Bwabiriki Abeeati Reitakin te Ekaretia ma Kaain te Kawa

Tii 65 te maire (105 km) mai Topeka, n te Lenexa Kansas Titeiki, Beretitenti Bruce F. Priday, beretitenti n te titeiki, ao Titita Carol Deshler, tarekita n te titeiki bwabiriki abeeati, a ikotaki ni mwakuri ni katea te reitaki ae tamaroa ma membwa ake iai nakoaia n aia komiunitee. A tangiria ni buokiia ni kinaia Aomata aika a Itiaki ni Boong aika Kaitira bwa “te rao ae tamaroa, ni karekea te reitaki ae tamaroa n te komiunitee, ao n toua mwiin Iesu Kristo,” e taku Beretitenti Priday.

Titia Deshler, are e mwakuri ma te titeiki beretitentii ao membwa tabeman n te titeiki kauntira n te bwabiriki abeeati, e kakaai anga n reitaki ma kurubu ake a kakaonimaki ao botaki ni botannaomata ni katamaroai riki buokaia kaain te aba n aia aono.

“E kaniia ni kabane ara tokanikai ni mwakuri ma kurubu n te komiunitee e reke man te reitaki ma temanna ma temanna,” E taku Titita Deshler. Te katooto, te membwa n te ekaretia teuana ao te membwa n ana titeiki a uaia ni katawanou ao ni maroroakin kawai ake a kona ni karaoi kurubu aika uoua aika tamaroa nakon te komiunitee. Te marooro e reitiia nakon onoman aomata—teniman man aro aika kakaokoro—ni karekea te “Reitaki ae Tamaroa” komiunitee ni kareke iango ibukin te reitaki.

Te reitaki anne e kairi nakon te karikirake ni karekemwane n te kaotioti 2010 ike a iria kuaea man aaro aika bati. Te kanrin iai bon te baeki n amwarake, ake a reke iai kanaia kaain te tabo ake a kainano are e aki kabooaki. Te aomata ae 700 man te komiunitee a ira te waaki, are e karaoaki n te tienta ae tibwa tia n te titeiki. Te butimwaai e baireaki n te aro are komiunitee ao taan kairiiri n aro a kona n inoono imwain te kaotioti.

Imwiin te kaotioti, aua riki ekaretia, uoman membwa n te kauntira n te kaawa, ao te mataniwi ni bureitiman e bubuti bwa e na roko n te komete n te Reitaki ae Tamaroa are e a bobowi ngkai ni katoa namwakaina. Te kaotioti e karaoaki riki n 2011, n te tai anne iroun te ekaretia teuana are kairia, ni bootan te ekaretia ae itiua are a iria, ao ni kaniia te mwaiti 1,000 membwa n te komiunitee are a iria.

“Te namakin ae tamaroa ao te katiteuanaaki n iriira Iesu Kristo e roko rinanon te kawai ae korakora imarenaia ekaretia nako,” Titita Deshler e taku. Namakin akanne bon kakoauana ngke Beretitenti Priday e mena n te marae ni wanikiba ae raka iaon, 1,000 te maire (1,600 km) man mweengana. Te aine ae tuai ni kaitibo ma ngaia mai imwaina e kawaria man taku bwa e kina man te kamataku ae te Reitaki ae Tamaroa, are e iria ao e kunea bwa e rangi n tamaroa.

E tuangnga, “I tuai man namakina te tangira nakoia tabeman n te komiunitee n are I a tia n namakinna inanon waaki akanne. Ko rabwa ibukin mwanenakin taian kamataku akanne. I kaaina te bootaki teuana, ma e bon nano ara karinerine ao ara kakaitau ibukiia Aomata aika itiaki n Ana Ekaretia Iesu Kristo ni Boong Aika Kaitira.”

“Anne,” e taku Beretitenti Priday, “bon bukin tein te bwabiriki abeeati. Ngkai ti kakaai riki kawai aika a boou ni kakoroa bukin ara iango, ti karekeia riki raraora aika kakaawaki aika a mwaiti rinanon ni kabane kominite. Iai ara karinerine n iraorao imarenara n ara koaua ao te tangira ae koaua imarenara.”

