Parau poro‘i na te mau tuahine hahaere, Tenuare 2013

Ohipa misionare

A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org.

Hōho’a

Titiro a te Sotaiete Tauturu

Te Faaroo, Te Utuafare, Te Totauturu

Ua tonohia te Feia Mo‘a « no te rave i te ohipa [a te Fatu] i roto i Ta’na ra ô vine no te faaoraraa i te mau varua o te taata nei » (PH&PF 138:56), oia atoa nei ïa te ohipa misionare. Eita e titauhia te hoê piiraa misioni mana no te faaite i te evanelia. Te vai ra te taata na piha‘i iho ia tatou, to ratou oraraa e roaa ia haamaitaihia i te evanelia, e ia faaineine tatou ia tatou iho, e faaohipa te Fatu ia tatou. E nehenehe i te mau tuahine hahaere e tauahi roa mai i ta ratou hopoi‘a pae varua ma te « faatupu i te tahuti ore e te ora mure ore o te taata nei » (Mose 1:39).

I te faanahoraa te peropheta Iosepha Semita i te Sotaiete Tauturu i te matahiti 1842, ua parau oia e, e ere te mau vahine no te haapa‘o noa i te feia vĕvĕ no te faaora atoa râ i te mau varua.¹ O teie noa â te opuaraa no tatou.

« Te Fatu… e horo‘a Oia i te hoê iteraa papû no te parau mau i te feia Ta’na i ite e e faaite ratou i te reira ia vetahi ê », te parau ra te peresideni Dieter F. Uchtdorf, Tauturu Piti o roto i te Peresideniraa Matamua. « Te titau atoa nei te Fatu ia tatou te mau melo no Ta’na Ekalesia tei faaho‘ihia mai ia ‘haamămă i to [tatou mau vaha] i te mau taime atoa, i te faaiteraa’tu i [Ta’na] evanelia mai te haruru oaoa ra’ (PH&PF 28:16) … I te tahi mau taime e nehenehe i te hoê noa iteraa papû e faatupu i te mau ohipa o te taui i te oraraa o te tahi atu taata e amuri noa’tu ».²

No roto mai i te mau papa‘iraa mo‘a

Te Parau Haapiiraa e te Mau Parau Fafau 1:20–23; 18:15; 123:12

No roto mai i to tatou aamu

Teie te aamu o Olga Kovářová no te fenua i parauhia na mua a‘e, te fenua Tchécoslovaquie, e hi‘oraa no te ohipa misionare a te hoê melo e e api atoa ho‘i no te aamu a te Sotaiete Tauturu. I te mau matahiti ra 1970, e piahi titau i te parau tu‘ite tahu‘a tuatoru (doctorat) o Olga e te vai ra to’na hiaai rahi i te hoê oraraa papû i te pae varua. Te hi‘o noa ra oia ia Otakar Vojkůvka, e 75 matahiti e e feia mo‘a ho‘i. « E au ra ia’u e hitu ahuru ma pae to’na matahiti area râ i roto i to’na aau e ahuru ma va‘u ïa matahiti to’na e ua î oia i te oaoa », te na reira ra oia. « E mea maere mau te reira i [te fenua Tchécoslovaquie] i taua tau vahavaha ra ».

Ua ani Olga ia Otakar e to’na utuafare nahea to ratou vai-oaoa-noa-raa. Ua faaite atura ratou ia’na i te tahi mau melo o te Ekalesia e ua horo‘a atoa i te hoê Buka a Moromona ia’na. I reira to’na tai‘oraa ma te hiaai rahi, e ua bapetizo e ua haamauhia. Mai te reira â taime, ua ti‘a noa Olga ei mori no te ohipa maitai i roto i te hoê ao politita haavî e te haavîraa faaroo. Ua tavini oia ei peresideni no te Sotaiete Tauturu i roto i ta’na amaa e ua tauturu ia faaora i te varua o te taata e rave rahi ma te faafariu ia ratou i te Mesia ra.³

Eaha ta’u e nehenehe e rave ?

Te pee nei anei au i te muhumuhu o te Varua Maitai ia faaite ana‘e au i to’u iteraa papû i te mau tuahine ta’u e hahaere nei ?
Eaha ta’u e rave nei no te tauturu i te mau tuahine ta’u e haapa‘o ia haapii i te evanelia ?

© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/12. Parau faati‘a no te iritiraa: 6/12. Iritiraa no Visiting Teaching Message, January 2013. Tahitian. 10661 895