Enye wo Nyɛnko Rekyɛ

Da kor bi, ber a murusũa akɔ me seminary adzesua no, menyaa nkenyan fɛw pefee bi. Merekenkan afa adzekyee no n’adzesũadze do no, muhun me nyɛnko bi a menye no wɔ skuul n’enyim, na metsee nkã dzendzenndzen dɛ me nye no nkyɛ me dasegye no.

Nkenyan no daa edzi pefee dze, naaso musuroi. Ɔhaaw me dɛ me nyɛnko no bɔpoow me, nkanka dɛ nna ɔnnsɛ akataasia a n’enyi bɛgye dɛ ɔbɔdom Asɔr no.

 Modwenee kɔr ekyir, kɔr kasa bi a Akyerɛbaa Mary N. Cook a ɔkã Wiadze Mfɛndzanan Young Women Presidency ho no kãe a, ɔtoo hɛn taferbanyimbɔmu dɛ yɛnyɛ edwuma dzen na yɛnyɛ akatakyi.¹ Nna mepɛ dɛ meyɛ dɛm, ntsi mekyerɛɛw akataasia yi krataa, na megyee Asɔr no no nokwar ho dase, na dɔ a mowɔ no Mormon Nwoma no ho. Adzekyee no, medze Mormon Nwoma kor nye me krataa no, duaa ho hyɛɛ no kotoku mu.

 Ɔyɛɛ me ahobow, me nyɛnko no gyee asɛmpa no aso pa mu. Ɔhyɛ ase fi dɛm da no, daa ɔkã dza oesũa no wɔ no Mormon Nwoma adzesũa mu no, kyerɛ me. Adapɛn kakra ekyir no, menye no kyerɛɛ asɛmpasomafo no. Ɔyɛ dɛ amonmu ara no, onyaa pi si fii Sunsum Krɔnkrɔn no hɔ dɛ dza orusũa no yɛ nokwar. Menye asɛmpasomafo no sũi, ber a ɔkãa nkã a ɔtse kyerɛɛ hɛn no. Annkyɛr na wonumaa me nyɛnko no, na nsakyeree a ɔbaa n’abrabɔ mu no, yɛɛ n’awofo no ahobow.

Meenya ahomkã dɛ motumii dzii musuro do konyim, na moboae ma asɛmpa no baa n’abrabɔ mu.