Ang Ting-ani Moabut Ra

Si Daniel miingon nga ang pag-uma sa yuta naghatag kaniya og mga oportunidad matag adlaw sa pagpamalandong sa mga panalangin ug mga hagit gikan sa panglantaw sa ebanghelyo. “Usa ka panalangin ang mag-ampo ngadto sa Ginoo ug magmabinantayon sa impluwensya sa Espiritu nga dili mabalda sa kasaba o musika o advertising,” siya miingon kabahin sa pag-uma.

“Sayon nga mahimong miyembro sa Simbahan kon magpuyo sa lugar sama niini nga gipalibutan sa mga minahal ug sa kinaiyahan,” midugang si Liliana. “Kini nakatabang kanako sa paghinumdom nga kita nagsalig sa Ginoo ug ang tanan nga anaa kanamo nagagikan Kaniya. Hapit tanan namong gibuhat dinhi nagpakita og pipila ka mga baruganan sa ebanghelyo. Si Oscar kanunay moabut sa balay nga may pamalandong gikan sa pag-uma o pagbuhi sa mga hayop.”

Kon si Oscar magdaro sa yuta, pananglit, mopili siya og butang nga timaan sama sa kahoy o bato sa layo nga makatabang kaniya sa pagdaro og tul-id. “Dili igsapayan kon may mga nag-ali sa iyang maagian,” miingon si Liliana. “Dili niya usbon ang iyang agi tungod kay gusto niyang tul-id ang pagdaro.”

Si Oscar midugang, “Kon motan-aw ko sa luyo aron tan-awon ang tudling, mawihi hinoon ko. Busa mag-focus ko sa akong timaan ug magpadayon.”

Sama sa chacra, siya miingon, ingon niini usab sa Simbahan. “Aron magpabilin nga tul-id ang dalan sa atong kinabuhi, kinahanglang molantaw kita sa Ginoo, mobasa sa mga kasulatan, ug mosunod sa mga sugo. Kon atong tugutan ang atong kaugalingon nga mabalda, mawala ang atong timaan ug mahimong balikog ang atong dalan.”

Ang mga Filipponi manimba sa usa ka branch sa Simbahan diha sa Gaiman. Niining lungsod nga may 6,000 ka mga lumulupyo, nga gipuy-an sa mga milalin nga mga Welsh niadtong mga 1870s, ang mga miyembro sa branch may igong oportunidad sa pagpakita sa ilang maayong ehemplo. “Kinahanglan nga kami mga maayo kutob sa among mahimo kada adlaw kay ang mga tawo nagtan-aw kanamo,” miingon si Liliana.

Ang pagpa-interes sa mga tawo diha sa ebanghelyo mahimong hinay nga proseso. Sama sa pisikal nga balaod sa ting-ani, ang espiritwal nga balaod sa ting-ani nanginahanglan og pailub. Apan tungod sa makanunayong pagsunod sa pamilya sa mga baruganan sa ebanghelyo, ang mga tawo nasayud ug mitahud sa ilang mga sumbanan isip Santos sa Ulahing mga Adlaw.

Sa sayo pa, sa dihang si Oscar nagtrabaho sa gobyerno, kanunay niyang balibaran ang mga tanyag sa pag-inom og kape, tsa, ug alkohol. “Human sa pipila ka tuig,” siya miingon, “ang mga kauban sa trabaho nahimong matugtanon ug mosuporta ug mangutana, ‘Unsa nga soda ang imong gusto?’ Usahay sila gani mainteresado sa Simbahan. Kana mao ang ani.”

Ang dapit asa mabungahon ang espiritwal nga pag-ani sa pagkat-on ug pagsunod sa mga baruganan sa ebanghelyo anaa mismo sa pamilya.

Ang ani miabut pinaagi sa mga panalangin sa pagserbisyo ni Oscar isip patriarch sa Trelew Argentina North Stake, sa pagserbisyo ni Liliana isip presidente sa Relief Society sa branch, ug sa dugang nga pagserbisyo sa uban pang mga calling nga gituman sa mga sakop sa pamilya sa mga katuigan.

Ang ani miabut gikan sa pagbalaan sa adlaw nga Igpapahulay ug pinaagi sa pagsunod sa balaod sa ikapulo. “Ang mga bintana sa langit naabli gayud—kon dili diha-diha dayon, nan pinaagi sa proseso sa pagpadayon sa pagkamasulundon,” miingon si Oscar.

Ang ani miabut pinaagi sa paggradwar sa tanang mga bata sa Filipponi gikan sa high school ug ang tanang upat ka anak nga lalaki nakaserbisyo og full-time misyon. Ang ilang edukasyon ug misyonaryo nga pagserbisyo nagdala kanila og mga oportunidad sa pagpangempleyo ug pagpangulo nga dili unta nila masinati.

Ang ani miabut gikan sa mga pangutana nga nadawat ni María Céleste gikan sa iyang mga kaedad kinsa gustong masayud sa pag-misyon sa iyang mga igsoong lalaki, sa iyang tinuohan, ug nganong maglikay siya og party nga magsugod gabii na kaayo sa Sabado.

Ug ang ani miabut gikan sa mga hunghong ug kalmang impluwensya sa Espiritu Santo, nga nakatabang sa pamilya nga malikayan ang trahedya usa ka gabii sa dihang sila nagtuo nga gikawatan ang ilang balay. Si Daniel mibangon sa dihang nakadungog siya og tingog ug nangandam sa pagpanalipod sa ilang balay, apan ang ilang gituohan nga kawatan ilaha diayng silingan nga nangayo og panabang sa dihang ang iyang sakyanan naguba.

“Nakaamgo ko nga gipakalma ko sa Espiritu aron among masulbad ang sitwasyon nga dili ra magpataka,” miingon si Daniel. “Pagkahuman nag-ampo ug nagpasalamat kami sa Langitnong Amahan nga walay dautang nahitabo.”

Kon matinud-anon natong ihalad ang atong kaugalingon sa Dios, ang mga sakop sa pamilyang Filipponi miingon, Siya nagpanalangin kanamo sa among mga panginahanglan ug kami nahimong mga instrumento sa Iyang mga kamot. Kini usa ka proseso nga nanginahanglan og pagkamakanunayon, pailub, ug pag-ampo. Kini usab nagkinahanglan og hugot nga pagtuo ug trabaho. Ug sumala sa panahon sa Ginoo, ang ting-ani moabut.