Karekean te reitaki ao te karinerine mai irouia taan kairiiri n te kominite e a tia ni kakoaua nakoraoina naba i Europe Maeao. Katia Serdyuk, te tarekita n te kareke rongorongo n ana kauntira te bwaburiki abeati, mwakuri ma te mitinare n te bwaburiki abeati ao taan kairiiri n te aono ni katamaroa n reitaki imarenan te Ekaretia ao te komiunitee man mwakuri ma aomata ke bootaki ake a korakora mwaakaia ni bita aika iango te botannaomata, te kareke rongorongo, ao te botannaomata. Korakoran ana tokanikai te bwaburiki abeati e karika te otabwanin are aia bitaki aomata a kona ni buoka te Ekaretia ni karekea te kantaninga are e na buokiia ni karokoia n aia kouru naba.”

I Zhytomyr, Ukraine, membwa n te Ekaretia a iri n te botaki are e karaoia te meia n te kaaawa, Olexander Mikolayovich Bochkovskiy, ni kina ana karikirake te Ekaretia ae te iumanitarian are e katauraoi mwaitin bwaai aika a kainnanoaki nakoia reirei aika itiua ni kabuta te kaawa. Are e kinaaki naba te mwakuri n ibuobuoki irouia membwa n te Ekaretia n ana Bwaake te kaawa ae Gagarin, are e karaoki n Eberi ao Okitobwa 2011. Ana beretitenti te mwaanga ae Zhytomyr Alexander Davydov e tei ibukin te Ekaretia ao ni butimwaea ana kakaitau te kaawa.

N reitaki ma te kareke rongorongo ao te reitaki ma te kominite, tibwangan teuana te bwabiriki abeeati e reke man bairean ao karaoan waaki, e taku Daniel ao Rebecca Mehr, are e a tibwa bane ana tai n te mition n te aono ae te Caribbean.

“Korean araia membwa bwa a na reireiniia raraoia rinanon waaki ake a irekereke ma te koaua ae tabangaki, n aron waaki aika a kinaaki n te katei, te katairiki, te mwakuri n ibuobuoki, ke waaki ni kakukurei riki tabeua, a kona n rangi n tamaroa ibukin karekean te reitaki,” e taku Titita Mehr.

E ngae n anne, Tari Mehr e kauring bwa teuana ana kairua te tia rabakau n te bwariki abeeati ae e rangi ni bubura are e kona ni karaoia bon bairean waaki ni kakukurei n aki reitaki ma te kominite ni karekei kainnanoia ao n aki reitaki ma taan kairiiri n te nakoanibonga.”

Unimwaane ao Titita Mehr a kakoaua bwa te babaire ni katoa ririki are e karaoaki man te titeiki ao uoote ao aia kaetieti taan kairiiri n te nakoanibonga bon teuana te kawai ni buoka kairan te waaki mai moana. Ni katea te baire ae tau ni katoa ririki, Titita Mehr e tua bwa karaoan waaki ae reitaki ni kabonganai aua mwaneka ni karaoan te baaire are e boboto iaon iango ake a baireaki ao e kabaeaki ma kainnanon te komiunitee ao ana kantaninga te nakoanibonga n te tabo.

• Baikara kainnano aika korakora n ara komiunitee?

• Tera bwaai aika riki n ara aono are e roota rikiraken te Ekaretia, ae tamaroa ke ae aki tamaroa?

• Antai taan kairiiri n te komiunitee are ti kona n reitaki ma ngaia ni kaekai kainnano ao ni katoki kangaanga?

• Ti na kanga ni waakini ke n reita te iraorao ma taan kairiiri aikai?

Ma titiraki aikai ni kaekaaki, taan kairiiri n te nakoanibonga ao kauntira n te bwabiriki abeeati a kona n totokoi karaoan “waaki ni kakukurei ibukin tangiran waaki ni kakukurei,” Titita Mehr e taku. N onea mwiina te kauntira e kona ni baireia ao ni karaoi waaki ake a na karekea te onimakinaki imarenan te komiunitee ao taan kairiiri n te nakoanibonga. Waaki aikai a anganiia naba membwa n te Ekaretia ao membwa n te komiunitee te tai n itaramata ao ni karikirakea te iraorao.

