Iango n Bootakin te Utu
Rongorongo aikai iai inanona rongorongo ao waaki ni kakukurei ake a kona ni kabongnaaki ibukin bootakin te utu n te tairiki. Aikai uoua katooto.
“Kakabwaia n te Tieminari,” iteraniba 20: Manga rinanon te karaki imwain te tai ao ni baireia bwa ko na kanga ni karaoa e rongorongo n te aro ae tamaroa nakoia am utu. Ngkana iai kairake aika tebwitabun te ririki n te tieminarii, waaki man anganiia te titiraki bwa bukin tera e kakaawaki te tieminarii ibukiia. Imwiina wareka te mwakoro are e kangai taekana “Karekean Kakabwaia aika taekinaki n te Berita.” Kaungaia ataei aika uarereke bwa a na tauraoi n ira te tieminarii ngkana a ikawai. Ngkana akea kairake ake a roro n te tieminarii, ko kona ni wareka te rongorongo ao imwiina ko maroroakina kakaawakin te tieminariii nakoia kairake ni boong aikai.
“Aomata ni Kabane a Kinaa Bleck,” iteraniba 42: Iangoia n anenea “Do What Is Right” (Hymns, no. 237) bwa te anene ni kaukuuki. Wareka ao karakinna ni kakimototoa rongorongon Bleck. Tuangiia kain am utu bwa a na tibwa aia namakin ngke a na karaoa te babaire ae rawawata imarenan kawai aika kakaokoro ao tera ae a karekea mai imwiin aia babaire are a karaoia. Kainiin man warekan ana marooro Beretitenti Thomas S. Monson.
Bebete, Rau, man Aki Kai Mwanuokinaki
Bon bootakin te utu ae e aki kona ni mwanuokinaki ma natira aine aika uoman, Angélique, ana ririki 6, ao Béthanie, ana ririki 4. Ngai ma kainnabau ti uaia ni bwaka iaon ara kaintekateka, kua ao n aki ataia bwa ti na waaki mai ia. Ngaia are natira aine a tabenna ao a raira te wiira n tibwangan bootakin te utu n anganiira n tatabemaniira nakoara. Nakoan kainnabau e na kaira te waaki, Béthanie e reke irouna te anene, Ngai te waaki ni kakukurei, ao Angélique e na anga te reirei.
Béthanie e rinea “I Love to See the Temple” (Children’s Songbook, 95), ao ti bane n aneneia. Baba e anga te tataro ni kainiin. Imwiina Angélique e anaa te beebwa ae tibwa otinako man te Liahona ao e rinea te karaki man aia tiekition ataei. E reireinna ni wareware n ana reirei, ngaia are e wareka te karaki nakoira. Te namakin ni mweengara bon ti teuana ae te rau. Te tamnei e kakoaua bwa te bwai are e warekia e bon koaua.
Ti karaoi takakaro tabeua n ikotaki, ao I anga te tataro ni kainiin. Ngke I tabe n tataro, I aki kona n taua au karabwarabwa nakon te Tamara are i Karawa ibukin Tamneina ao ana tangira ao ibukin naba kakabwaiakin mweengara n tamnei aika uarereke aikai. Ngai ma kainnabau ti ataia bwa tibwangara bon tararuakiia ao reireinakiia taekan te euangkerio. Karaoan bootakin te utu bon mwakoron naba te tibwanga anne.
Sylvie Poussin, Réunion