Ko e Ako ke Laukongá

ʻI hoku taʻu onó, ne u faingataʻaʻia he ako ke poto he laukongá. Ne talamai heʻeku faiakó ʻoku fie maʻu ke u toe nofo pē he kalasi tahá. Ne fuʻu hohaʻa ʻeku tangataʻeikí heʻene fanongo ki he meʻá ni. Naʻá ne tokoni mai ke ma laukonga he pō kotoa hili e maʻu meʻatokoni efiafí. Ne ʻai ʻe he Tangataʻeikí ke hangē pē ha vaʻingá koeʻuhí ke ʻoua naʻá ku taʻeoliʻia. Ne vave ʻeku fakatokangaʻi e ngaahi foʻi leá heʻeku sio kiate kinautolú, pea fakapaleʻi au ʻe he Tangataʻeikí ʻaki ʻene fakalotolahí mo e fakavikivikiʻí. Ne ma nofo he taimi lahi ʻo laukonga fakataha pea vave ʻeku fakalakalaká.

Ne loto leva ʻeku faiakó ke u hiki ki he kalasi uá. Ne fiefia e Tangataʻeikí ʻiate au. Naʻá ne tokanga maʻu pē ki heʻeku fakalakalaka he akó. Naʻá ne fakatau mai ʻi he taimi Kilisimasí ha ngaahi tohi naʻá ne ʻilo te u fiefia ai.

Hili ha ngaahi māhina siʻi mei heʻeku ʻosi mei he ako māʻolungá, ne mālōlō ʻeku tangataʻeikí he kanisaá. Ne ʻikai ke ne moʻui ke sio heʻeku ʻosi mei he ʻunivēsití pe ʻapiako fakafaitoʻó, ka naʻá ne moʻui fuoloa feʻunga pē ʻo ʻiloʻi kuó u ako ke poto he laukongá. Naʻá ne fuʻu fiefia ʻaupito ai.

Ne ʻikai ke u kau mo hoku fāmilí ki he Siasí. ʻI heʻeku ʻi he kei ʻapiako fakafaitoʻó ne ʻi ai ha ʻaho ʻe taha ne u ʻave ha tohi mei he laipelí ne ui ko e Ko ha Ngāue Lahi mo Fakaofo. Naʻe tohi ia ʻe ha ʻAposetolo ko ʻEletā Likuleni Lisiate. Ne fakamatala kotoa e tohí ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne u toutou lau e tohí. Ne u ako mo lotua ia. Ne teuteuʻi au ʻe he tohí ke u kau ki he Siasí hili ha ngaahi māhina mei ai.

Hili hoku papitaisó ne u ʻilo te u lava ʻo ʻalu ki he temipalé ʻo papitaiso fakafofonga maʻa ʻeku tangataʻeikí. Naʻá ne fai ha fuʻu liliu lahi ki heʻeku moʻuí. ʻE lava eni ke u fai ha meʻa makehe ʻo fakamālō kiate ia he meʻa naʻá ne fai maʻakú.

ʻOku ou kei saiʻia pē he laukongá. Ko e meʻaʻofa ko ia ne foaki mai heʻeku tangataʻeikí ʻokú ne tāpuekina ʻeku moʻuí he ʻaho kotoa ʻi heʻeku lau e folofolá mo e ngaahi lea ʻa e kau palōfitá.