N te Dominican Republic inanon 2010, ibukin te katooto, taan kairiiri n te nakoanibonga, kauntira n te bwabiriki abeeati, ao membwa n te kominite a ikotaki ni mwakuri inanon te mwakuri are e kamaatatai ana waaki te Moomon ae Baai n Ibuobuoki. Tari ao Titita Mehr a kaoi tabeman ana taan kairiiri n te aba ake a tia ni mwakuri ma ngaiia.

“Mwaitiia aomata aika a kakaawaki ake a tei man tabo ni mwakuri aika a mwaiti ao bootaki a iri,” Tari Mehr e kauringii, n ikotia ma te Beretitentii n te Aono n te Ekaretia are e roko naba.

“E bon rangi n nakoraoi te waaki,” e ribooti. “E a rawata ao e a rawata riki, ake ti kinaia meia ao botaki n te kaawa a bubuti ara ibuobuoki ibukin te kaitiaki. N ikotaki ma anne, iai katerean te Ekaretia ae e tamaroa nakoia bootaki aika a mwaiti.”

Ni kairakin ana kaetieti te nakoanibonga e bon rangi ni kakaawaki ibukin bairean te waaki bwa e na nakoraoi, bon tiaki ti teuana te iango ae karaoaki. Kathy Marler are e beku bwa te kauntira n te bwabiriki abeeati n titeiki aika a mwaiti i San Diego, California, USA. Temanna raraona man te aro teuana e taku bwa Aomata aika Itiaki ni Boong Aika Kaitira a rangi ni mwaatai ni kaowakiia tabeman nakon waaki ni kakukurei ake a mwanenaki man te Ekaretia ma aki toki ni bwaka n reitaki ma tabeman man waaki n ekaretia ake tabeua.

Titita Marler e kauringa raraona ngke e kangai, “Ko ti tuangiia tabeman bwa a na roko. E na rangi n tamaroa ngkana ko butiira ngkana ti kona n ibuobuoki. Te kaeka e na bon matoa eng.”

Man ataakin kainnanoia tabeman, e taku Titita Marler, te kauntira n te bwabiriki abeeati e kona n ibuobuoki n tabetai riki nakon are a na kona ni karaoa te waaki ibon irouia.

E ngae ngke mwaitin ana mwakuri te bwabiriki abeeati e riki ni baika a riki ni maiun te botannaomata ni katoabong, e kona naba ni buoka katauraoan te titeiki, aba, ke te Ekaretia n te aono ni kaitara ma bwaai aika karina, n aron are e riki n te ririki ae e nako i Tiabaan.

Bitiobi Gary E. Stevenson ngke te Bitiobi n Tararua ngaia, te Beretitenti n te Aono Meang n Asia e uringa aron te mwaiei are e bita tein te kareke rongorongo n 2011 n te tai ae waekoa.

Bitiobi Stevenson e taekinna bwa te kabuanibwai e karika te “ingaingannano ae korakora ni kan atatai” ni bwaai n ibuobuoki ao waaki n anganano are e nako nakon Tiabaan, n ikotaki ma ake e anga te Ekaretia.

Inanon bongin te tsunami, te Ekaretia e waaki ni karekei kainnano nakoia membwa ake a rootaki n te kaangaanga ao aroia naba ake tiaki membwa. “Kanakobwanaa man te aba ao te aonaaba a waaki ni katoa rongorongo.” e taku Bitiobi Stevenson.

Ma te Ekaretia are e anga ae raka iaon 250 te tan bwaai n ibuobuoki ao n ikotaki ma te ibuobuoki irouia taan anganano ae e raka iaon 24,000 ake a anga 180,000 aoa n ibuobuoki, te mwakuri n ibuobuoki e katika nanoia taan kairiiri n te tautaeka, e kauringnga Bitiobi Stevenson. N aba ake a kee iaan uoua te betienti man mwaitin te botannaomata are e kinaaki bwa Kiritian, tabeman taan kairiiri akanne a tangiria n kan ata riki taekan ana mwakuri n ibuobuoki te Ekaretia n te waaki. Te kan atatai anne, e taku, e karekea ana tai te tia rabakau n te bwabiriki abeeati tiaki ti n ibuobuoki nakoia ake a rangi ni kainanoa buokaia ma ni katabwanina ataakina n te tai ae ti teuana. Te katooto, te wiiki imwiin orean Tiabaan n te tsunami, temanna te tia koro ribooti e koreia: “Te mwakuri ae rianako n ana waaki te Ekaretia ae te Moomon ni karokoa te rongorongo bon ana konabwai ni kaitara ma bwaai aika a karina. … Te ekaretia e aki tii tabe ma oin ana nanai n tiibu.”¹

