Ijo Ij Pād ie

M̧okta jen Aō kar kobatok ilo Kabun̄ in, mour eo aō ekar obrak kōn būrom̧ōj. Ālkin jepel eo an jinō im jema ke eaar jimjuon Aō iiō, jema ekar ilo̧k n̄an kalpuuj. Jinō ekar kōkadōkdōk im luuji aolepān men ko raorōk n̄an e. Kar jilkinļo̧k eō n̄an jokwe ippān juon baam̧le.

Kōn wōt men kein, ekar m̧ōkaj aō rūttoļo̧k jen elōn̄ iaan ro jon̄an wōt n̄a. Ikar jab lukkuun en̄jake bwe Imaron̄ lo jikū, im emmakijkij aō kijon̄ pād ilo wāween jum̧ae. Ke Iaar lukkuun dik wōt, Iaar jino kōbatat im kōm̧m̧ane bar jet men ko me kiiō Ijeļā bwe rekakkure Naan in Mālōtlōt. Ikar jeļā bwe Iaar likjab ilo mour.

Juon men Iaar lo m̧ōņōņō ie ekar jipan̄ armej—men̄e eaar karreo ippāer ak ron̄jake bwebwenato in mour ko. Ilukkuun kōņaan bwe armej ren jeļā bwe remaron̄ pedped ioō. Juon iiō Iaar ilo̧k in kakkije im ioon juon leddik Iaar ļōmņak in jerbal kōn aō ron̄jake e. Eaar juon Rikūrijin im kar jino kōnnaan tok n̄an eō kōn kabun̄.

Ikar jab lukkuun tōmak ilo Anij. Ilo iien eo, ke Iaar ļōmņak bwe bōlen E ej waļo̧k, Iaar ņa ruwōn kōn aolepen jorrāān ko Iaar en̄jaki. Ak kōrā in eaar kōmeļeļeik aorōkin tōmak ilo Anij, Iaar lo aō make itoklimo. M̧okta jen aō ilok, eaar ba jet men bwe rekar lukkuun kaitoktok limo. “Mormon ro rej ļoor kien ko an Anij.”

Ijjan̄in kar ron̄ kōn Mormon, innām Iaar jepļaak, online im kappukōte. Iaar tōpar Mormon.org im wōrtare juon kape in Bok in Mormon. Mijenede ro rekar boktoke jet raan tokālik.

Iaar jab lukkuun jeļā Imaron̄ kar jino tōmak ilo Anij, bōtaab mijenede ro raar jipan̄ eō lo bwe Ijjab maron̄ tōmak wōt ilo E ak barāinwōt jeļā E. Ilo aō kar jino jar im katak Bok in Mormon, Iaar lo n̄a make ilo juon tūreep in pukōt m̧ōņōņō. Eaar bōjrak aō kōbatat. Iaar bōjrak aō ņaruwōn Anij im jino kam̧m̧oolol E kōn aolepen men ko rem̧m̧an ilo mour ie aō. Iaar itok n̄an jeļā bwe Nejin eaar en̄taan kōn jerawiwi ko aō im aolepān metak ko Iaar en̄jake. Ilo Oktoba 28, 2007, Iaar peptaij ilo Kabun̄ in.

Eļān̄n̄e in kar jab make en̄jake oktak eo jen jebwābwe n̄an m̧ōņōņō, Iban kar tōmak bwe ekkar. Rainin Ij iakwe kūr eo aō ilo Būraimere im kam̧m̧oolol n̄an wōt juon iien em̧m̧an n̄an jipan̄ ejaake juon būrojāāk in jipan̄ kweilo̧k eo eļap an jodikdik ilo Poland. N̄an maron̄ aolep raan jipan̄ ro jet kōn jerbal in jipan̄ an Kabun̄ in eaar kobatok ilo m̧ōņōņō eo Iaar loe ilo ko̧jpeļ eo an Jisōs Kraist. Aolep men iaar kōm̧m̧ani kiiō, Ij kōm̧m̧ane kōn iakwe erreo kōnke kōn Jisōs Kraist. Ij tōmak bwe mour eaiboojoj im bwe men̄e ewōr ad apan̄, eļān̄n̄e jej ļoor Rilo̧mo̧o̧r eo, jepan jebwābwe.

Kōrā eo Iaar ioone ekar jim̧we. Wōr tōmak ilo Anij ej aorōk. Jejjab maron̄ lo jikid ilo laļ in eļan̄n̄e jejjab jeļā E. N̄aij kam̧m̧oolol n̄an wōr juon jikin ijo Ijeļā bwe Iaikuj pād ie.