Napanalanginan pinaagi sa Ehemplo

Bag-o lang mibisita ko sa usa ka higala sa akong pag-high school. Nag-istorya kami mahitungod sa una namong panagkita, mahitungod sa kalipay tungod sa pagsunod sa ebanghelyo, ug mahitungod sa impluwensya sa atong mga higala ngari sa among kinabuhi. Sa pagkatinuod, tungod sa ehemplo sa akong mga higala ako namiyembro sa Simbahan.

Miabut ko sa Estados Unidos gikan sa American Samoa sa 10 pa ang akong edad tungod kay gusto sa akong papa nga ang iyang mga anak makakuha og tarung nga edukasyon kay sa iyaha. Nagpuyo ko sa Seattle, Washington, kauban sa akong iyaan ug uyoan. Sa edad nga 14, mibalhin ko sa California. Ang akong lola, diin ko nagpuyo, usa ka temple worker sa Templo sa Los Angeles California, apan ako dili miyembro sa Simbahan.

Sa tuig sa akong pagka-junior sa high school, naapil ko sa student government ug nakamatikod og mga tawo sa student council nga lahi kay sa uban. Matinahuron sila sa uban, limpyo og sinultihan ug sininaan, ug may dignidad ug kahayag nga naglibut kanila nga nakadani sa akong pagtagad. Nagkahigalaay kami, ug gidapit ako sa pagkuyog nila sa pag-adto sa Mutual. Ganahan ko sa kaalegre, maanindot nga mga kalihokan ug akong gibati ang Espiritu didto, mao nga kanunay kong mitambong. Pipila lamang ka semana human niadto gipaila ko sa akong higala ngadto sa mga misyonaryo ug sa Basahon ni Mormon. Nabunyagan ko sa wala madugay ug gisugdan ang tibuok kinabuhi nga pagtuon sa Basahon ni Mormon.

Ang akong mga higala mituman sa tambag nga naa sa 1 Timoteo 4:12: “Hinonoa alang sa mga magtotoo, pagkinabuhi ingon nga panig-ingnan sa sinultihan ug sa paggawi, sa gugma, sa pagtuo, sa kaputli.” Sama sa akong mga higala, mamahimo kitang impluwensya alang sa kamaayo pinaagi sa atong inadlaw nga buhat sa pagsunod sa ebanghelyo. Samtang magkinabuhi kita nga magsubay sa atong mga sumbanan ug gituohan, kadtong andam nga modawat sa ebanghelyo makamatikod og magtinguha nga masayud og dugang.

Imahe

Abinadi Appearing before King Noah

Sama pananglit, hinumdumi ang istorya bahin ni Alma nga naa sa Basahon ni Mormon. Nagpuyo og komportable nga kinabuhi si Alma isip pari sa palasyo ni Haring Noah. Dihang mipamatuod si Abinadi, mituo si Alma kaniya ug, bisan namiligro ang iyang kaugalingon, misulat sa mga pulong ni Abinadi ug mitudlo sa uban mahitungod sa Manluluwas (tan-awa sa Mosiah 17:2–4).

“Ug nahinabo nga human sa daghan nga mga adlaw dihay ubay-ubay nga gidaghanon nga nagpundok diha sa dapit sa Mormon, aron sa pagpamati sa mga pulong ni Alma. Oo, ang tanan nagpundok nga mituo diha sa iyang pulong, aron sa pagpamati kaniya. Ug siya mitudlo kanila, ug misangyaw ngadto kanila sa paghinulsol, ug sa katubsanan, ug sa hugot nga pagtuo sa Ginoo” (Mosiah 18:7; tan-awa usab sa mga bersikulo 1–6).

