Iren Mahsen en Padahk en Pas, Senweri 2013

Doadoahk en Misineri

Onopiki ni kapakap iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour. Pwehn alehdi iren kapehse kapatapat, tehk reliefsociety.lds.org.

Kilel

Kilel en Pwihn en Sawas en Lih

Pwoson, Peneinei, Sawas

Souleng en Imwin Rahn Akan malipilipehr en patohda ni ansou en Kauno pwehn doadoahk nan Sapwellime mwetin waino ong komourpen ngehn en aramas (tehk D&C 138:56), iangahki doadoahk en misineri. Kitail sohte anahne malipilip en misin pwe en ehukihieng mehteikan rongamwahuo. Mehteikan me me arail mour pahn kapaida pwehki rongamwahuo kapil kitail, oh ni atail pahn kaunop pein kitail, Kauno pahn doadoahngki kitail. Sounpadahk en pas kan kak alehda ni ngoang arail pwukoa kan me pid pali ngehn oh sawas kapwaiada mour poatoapoat oh soutuk en aramas (tehk Moses 1:39).

Ni Soukohp Joseph Smith eh koasoanehdi Pwihn en Sawas en Lih nan pahr 1842, e nda me lih akan en kaidehnte apwalih me semwehmwe ahpw ren pil sawas doarehlapali ngehn en aramas.¹ Met pil wiahte atail pwukoa rahn pwukat.

“Kauno … ketikiong irail me pahn kalohk ong aramas teikan kadehde en dahme mehlel,” President Dieter F. Uchtdorf, Sounsawas Keriau nan Presidensi Keieu mahsanih. “Me laudsang met, Kauno kasik kitail towe kan en Sapwellime Mwomwohdiso kopwurupwurdohu en kihpeseng ewetail kan ansou koaros, kalohk Sapwellime rongamwahuo ni ngilen popohl (tehk D&C 28:16). … Ekei pak lepin mahsen en kadehde kak kamwakidada irair kan me kin mie lipwe ong mour soutuk en aramas emen.”²

Sang Pwuhk Sarawi Kan

Tehk Doctrine and Covenants 1:20–23; 18:15; 123:12

Sang Atail Poadoapoad

Soai en Olga Kovářová sang sapw me mahs kahdaniki Czechoslovakia iei karasaras en doadoahk en misineri en towe sang atail poadoapoad en Pwihn en Sawas en Lih. Nan pahr 1970 samwa, Olga wia tohnsukuhl en toahkte oh e inangih mour me pid pali ngehn me loal. E tehkada Otakar Vojkůvka me sounpar 75, emen Souleng en Imwin Rahn Akan. “Ong ie e mwomwen sounpar isihsek-limau ni paliwar ahpw nan ah mohngiong kerenlahng sounpar eisek-waluh oh direkihla peren,” e nda. “Met inenen ehu soahng nan Czechoslovakia ni ansouo en soukoapwoaroapwoar.”

Olga idek rehn Otakar oh ah peneinei duwen arail diarada peren. Irail kapehsehki ih towe teikan en Mwomwohdiso oh kihong ih ehu Pwuken Mormon. E wadekala ni ngoang oh sohte pwand mwuri e pepdaisla oh kasarawi en wiahla towe mehlel. Sangete ansouo Olga wiahier emen me lipwalipw mwahu nan sampah ehu me kaun en wehi kin irehdi aramas oh kalokehkinirail arail pelien lamalam. E papah ni duwen President en Pwihn en Sawas en Lih nan ah kisin prans oh sawas doarehla pali ngehn en mehteikan ni eh wairaildohng Krais.³

Dahme I Kak Wia?

I kin idawehn kemwekid kapehm kan en Ngehn Sarawi ni ahi kin ehukihieng lih akan me I kin pwarek ahi kadehde?
Ia mwomwen ahi kin sewese lih akan me I kin tetehk en esehla rongamwahuo?

© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/12. Kamanaman ong kawehwe: 6/12. Kawehwehpen Visiting Teaching Message, January 2013. Pohnpeian. 10661 885