Kapitien Kauno

Doctrine and Covenants kin luke aramas koaros wasa koaros en rong kapitien Kauno Sises Krais (tehk D&C 1:2, 4, 11, 34; 25:16). E audaudki Sapwellime iren mahsen, mahsen en kanaiehng, oh padahk kan en kangoang me soukohp me pilipildahr alehdi sang ni kaudiahl. Ni kaudiahl pwukat kitail kak kilang mwomwen Koht eh kak ketin sapengki atail kapakap en pwoson iren mahsen kan en kaweid, meleilei, oh mahsen en kanaiehng.

Ni atail kapakap akan kitail kin rapahki en esehla dahme Koht kupwurki kitail en wia, dahme kitail anahne wia pwe en diarada meleilei oh peren nan mour wet oh nan mour mwurin met, oh dahme kitail sosohpai. Doctrine and Covenants audaudki pasapeng kan ong peidek kan me kohdahr sang rehn aramas oh soukohp akan nan kapakap karakarahk. E kak wia sounkaweid kesempwal en padahkiong kitail duwen alehdi pasapeng kan ong peidek kan me pid duwen kamwahupen kitail nan mourwet oh komour soutuk.

Mwekid me pahn kasalehda karakarahk oh pwoson Kauno Sises Krais me inenen kesempwal. Oliver Cowdery alehdier pasapeng ieu sang rehn Kauno me pid duwen ah ineng en sawaski kawehwehpen Pwuken Mormon. E katamanki Oliver me ma sohte pwoson e sohte kak wia mehkot; ahpw e konehng peki ni pwoson. Kauno mahsanihong Oliver en dehr mwamwahliki soahng kan me pid pali ngehn; oh en dehr peki soahng kan me e sohte konehng kilang (tehk D&C 8:10).

Pak tohto nan Doctrine and Covenants, Kauno kin anahne en mie pwoson oh karakarahk mwohn Eh pahn ketkihda Sapwellime sawas. Ehu kahrepen iei pwehki Sapwellime pasapeng kan mwein sohte pahn kohdo ni wiepe me kitail kasik. Re pil sohte pahn ansou koaros mengei en alahlda.

Poadoapoad en Mwomwohdiso wet oh irair en samatail oh inatail kan en mahs kasalehda mehlelpen met. Ahn pahpa-kahlap eh pahpa, Henry Eyring, kin poaden kapakap pwe en ese dahme e konehng wia ni eh rongada rongamwahu kopwurupwurdohu eh padahk nan 1855. Pasapengo kohdo nan ouraman ieu.

E ouramanda me e mwohndi ni tehpel ieu rehn Elder Erastus Snow en Pwihn en Wahnpoaron Ehk-riemeno oh pil rehn emen elder me adahniki William Brown. Elder Snow padahngki tepin padahngkan en rongamwahuo mwein erein awa ehu. Elder Snow eri nda, “Ni mwaren Sises Krais I ruweseiuk en pepdaisla oh ohl menet [Elder Brown] … pahn pepdaisihiukala.”¹ Ahi peneinei kapingki me Henry Eyring ahniki pwoson oh karakarahk en pepdaisla ni kuloak 7:30 manda ni menseng nan kisin lehn pihl ehu nan St. Louis, Missouri, USA, sang rehn Elder Brown.

Pasapengpen ah kapakapo sohte kohdo ni mwomwen ngihl laud sang Kauno. E kohdo nan kasansal oh ouraman nihpwong, duwehte Lehi (tehk 1 Nephi 8:2).

Kauno ketin padahkihiongkitail me pasapeng kan pil kak kohdo ni mwomwen pepehm. Nan Doctrine and Covenants, E padahkihiong Oliver Cowdery me E pahn ketin padahkihiong kitail nan atail madamadau oh nan mohngiongitail kan, sang rehn Ngehn Sarawi, me pahn kohdohng kitail oh me pahn ket nan mohngiongitail kan” (tehk D&C 8:2).

Mwuhr Kauno katamankihong Oliver me E ketin mahsanihong meleilei nan ahn Oliver madamadau (tehk D&C 6:23). Mehn kadehde dah me laudsang me ke kak alehdihsang Koht?” (tehk D&C 6:23).

Doctrine and Covenants, poadoapoad en Mwomwohdiso, oh poadoapoad me Henry Eyring kin kolokol de ntintingih nan ah misin mwurinte ah pepdais padahkiongiehier me kitail kak pehm pasapeng kan ni duwen mahsen en kanaiehng oh pil meleilei.

Ni Epreil 1857, Elder Parley P. Pratt en Pwihn en Wahnpoaron Ehk-riemeno iang kapokon lap nan wasa me met Oklahoma, USA. Henry Eyring ntingihdi me ahn Elder Pratt “madamadau audaudki pepehm en mehkot kansensuwed kohkohdo … , pwe e sohte kak kasawiada dahme pahn wiawi de mwomwen eh kak pitisang kahpwal.”² Henry ntingihdi rohng kansensuwedo mwurinte kamakamalahn Wahnpoarono. Elder Pratt douluhlla nan ah seiloako mendahte pepehm kan en keper, duwehtehte dahme Soukohp Joseph Smith wiahier ni eh kohla Carthage.

Iei ahi kadehde me Kauno kin ketin sapeng kapakap karakarahk en pwoson. Doctrine and Covenants oh irair me kitail pein lelohng pahn padahkiong kitail duwen atail kak kasawiada oh alehda pasapeng ko ni pwoson, mehnda ma re wia kaweid, kamehlelpen dahme mehlel, de mahsen en kanaiehng. I kapakapki me kitail pahn nantiheng ansou koaros en rongorong oh kasawiada kapitien Kauno.