Pwohng en Kirismas Unseko

Sang ni ahi tikitik oh wie lalaudla, ehu ansou me I kin keieu pereniki iei Pwohng en Kirismas. Ngehi oh ahi peneinei kin wiahda pizza, kohla koul, oh pwurpene pwehn wia kaudok en Kirismas. Se kouliki koul en sarawi ni sohte nohn ngilamwahu oh kesengki soangsoangen mehn keseng kan me sapahrek. Pahpa kin ansou koaros kaimwsengkihla pwohngo padahk en Kirismas me kin kahrehda aht kakerehdi pilen masat ni peren. Mour sohte kin mwahusang Pwohng en Kirismas.

Ni ahi ekis laudlahro, ahi nohnohu kin tepida apwalih emen kisin seri mehn mpat, Kelly. Kelly kin kohdo nihmwato rahn koaros mwurin sukuhl pwe ah nohno, Patty, kin doadoahk. Kelly kin pwakihieseli duwehte kisin kidi—me katairong oh soakon. Ansou koaros I kin nsenamwahuda ansou me Patty kin kohdo ale nah serepeino oh nihmweio oh ahi peneinei kin uhd meleileidi.

Ehu Tihsempeo, I pwuriamweila ansou me nohno luke Patty oh Kelly en kohdo reht ni Pwohng en Kirismas. Ahi Pwohng en Kirismaso. Nohno sireido nda, “Sohte pahn wekidala mehkot.” Ahpw ngehi me ese. Ira pahn kangala kanat pizza koaros. Kelly pahn wie kepitki aht kin koulo. I esehte me e pahn wia Pwohng en Kirismas keieu suwed.

Ni soutiko eh leledohu, Patty oh Kelly kohdo reht, oh se koasoai oh kouruhr oh koul. Ahi nohnohu pwung. Mehlel me pwohngo uhdahn unsek. Ni likopen pwong ira kalahnganohng kiht oh mweselda. I kohla wendi meir ni mohngiong unsek. I diarada me kisakis mehlel keneinei kan en Kirismas sohte kin tikitikla ma kitail kin ehukihieng mehteikan. Re kin memla oh laudla ansou me kitail kin kisakiskihieng mehteikan.