Philippines Missionary Training Center, eo Elder Russell M. Nelson jen Doulul eo an Jon̄oulruo Rijilōk ro eaar kōjeram̧m̧ane ilo Māe 20, 2012, emaron̄ jokwe elōn̄ļo̧k n̄an 144 mijenede ro jān Philippines, Cambodia, Hong Kong, India, Indonesia, Mongolia, Pakistan, Sri Lanka, Taiwan, Thailand. Mijenede rein rej kamminene ilo kajin ko an laļ ko aer.

Ruo em̧ ko rej jentōr eo ekāāl ej kitbuuj juon auditorium, buut in ukook ko, juon kamputōr lab, juon m̧ōn kwaļkwoļ, ruum̧ in ekkatak ko ippān built-in audiovisual equipment, im̧ōn kiki ko n̄an mijenede ro, kūlaajruum̧ ko, im opiij ko.

Ilo an kōm̧m̧an jar in aje eo an m̧wiin ekāāl, Elder Nelson eaar kwaļo̧k kam̧oolol kōn Pinmuur eo an Jisōs Kraist im n̄an mijenede ro retiljek im membōr ro uwaan Kabun̄ eo aolepān laļ in ro rej iakwe im jerbal n̄an Irooj. Eaar kajjitōk kōn juon kōjeram̧m̧an ioon Republic eo an Philippines n̄an “kōpeļļo̧k wōt kōjem ko im karuwaineneik” tok aolep rikarejar ro an Irooj im kar jar bwe armej ro ilo laļ in ren maron̄ jeram̧m̧an kōn “anemkwoj im maron̄ in eddōkļo̧k ilo jim̧we, jim̧or ilo ānbwin im jetōb.”

Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Karuo, eaar aje Manaus Brazil Temple—Kein 138 an Kabun̄ in aolepān laļ in im kein kajiljino ilo Brazil—ilo Juun 10, 2012.

Armej ro Rekwojarjar retiljek im pokake ro rej jokwe ilo Brazil, ijo eļapļo̧k jen juon milien membōr ro ie, maron̄ keidi n̄an Amazon River, Būreejtōn Uchtdorf eaar ba—remaron̄ lukkuun ipeb im kajoor.

Enan̄in 20 iiō ko, Membōr ro an Kabun̄ in jān Manaus, juon bukwōn ej makeļo̧k iaan jen reba ko reļļap im bukwin wōjke ko, raar ito itak kōn caravan n̄an aer pād ilo tampeļ eo ilo São Paulo, Brazil—juon tūreep eo 15 kōttan tal im itok jen ļoon im baj—im tokālik tampeļ eo ilo Caracas, Venezuela—juon tūreep ruwalitōk raan kōn baj.

Elder Claudio R. M. Costa jen Jiljilimjuonn̄oul eo eaar jerbal āinwōt būreejtōn an Brazil Manaus Mission ke eaar peļļo̧k ilo 1990.

“Eaar wōr aō lōke bwe Manaus Temple enaaj lukkuun boub, aolep kajjojo raan, kōnke armej rein reakwe tampeļ eo,” Elder Costa eaar ba. “Rej katakin ajri ro nejier n̄an iakwe tampeļ eo. Tampeļ eo elukkuun aiboojoj n̄an er.”

Ilo Bōļaide, Juun 1, 2012, 350 Armej ro Rekwojarjar ilo Raan-ko Āliktata ilo Samoa raar kuktok ippān doon ippān Risamoa ro jet n̄an aer m̧aaj ilo juon im̧ajaaj in armej kememe jekōdļo̧k in jen iaļ ko ilo Apia. Nemn̄oul iiō ko rem̧ootļo̧k, ilo 1962, laļ in eaar jekōdļo̧k jān New Zealand.

Doulul ko, jikuuļ ko, kabun̄ ko, im doulul ko peļaakin laļ in raar bōk koņaer. Rijikuuļ ro rej Armej ro Rekwojarjar ilo Raan-ko Āliktata raar kam̧ōņōņōik jon̄oul taujin rialooj ro ippān baan ko aer rej m̧aaj.

Ak jem̧ļo̧kin wiik eo eaar bōk jikin bar juon wāween n̄an kememe n̄an Risamoa ro rej Armej ro Rekwojarjar ilo Raan-ko Āliktata; eaar barāinwōt 50 iiō ko rem̧ootļo̧k me stake eo kein kajuon eaar ejaak ilo āne in, ilo Apia.

Ilo Jabōt eo, Juun 3, Elder James J. Hamula im Elder Kevin W. Pearson jen Jiljilimjuonn̄oul eo, jim̧or membōr ro an Pacific Eria Būreejtōnji, raar kōnono n̄an Armej ro Rekwojarjar ilo Raan-ko Āliktata im rilotok ro ilo juon kweilo̧k me eaar diwōjļo̧k n̄an im̧ōn jar ko an LDS peļaak āne in.

Ilo ļōmņak kōn ilju im jekļaj, Armej ro Rekwojarjar ilo Samoa rej pepe n̄an jerbal im kōkajoorļo̧k baam̧le ko, bukwōn ko, im laļ en, Elder Hamula eaar ba, eo ej jerbal āinwōt Eria Būreejtōn eo. “Jej eddōkļo̧k āinwōt juon Kabun̄ ijin, im jej eddōkļo̧k ilo baam̧le ko ad im mour ko ad make ilo ad pukōt n̄an ļoor katak ko im waanjon̄ok eo an Jisōs Kraist,” eaar ba.