Iren Mahsen en Presidensi Keieu, Tihsempe 2012
Katamanda Ngehn en Kirismas
Sounpar kei samwalahro ni ei wia elder pwulopwul men, ngehi oh ekei ileklahng imwen wini en Salt Lake City pwehn kihda kapakap en kapai kan ong seri soumwahu kan. Ni aht pidolong, se tehkada tuhkehn Kirismas pwoat me kapwatiki dengki lingaling oh kilang kisakis kidikidpene ni keneinei pahnangin rahn tuhkeo. Se uhd keidla nan wasahkan me pwutak or serepein kan—ekei me neh de peh tipw, ekei me ahniki soumwahu me sohte kak mwadangete mwahula me—kasamwohkin kiht arail mas sirei kan.
Emen kisin pwutak pwulopwul me soumwahu doar ekerie, “Ia edomw?”
I ndahieng ih edeie, oh e idek, “Ke kak kihiengie kapakap en kapai?”
Se kihda kapaio, oh ni aht sohpeilahn mweselsang limwahn ah pehto, e nda, “Kalahngan en kupwuramwail.”
Se alialu kohla, oh I uhd rongala eh nda, “Oh Brother Monson, merry Kirismas ong komwi.” Lapalahn sirei mih pohn meseo.
Pwutako ahniki ngehn en Kirismas. Ngehn en Kirismas wia mehkot me I ngoangki kitail koaros en ahniki nan mohngiongitail oh nan atail mour —kaidehnte nan mwehi wet ahpw erein sounpar ehu pwon.
Ansou me kitail kin ahniki ngehn en Kirismas, kitail kin taman Kauno me sapwellime ipwidi kitail kin kasarawi nan mwehi wet: “Pwe pwongpwong wet Sounkomouro ipwidiongkumwailehr nan kahnimw en Depit-iei Kaun Mesaia” (Luk 2:11).
Nan atail mwehi wet kihda kisakis kin wia pali laud en atail wia ketemenpen Kirismas. I medewe ma e sou pahn mwahu ma kitail pein peidengki, isakis dah me Kauno kupwurki I en kihda ong Ih de ong mehteikan ni ansou kesempwal wet en pahr?
I men kaweidiki me Samatail Nanleng pahn kupwurki emenemen kitail en patohwanohng Ih oh Sapwellime Iehros kisakis en peik. I pil pehm me E pahn kupwurki kitail en kisakiski pein atail oh sohte lehk de noarok de mwahuki akamai, duwen me Sapwellime Iehros keneinei ketin kaweidiki nan Pwuken Mormon:
“Pwe mehlel, mehlel I indaiong kumwail, mehmen me kin kolokol ineng en uhpene, kaidehn e kin kohsangie ahpw e kin kohsang rehn tepelo, iei ihme … kin kamwakidada mohngiong en aramas akan en kin uhpene nan pwungarail.
“Kilang, met kaidehn ei kosonned, en kin kamwakidada mohngiong en aramas akan en kin lingeringeriong emenemen; ahpw iet ei kosonned, me soahng pwuko en dehr kin wiawi” (3 Nephi 11:29–30).
Nan mwehi kaselel wet en unseklahn ansou kan, atail ansou mwahu en ahneki limpoak oh tohnmetei me inenen ngedehr, ahpw ansou mwahu pwukat pil kak en sohrala. Rahnwet mie mohngiong kan en kaperenda, lokaia kadek en nda, doadoahk en wiawi, oh ngehn kan en komourala.
Emen me ahniki pepehm mwahu me pid ngehn en Kirismas ntingih duwe met:
Ngehi me Ngehn en Kirismas—
I kin pidolong nan imwen me paisuwed, oh kahrehiong seri mas sopwoupwou kan ahr kin duwarpesengki arail peren.
I kin kahrehiong pehn ohl lehko en kohpeseng oh kahrehda lipw mwahu oh lingan eh mihla nan ngeni.
I kin kahrehiong me mah en pwulopwulla oh en kouruhr duwen me re kin wia mahs.
I kin kahrehiong limpoak en kin mih nan mohngiong en me pwulopwul, oh kalinganahki me memeir ouraman manaman kan.
I kin kahrehiong paten nehn aramas ngoang kan en alu nan ahl rotorot oh kihdi kiam audaudiki mwonge, me kin elehieng mohngiong kan en pwuriamweikihla kamwahu kan nan sampah.
I kin kahrehiong seri salongao ni eilepen eh mour doar oh kasohlap en tehkala kisin ansou kis me kin poakohngo me kin elehieng pilen mas en keredi—pilen mahs me kin widensang nsensuwed.
I kin pidolong nan perehn kalapwuhs rotorot kan, katamanohng ohl sapwungalahr kan dah me kakete pweida oh idihieng irail rahn mwahu kan me kohkohdo.
I kin kohdo ni meleilei nan ihmw meleilei wasa me mie weirek, oh kilin ewen aramas luwet me sohte kak lokaia en kin rerrerki ahr kaping kalahngan.
Ni wiepe kid kei, I kin kahrehieng sampah pwangadahr wet en kilengdahng ni sihlahng en Koht, oh ni kisin ansou kis manokehla soahng kan me sohte katepe oh sakanakan.
Ngehi me Ngehn en Kirismas.1
Emenemen kitail en kak diarada sapahl ngehn en Kirismas—me iei Ngehn en Krais.
© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen First Presidency Message, December 2012. Pohnpeian. 10372 885
Padapadahk sang Iren Mahsen Wet
Ni omw pahn ehukihieng peneineio padahk wet sang President Monson, medewe oh tehksapahl peidek me pid kisakis kan me Kauno pahn kupwurki kitail en patohwanohng Ih de mehteikan nan mwehi wet. Kangoange tohn peneineio en ntingihdi arail madamadau kan (de, ong seri pwulopwul kan, en mahlenihda kilel) me pid duwen “diarada sapahl ngehn en Kirismas— me iei Ngehn en Krais.”