Stake eo Kein Kajuon ilo India eaar Ejaak

Eaar wōr juon en̄jake ekajoor kōn m̧ōņōņō im kam̧oolol ilo an elōn̄ļo̧k jen 1,500 membōr ro im ro m̧ōttāer kar kuktok ippān doon ilo Novotel Convention Center eo ilo Hyderabad, India, n̄an ejaak eo an Hyderabad India Stake, stake eo kein kajuon ilo laļ en, ilo Māe 27, 2012. Elder Dallin H. Oaks jen Doulul eo an Jon̄oulruo Rijilōk ro eaar tōl im kar mije jen Elder Donald L. Hallstrom jen Būreejtōnji eo an Jiljilimjuonn̄oul eo im Elder Anthony D. Perkins jen Jiljiljuonn̄oul eo, eo ej jerbal āinwōt Būreejtōn eo an Asia Area. Kajjojo ritōl raar kobatok ippān kōrā eo pāleen ilo kweilo̧k eo.

John Gutty kar rejtake āinwōt stake būreejtōn eo ippān Suresh Natarajan āinwōt rikakpilōklōk eo kein kajuon im Rajaratnam Bushi āinwōt rikakpilōklōk eo kein karuo. Petriak eo kein kajuon an India ekar district būreejtōn eo, Prasad Rao Gudey.

Kōnono n̄an kileptata jarlepju in Armej ro Rekwojarjar ilo India, Randy D. Funk, būreejtōn eo an India Bangalore Mission, eaar ba, “En̄in ej juon m̧akūtkūt ilo rainin ilo bwebwenato, juon raan eo me jenaaj aolep iien kememej e. Jenaaj aolep iien kememej juon Rijilōk an Irooj eo eaar pād ijin.”

Elder Perkins eaar kwaļo̧k iakwe eo an Asia Eria Būreejtōnji eo n̄an membōr ro ilo India im kar ba, “Jej lo jinoin juon jerbal ekabwilōn̄lōn̄ ilo aelōn̄ in. Kabun̄ eo ej eddōkļo̧k im ejaake eo an stake ej dedeļo̧k ilo karōk an pedped ko rej indeeo an ko̧jpeļ eo im kar ejaake in jon̄ok ko an priesthood.”

Eaar kile bwe eaar kein karuo rikam̧ool n̄an kūr eo an stake būreejtōn eo ekāāl, Elder Hallstrom eaar kōmeļeļeik jerbal in m̧adenļo̧k eo n̄an kālet ritōl ro an juon stake ekāāl. Āinwōt juon membōr an Jiljilimjuonn̄oul eo, ej ijjitōn̄ im itaaktok ilo an ejjeļo̧k riab ak jeb, eaar ba. Eaar itok ilo wāween eo an Irooj, pedped wōt ioon Jetōb eo An n̄an bōk m̧adenļo̧k eo. “Ej ankilaan Irooj bwe Būreejtōn Gutty en erom stake būreejtōn eo,” Elder Hallstrom eaar ba.

Kristen Oaks, eo eaar mije ļeo pāleen, eaar kōnono kōn katakin ajri ro bwe ren tōmak “ke ro jinnām raar jeļā” (lale Alma 56:48).

Āinwōt rikōnono eo āliktata ilo kweilo̧k eo, Elder Oaks eaar kwaļo̧k an kam̧oolol n̄an laļ eo an India, juon laļ ewōr anemkwoj in kabun̄ ie me ej kōtļo̧k an membōr ro an Kabun̄ eo “kweilo̧k im kōnono kōn pedped ko an tōmak eo ad.”

Elder Oaks eaar kam̧ool kōn an wōr an juon kam̧ool kōn Jetōb eo me Irooj eaar kōpooje im kar kālet ritōl ro, ro raar kūr. Elder Oaks eaar barāinwōt kōnono kōn eddo ko rekāāl an juon stake.

Ilo Kalim̧m̧ur M̧okta rikanaan Aiseia eaar keidi Israel n̄an juon em nuknuk eo eaar kōjparok ajri in Israel ro, eaar ba. “Kabun̄ in rainin ej em nuknuk eo. Kōj aolep jeļā bwe juon em nuknuk ej aikuj in an̄inwōļā kōn dumej ko. Kiiō bwe Hyderabad ej juon stake an Zaion, naaj kōtmeneik kom̧ n̄an ami wōnm̧aantak im kōm̧m̧ane eļapļo̧k jipan̄ ilo wāween juon m̧ōttan jon̄oul im mijenede ro.”

Āinwōt juon tōprak in juon stake em̧ōj an ejaak, membōr ro ilo Hyderabad renaaj maron̄ in bōk kōjeram̧m̧an an petriak ko. Elder Oaks eaar kōmeļeļeik bwe ta eo ej ekkejel ilo juon kōjeram̧m̧an an petriak, kōnono kōn kōjeram̧m̧an ko āinwōt “jeje ko rekwojarjar n̄an juon make.”

“Juon kōjeram̧m̧an an petriak in ej kwaļo̧k bwij eo am̧ ilo bwij ko an Israel jen men in kōjeram̧m̧an ko reļļap rej būki,” Elder Oaks eaar ba. “Juon kōjeram̧m̧an an petriak ej barāinwōt kwaļo̧k kōjeram̧m̧an ko im kalim̧m̧ur ko jemaron̄ būki eļan̄n̄e jej tiljek.”

“Ilo an Kabun̄ eo ilo India eddōkļo̧k, iien eo enaaj itok bwe rikanaan eo enaaj im̧we n̄an kalōk juon tampeļ ilo India,” eaar wōnm̧aanļo̧k wōt. “Aolep stake ko raar kōm̧m̧an eddōkļo̧k ko bōlen enaaj wōr juon tampeļ. Ilo an armej ro kwaļo̧k erreo im kalim̧m̧ur, juon tampeļ ej itok tokālik.”

Ilo kajemļo̧ke Elder Oaks eaar leļo̧k ioon juon kōjeram̧m̧an: “Ilo stake in kein kajuon ilo laļ kileplep in India, Ij kōjeram̧m̧an kom̧ n̄an kememej katakin ko ilo awa in. Ij kōjeram̧m̧an kom̧ n̄an kememej bujen ko me kom̧ ar kōm̧m̧ani ilo ami kar peptaij. Ij kōjeram̧m̧an kom̧ kōn juon ememļo̧kjeņ im kijejeto n̄an kōjparok kien ko an Anij me komaron̄ lan̄lōn̄ kōn kōjeram̧m̧an ko An.”