Tokoni e Ngaahi Me‘angāue Fo‘ou ki he Kāingalotú ‘i Hono Teuteu e Ngaahi Hingoa Fakafāmilí

Naʻe fai mai ‘e he Kau Palesitenisī ‘Uluaki ha fakaafe ‘i ha tohi na‘e ‘omi ‘i he ‘aho 8 ‘o ‘Okatopa 2012 ‘o fakaafe‘i ‘a e kāingalotú—kae tautautefito ki he to‘u tupú mo e kakai lalahi taautahá—ke nau ma‘u ‘a e ngaahi tāpuaki kotoa ‘o e temipalé ‘i ha‘anau teuteu‘i ‘a ‘enau ngaahi hingoa fakafāmili pē anautolú ke ‘ave ki he temipalé.

ʻIkai ngata aí, ko kinautolu ko ia “‘oku nau tauhi ha ngaahi hingoa fakafāmili lahí, [‘oku poupou atu ke nau] faka‘atā ‘a e ngaahi hingoa ko iá ‘i he faingamālie vave tahá koe‘uhí ke lava ‘o fakahoko ‘a e ngaahi ouau ‘oku fie ma‘ú kiate kinautolu.”

Kuo hanga ‘e he Siasí ‘o teuteu‘i ha ngaahi ma‘u‘anga tokoni foʻou mo e ngaahi me‘a fo‘ou ‘e ala ma‘u atu ‘i ha lea fakafonua ‘e 10 ‘i he familysearch.org.ke tokoni ki he kāingalotú ke nau tali ‘a e ui ko ‘eni mei he Kau Palesitenisī ‘Uluakí.

Hangē ko ‘ení, ‘oku ‘omi ‘e he polokalama fakamuimuitaha ‘o e new.familysearch.org ‘a ia ‘oku ui ko e Family Tree, ha founga faingofua ange ki he‘etau hisitōlia fakafāmilí ‘i hono fakafaingofua‘i ‘a kinautolu ‘oku nau ngāue ki aí ke nau (1) fehokotaki pea kaungā ngāue ki he ngaahi laine fakafāmili ‘oku nau fehokotaki aí, (2) fakaleleiʻi pe toʻo ha fakamatala ‘oku hala, pea (3) faingofua ange hono fakahū ‘a e ngaahi hingoa ‘o e ngaahi kuí ke fakahoko ki ai ‘a e ngaahi ouau fakatemipalé. ‘Oku toe lava foki ‘e he kau ʻi he polokalamá ‘o ma‘u ha ngaahi vitiō fekau‘aki mo e “Vahe ‘o e Ngaahi Hingoa ki he Temipalé” [Assigning Names to the Temple] mo ha ngaahi ako kehe ‘i he familysearch.org/treetraining.