Faaroo i te muhumuhu

I te hoê pô, ua faaru‘e te tahi tuahine fetii to’u i to’na fare e ua tapapa vau no te imi haere ia’na. Te faahoro ra vau i te pereoo ma te pure i te Varua ia tauturu mai. Ua papû roa vau e, e pahono mai te Atua e e arata‘i mai Oia ia’u, e no reira ua tamata vau i te faaroo i te muhumuhu o te Varua. Aita râ vau i faaroo i te hoê noa a‘e mea e ua hepohepo rii to’u aau ma te mana‘o roa e, aita te Varua e arata‘i mai nei.

Ua tae roa to’u hinaaro ia haere atea rii atu no te ma‘imi‘imi, are‘a râ ua tae mai te mana‘o i to’u aau ia faaea noa i te mau vahi tapiri i to’na fare. Faaoti a‘era vau e faaati faahou â i tera vahi. I te hoê maaraa puromu ua tape‘a vau, ua haru atura to’u mata i ni‘a i te hoê tamahine te haere ra. Teie to’u tuahine fetii !

Ua pou vau mai ni‘a mai i te pereoo e horo atura ia’na ra ma te feruri atoa e, aua‘e maoti te Varua i arata‘i noa mai ia’u ma te tuu noa mai i te mana‘o e, e faaea noa i tera a‘e vahi. No te ha‘iha‘i o te reo ta’u i faaroo, fatata roa vau i te fariu ê i te muhumuhu o te Varua. Ei reira ua maramarama vau e, i te rahiraa o te taime eita tatou e faaroo i te hoê reo, o te hoê râ mana‘o i to tatou aau.

Mauruuru roa ho‘i au no te arata‘iraa a te Varua. Papû maitai, tei ô nei noa Oia ! Mai tei parauhia i roto i te mau papa‘iraa mo‘a, « E riro te Varua Maitai ei apiti no outou » (PH&PF 121:46).

Ia vai ti‘amâ noa tatou i te arata‘iraa a te Varua e ia haapa‘o maitai ho‘i tatou, e nehenehe ta tatou e riro mai ei mauihaa i roto i te rima o te Atua no te haamaitai i te taata e rave rahi. Maoti te hoaraa noa o te Varua, e ite atu tatou i te e‘a ti‘a no tatou ia haere.