O Le Lesona i le Lima-Minute

O le faaiuga o lo’u tausaga mulimuli i le iunivesite, sa tatau ona ou auai atu ai i se sauniga o le faauuga lea e oofu ai le au faauu fou uma i ofu talaloa ma pulou faauu masani, maua o latou faailoga mai se tagata iloga o loo asiasi mai. Sa ou tulimatai atu i lenei taimi, o se faamanatuaga o le fa tausaga faigata o suesuega. O le taeao o le sauniga, sa ou maua ai se tusi mai le iunivesite ae peitai ou te lei tatalaina.

Sa amata le sauniga i le 1:30 i le aoauli, ma sa ou faatonuina le pueina o so’u ata ao lei amataina le sauniga. Ae paga, sa fai se laina mo le pueina o ata, ma sa ou vaai i le latalata atu o vae o le uati i le taimi e amata ai [le sauniga]. Peitai sa umi se taimi sa ou faatali ai ma o lea sa ou naunau ai lava e pue lo’u ata. Na iu ina uma ona pu’e ae toe 10 minute ao lei amataina le faauuga, sa ou tamoe i le nofoaga e fai ai.

Ae peitai, ina ua ou taunuu atu, ua tapunia faitotoa ma ua leoleoina e leoleo faitotoa. Sa ou talosaga ou te alu i totonu, ae sa mumusu leoleo faitotoa, ma fai mai ia te a’u sa tatau ona ou taunuu vave atu i le 15 minute ao lei amataina mo le faanonofoina i nofoa. O se taimi muamua lea ua ou faalogo ai i lea tulaga manaomia, ma sa ou tetee i ai. Ae e lei minoi ia leoleo. Sa ou galue mo le fa tausaga ina ia maua lenei faailoga, ae ua le mafai ona ou alu e aumai i le sauniga. Sa matou nonofo faatasi ma tagata maimoa i totonu o le faapaologa.

Ina ua ou taunuu atu i le fale ma tatala le tusi lea sa ou mauaina i lena taeao, sa ou faitau ai i ni faatonuga manino ina ia nofoia lou nofoa ia le itiiti ifo ma le 15 minute ao lei amataina le sauniga po o le a taofia lo’u ulufale atu. Sa ou lagona le pei o taupou valelea i le faataoto a le Faaola:

“Ua latou o [taupou valea] e faatau, ona sau ai lea o le faatoafaiava; o e ua saunia foi ua latou ulufale atu faatasi ma ia i le tausamaaga: ona pupuni ai lea o le faitotoa.

“Mulimuli ane, ona o mai ai lea o isi taupou, ua faapea mai, Le Alii e, le Alii e, ia e tatala atu le puipui mo i matou.

“A ua tali atu o ia, ua faapea atu, E moni, ou te fai atu ia te outou, ou te le iloa outou” (Mataio 25:10–12).

E ui o le taofia mai mai se sauniga taua e ono foliga mai o se taunuuga tuga ma o se tulaga e ono mafaufauina o se mea sese laitiiti, ae ua ou iloaina e faapena foi ia filifiliga ma taunuuga. Pe a ou pikiina i luga le tasi itu o se laau mai le palapala, ou te pikiina foi i luga ma le isi itu. E faapena foi i soo se filifiliga, sa ou filifili e le gata i galuega ae faapena foi ma taunuuga e faatatau i ai—ae peitai e le mailoa le taunuuga e tupu.

O Satani lea e manao tatou te mafaufau i filifiliga e aunoa ma se manatu i taunuuga. E masani lava ona ia faia e ala i le faaosoosoina o i tatou ina ia taulai atu i le fiaai faaletino, “o le manao o le tino” (2 Nifae 2:29), ma le faamalieina vave.

I le isi itu, e finagalo lo tatou Tama Faalelagi mo i tatou e taulai atu i le fiafia ma faamanuiaga e faavavau. Na te faamoemoe mai ina ia tatou mafaufau i taunuuga pe a tatou faia ni faaiuga ma ia avea ia taunuuga o se vaega o lo tatou uunaiga: “Ma ua latou saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti” (2 Nifae 2:27).

E ui ou te le o fiafia i lo’u misia o le mauaina aloaia o lo’u faailoga, ae ou te faafetai mo le mea ua aoaoina ai au e lenei aafiaga i le tulaga o le faavavau—ou te le fia faia lava se filifiliga o le a taofia mai ai au i le faafeiloai atu i le auai mai o le Faatoafaiava. Nai lo le taofia i fafo i se faamatalaga faapea “Ou te le iloa outou,” ae o le a ou taumafai e faia ni filifiliga o le a faataga ai au ou te faalogo atu o Ia fetalai mai, “Ulufale mai ia i le fiafia o lou Alii” (Mataio 25:21).