Te rongorongo ae tamaroa aio e riki ibukin ririki ni katean te reitaki. Conan ao Cindy Grames, are a waaki n riki bwa taan tei ibukin te bwabiriki abeeati ibukin Aonon Atia mai Meang inanon Aokati 2010, a taekinna bwa “te kauntira n te bwabiriki abeeati i Japan a tia ni mwakuri korakora ma taan kairiiri are iai te mwaaka irouia n te tautaeka ni kabuta te aba. Te iraorao aei e kauki aia mataroa bootaki nako n te aba, ake a tauraoi ni butimwaai ara ibuobuoki.” Unimwaane Yasao Niiyama, ngaia ma buuna aika tarekita n te kauntira n te bwabiriki abeeati n te Ekaretia i Tiabaan, e katerea bwa “taan kairiiri n ana tautaeka Tiabaan a ata aron nakoraoin te Ekaretia ao waekoara n kerakei ni katauraoi mwakuri ni kamaiu.”

Te katooto ngke taan kairiiri aika I-Tiabaan a kaitaua ana ibuobuoki te Ekaretia are roko iaon te tai ngke taan kairiiri n te nakoanibonga a katauraoa te katantan ibukiia taan taenikai ake a taonaki ake a kateaki n te reirei n taabo aika a tionako. N ikotaki ma te kauntira n te bwabiriki abeeati ao te manatia n te warebea n te Ekaretia n te tabo, taan kairiiri n te nakoanibonga ake a bairei amwarake ao bwaai n ibuoboki tabeua ake a nikiraki nakon taabo ni katantan, are e kataniia 270 aomata ake akea mweengaia man te tsunami.

E ngae ngke naake a mena n auti ni katantan akanne a bon mimii ni karekean te buoka man te aro ni Kiritian, te kauatai taan anganano ni Baai n Ibuobuoki man te Moomon a roko, ni kabonganai rabunan aon aia kunnikai ae baboboo, temanna te ataei e takarua, “Ae a roko! Ai tera ngkanne ae a uotia n te tai aei!”

Imwiin karekean anganano, te kouoteneita n auti e tuanga Unimwaane ao Titita Grames, “Ami Ekaretia e uotii nakoira te moan irikomaiu ao uanikai aika boou are ti karekea imwiin te mwaiei.”

“Te namakin ae tamaroa,” e taku Titita Grames, “n riki bwa te bai n ibuobuoki tiaki ti ni katantan ma nakoia naba taan kairiiri n te nakoanibonga ake a kabanea aia kona n roko irouia ake a kainnano.”

Unimwaane Niiyama e kabwarabwaraa teuana mwiin ana ibuobuoki te kauntira ae tamaroa: “Ti kunea bwa tibwauaan rongorongon ana mwakuri n ibuobuoki te Ekaretia ma membwa ao taan kairiiri itinaniku e bon rangi ni boongana nakon ana kantaninga te bwabiriki abeeati . I namakinna bwa aomata itinanikun te Ekaretia ngkai a tamaroa riki aia taratara n te Ekaretia ao membwa a mwengaroi ni korakoran te Ekaretia i Tiabaan.”

N te mwakoro ae moan te kakaawaki ni bootakin te aonaaba, taan kairiiri n te nakoanibonga a kona ni kabwaia man ana kauntira te bwabiriki abeeati are e ata te enuwaromenta n te tabo ao a kona n ibuobuoki nakon kainnanoia te botannaomata. Titita Serdyuk, i Ukraine, titeiki, “E bon kakukurei aron noorakiia taan kairiiri n te nakoanibonga ni kabongana te bwabiriki abeeati bwa te bwai ni mwakuri ni kakoroan ana kantaninga te nakoanibonga. Te katooto teuana bon karaoan te mwakuri n ibuobuoki rinanon ana mwakuri Baai n Ibuobuoki n te Moomon, are e karekea te katiteuanaaki irouia membwa n te mwaanga ao uoote ao e a tia naba ni buoka katean te reitaki ae kaan imarenan te Ekaretia ao te botannaomata.”