia met, kitail pahn sewese kairada sapwellimen Koht wehi pohn sampah oh warohngala en pwurala pato pahn Kupwure.

Sang Pwuhk Sarawi Kan

Sekaraia 2:10; Doctrine and Covenants 25:1, 10, 16; 138:38–39, 56; “Peneinei: Kalohk Ehu ong Sampah” (Liahona oh Ensign, Nohpempe 2010, 129)

Sang Atail Poadoapoad

Ni Epreil 28, 1842, Soukohp Joseph Smith mahsanihong lih akan en Pwihn en Sawas en Lih: “Kumwail mihier nan irair me kumwail kak mwekid ni pahsan limpoak me Koht ketikihieng [loalamwail]. … Ma kumwail pahn kapahrekih amwail mour ong amwail kapai kan, tohnleng kan sohte pahn kak irairdihsang ren wia iengomwail.”3

Ni eh wehwehki manaman me Pwihn en Sawas en Lih ahniki en papah mehteikan oh sewese emenemen aramas kakehlailih pwoson, Zina D. H. Young, kesilimen en president lap en Pwihn en Sawas en Lih, inoukihieng lih akan nan 1893, “Ma kumwail pahn kilenglong loal nan pein mohngiongumwail kan kumwail pahn diar, sang ni sawas en Ngehn en Kauno, takai kesempwal me sohte kak pweipweida, kadehde en doadoahk wet.”4

© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen Visiting Teaching Message, March 2012. Pohnpeian. 10363 885

Iren sawas akan

  1. Julie B. Beck, “‘Daughters in My Kingdom’: The History and Work of Relief Society,” Liahona, Nohpempe 2010, 112, 114.

  2. Dieter F. Uchtdorf, “The Way of the Disciple,” Liahona, Mei 2009, 76.

  3. Joseph Smith, nan History of the Church, 4:605.

  4. Zina D. H. Young, “How I Gained My Testimony of the Truth,” Young Woman’s Journal, Epreil 1893, 319.

Dahme I Kak Wia?

  1. Ia duwen ahi kak sewese riei lih akan keirda ni uwen arail kak ni duwen sapwellimen Koht lih akan?

  2. Ia duwen ahi kak doadoahngki nan pein ahi mour kosonned oh kaweid me kin kohieng lih akan nan Doctrine and Covenants 25?