ʻEletā Craig C. Christensen

Na‘e kamata ngāue ‘a ‘Eletā Kuleki C. Kalisiteniseni ko ha mēmipa ‘o e Kau Palesitenisī ‘o e Kau Fitungofulú ‘i ‘Aokosi 1, 2012, hili hono ui ia ki he lakanga ko iá i ‘Epeleli 2012.

Na‘e fāʻeleʻi ia kia Seloni mo Kōlini Kalisiteniseni ‘i Sōleki Siti, ‘Iutā, USA, ‘i Mā‘asi 1956, na‘e tupu hake ‘a ‘Eletā Kalisiteniseni ‘i Kalefōnia tokelau ‘i ha “fāmili Siasi mālohi mo fakatupulekina.” Na‘á ne fakamamafaʻi na‘á ne tui ma‘u pē ‘oku moʻoni ‘a e ongoongoleleí, ka na‘e toe mālohi ange ‘ene fakamo‘oní ‘i he‘ene ngāue fakafaifekau ‘i Sileí.

Na‘á ne pehē, “Na‘á ku holi ‘i he‘eku hoko ko ha faifekaú, ke u ongo‘i ma‘u pē ‘a e Laumālie ‘ā‘oni‘oní, pea na‘e loloto ange ‘eku fakamo‘oni ki he ongoongoleleí pea mahinongofua ange kiate au.” Na‘e kamata ke ne saiʻai he Tohi ‘a Molomoná ‘i he‘ene ngāue fakafaifekaú, pea ‘oku hokohoko mai ia ‘i he‘ene ngaahi akonaki ‘i he ‘aho ní.

Ko e talu ‘eni mei he 2002 mo e hoko ‘a ‘Eletā Kalisiteniseni ko ha mēmipa ‘o e kōlomu ‘Uluaki mo e Ua ‘o e Kau Fitungofulú. Na‘á ne hoko ki muí ni mai ko e Talēkita Pule ‘o e Potungāue ‘o e Lakanga Fakataula‘eikí. ‘Oku kau ‘i hono ngaahi lakanga ‘i he kuo hilí ‘a ‘ene hoko ko e palesiteni ‘o e ‘Ēlia Mekisikou Sauté, palesiteni ‘o e Misiona Mekisikou Siti Hahaké, pīsope, alēlea‘anga mā‘olunga mo e palesiteni misiona fakasiteikí.

‘Oku ma‘u ‘e ‘Eletā Kalisiteniseni ha mata‘itohi BA ‘i he tauhitohí mei he ‘Univēsiti Pilikihami Iongí mo ha mata‘itohi MA ‘i he pule fakapisinisí mei he Univēsiti ‘o Uāsingatoní. Na‘á ne ma‘u mo fakalele ha ngaahi pisinisi fakatau fakamovetevete ‘o e ngaahi me‘alelé mo e fakatau kelekele mo e langa falé, pea na‘á ne hoko ko e faiako ‘a‘ahi ʻi ha ngaahi ‘univēsiti lahi.

Na‘e mali ‘a ‘Eletā Kalisiteniseni mo Tēpola Sōnasi ‘i he ‘aho 28 ‘o Mā‘asi 1978. ‘Okú na nofo ‘i Holatei ʻi ‘Iutā, pea ‘okú na ma‘u ha fānau ‘e toko fā mo e makapuna ‘e toko nima.