Siya Mihatag Kanako og Kalinaw

Ang akong igsoon nga si Brady usa ka presidential management intern nga nagtrabaho sa naval intelligence sa US Pentagon sa dihang nahitabo ang pag-atake niadtong Septyembre 11, 2001. Nagtrabaho ko sa Idaho, USA, nianang higayona, ug sa dihang akong nakita ang balita nianang buntag sa nahitabo, gitawagan nako ang akong amo aron mananghid niya nga dili motrabaho sulod sa pipila ka adlaw.

Pipila ka mga sakop sa akong pamilya nagtapok sa Washington, D.C., sa usa ka hotel ballroom nga gipili sa mga opisyales sa gobyerno isip kwarto sa pagpahibalo [briefing room], diin ilang ma-update ang mga pamilya sa nagpadayong mga paningkamot sa pagsalbar. Kami nagpaabut kada adlaw kon si Brady usa ba sa mga biktima. Ang pagbati niana nga palibut mao ang tumang kasubo ug pagkawala sa paglaum. Apan ang among pamilya naghiusa ug nag-ampo nga bisan unsa pa ang mahitabo, dili kami mawad-an og hugot nga pagtuo.

Hapit usa ka semana human sa atake, niadtong Septyembre 17, kami nakadawat og pahibalo nga nagkompirma nga si Brady patay na.

Wala ko masayud kon nangutana ba ko, “Nganong ako?” Apan sigurado kong nakapangutana, “Nganong siya?” Sukad pa sa akong pagkabata, akong gihigugma, gidayeg, ug gustong mamahimo nga sama ni Brady. Naghunahuna usab ko, “Nganong karon?” Sulod sa pipila ka semana, si Brady nagplano nga mobiyahe ngadto sa Idaho aron makauban ang pamilya. Nakaeskedyul siya nga mobiyahe sa Huwebes, Septyembre 13, duha na lang ka adlaw sa dihang siya mamatay.

Sa unang gabii sa akong pagbalik og trabaho human sa akong pag-adto sa Idaho, giablihan nako ang akong professional e-mail account, nga wala pa nako maablihi sukad Septyembre 10. Sa akong inbox mao ang usa ka mensahe gikan ni Brady. Iya kining gipadala Martes sa buntag, sa wala pa lang gyud ang pag-atake. Dinhi siya naghisgut sa amo untang panag-abot ug sa tanang makalingaw nga mga panghitabo nga among giplano. Sa dihang siya mi-signed off, yano siyang misulat og, “Kalinaw.”

Dili ingon ani tapuson ni Brady ang iyang mga e-mail, apan ako kining gihunahuna isip mabinationg kalooy sa Ginoo nga iya kining gibuhat. Sa akong hunahuna wala gyud masayud si Brady unsa ang mahitabo, apan naganahan kaayo ko nga ang iyang katapusang mga pulong—iyang katapusang pulong—alang kanako mao ang kalinaw.

Bisan karon, sobra na sa usa ka dekada ang milabay, panagsa akong basahon og usab kana nga e-mail. Matag higayon nga ako kining buhaton, mapahinumduman ko nga atong makaplagan ang kalinaw nga gisaad sa Manluluwas pinaagi sa ebanghelyo: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27).

Siyempre mingawon gihapon ko ni Brady, apan tungod sa ebanghelyo, wala mawala ang akong hugot nga pagtuo ngadto niini nga pagsulay. Pinaagi sa tabang sa Manluluwas, nakapadayon ko uban sa paglaum ug kalinaw.