Sa ngadto-ngadto, dihang si Alma nga Batan-on naghatag og mga problema sa Simbahan, gitubag sa anghel ang pag-ampo ni Alma: “Ang Ginoo nakadungog sa mga pag-ampo sa iyang mga katawhan, ug usab sa mga pag-ampo sa iyang sulugoon, si Alma, kinsa imong amahan; kay siya nag-ampo uban ang hugot nga pagtuo mahitungod kanimo nga ikaw unta madala ngadto sa kasayuran sa kamatuoran” (Mosiah 27:14). Si Alma nga Batan-on ug ang iyang mga higala naghinulsol, nahimong talagsaon nga mga misyonaryo, ug mitandog sa liboan ka mga kinabuhi pinaagi sa ilang ehemplo sa pagkamaayo.

“Ug sa ingon sila mga himan diha sa mga kamot sa Dios sa pagdala sa daghan ngadto sa kasayuran sa kamatuoran, oo, ngadto sa kasayuran sa ilang Manunubos.

“Ug unsa ka bulahan sila! Kay sila nagmantala sa kalinaw; sila nagmantala sa maayo nga mga balita mahitungod sa mga maayo; ug sila mipadayag ngadto sa mga katawhan nga ang Ginoo mao ang naghari” (Mosiah 27:36–37).

Ang akong mga higala mipakita usab og maayong ehemplo dihang gipili nila nga mag-misyon. Bisan nag-atubang ko og mga oposisyon, mihukom ko nga magmisyon usab. Kadto nga desisyon mihulma sa tibuok nakong kinabuhi. Dihang miserbisyo ko sa Samoa Apia Mission, ang mga misyonaryo naghupot og mga responsibilidad sa pagpangulo sa priesthood, ug nakita nako nga ang Simbahan sa mga isla nagkinahanglan nga malig-on. Mihukom ko nga mobuhat sa akong bahin—mobalik ko sa Samoa human sa akong misyon ug pag-eskwela.

Human sa graduation sa kolehiyo, ako ug ang akong asawa namalhin sa Samoa, diin didto gipatubo ang among mga anak ug mitrabaho sa paglig-on sa Simbahan ug sa komunidad. Ang akong papa, kinsa dili miyembro sa Simbahan, aktibo sa lokal nga negosyo ug sa mga kalihokan sa komunidad. Ang iyang motto mao kini “Kon angay kini nga himoon, angay nga tarungon kini paghimo.” Samtang ang akong mga igsoon ug ako nakadiskubre sa ebanghelyo ug nagsunod niini kutob sa among mahimo, nakita niya ang maayong mga kausaban sa among kinabuhi. Niadtong 2000, si Presidente Gordon B. Hinckley (1910–2008) didto sa balay sa akong papa sa iyang pagpauli gikan sa pagpahinungod sa Templo sa Suva Fiji. Atol niana nga pagbisita, natandog sa Espiritu ang kasingkasing sa akong papa, ug akong kahigayunan ang pagbunyag kaniya dihang 82 anyos na siya. Nakaplagan niya ang hingpit nga kalipay sa ebanghelyo ug walay kukaulaw ug walay lipud-lipod nga mopakigbahin niini sa uban atol sa katapusang mga adlaw sa iyang kinabuhi.

Nahibalo ko sa importansya sa pagkahimong ehemplo sa mga magtutuo ug sa kalipay nga dala niini sa atong kinabuhi ug sa uban. Tungod sa maayong ehemplo ngari kanako sa akong mga higala ug sa gugma sa propeta, ang akong pamilya ug ako napalanginan og kalipay nga dala sa ebanghelyo.

Matag adlaw nag-impluwensya kita sa uban pinaagi sa atong mga buhat. Siguroon nato ang pagtabang sa uban ug pagpakigbahin sa kamatuoran niini nga kasulatan nga unta malipayon usab ang ilang kinabuhi tungod niini: “Hinumdumi, hinumdumi nga kini diha sa lig-on nga sukaranan sa atong Manunubos kinsa mao si Kristo, ang anak sa Dios, nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan” (Helaman 5:12).