Nukunapan Om Ammonata ren eu Misin

Preseten Uchtdorf a apasa ngeni ekkewe misineri pwe repwe ekieki pwe ra nom nukunapen nepoputan me nesopononun ar we misin. Ka pwan tongeni aea ei sokkun ekiek non om ammonata ren om misin: ina mo ika a 12 ierum ika 18 ierum, ka tongeni ammonata pwe kopwe fori angangen misineri.

Met sokkun mettoch ka tongeni fori “nukunapan” om ammonata ngeni angangen misineri?

• Fansoun meinisin kopwe nimenimoch pwe kopwe tongeni fiti ewe tempel.

• Kaeo pwe kopwe esinna memef seni ewe Ngun mi Fel ren om kopwe makkei me fori om kewe memef.

• Iotek fan iten ekkewe misineri.

• Kapas eis ngeni ekkewe misineri non neniom we ifan ar pesepes ngonuk ren om ammonata ngeni angangen misineri.

• Kaeo pwe kopwe tongeni angangoch ne kinikin fesen om fansoun, me fiti mokutukut me angangen aninis, kaeo pukfel, me makketiw mettoch non om pwisin puken chechemeni.

• Nupwen ka fos ngeni chon om famini, kopwe poraus ngenir usun eu wokisin a apochokunok non pekin ngun. Awewe ngenir met ka ekiek usun ewe wokisin.

• Kapas eis ngeni chienom kewe usun ar kewe namanam me met ra nuku. Kopwe aporausa met ka nuku. Etiwa ir ngeni eu mokutukuten ewe mwichefen.

Nupwen ka esinna pwe ka nom nukunapen om ammonata ngeni angangen misineri, ka tongeni manau ngeni eu manauen nimenimoch pwe ewe Samon epwe nuku wom me ewe Ngun mi Fel epwe nom reom.