President a Odzi Kan na N’apamfo Amandzɛɛbɔ, Kwakwar 2013
Asɛmfua kor ma Asɛmpasomafo Ɔtwentwemfo
Jesus Christ N’akãdofo no wɔ asɛdze dɛ daa wɔdze N’asɛmpa no kɔ wiadze nyina (hwɛ Mark 16:15–16). Naaso, ɔtɔsebi a, ɔyɛ dzen dɛ yebobue hɛn ano na yɛakã hɛn gyedzi ho nsɛm akyerɛ hɔn a wotwa hɛnho hyia no. Asɔrmba binom wɔ awosu akyɛdze dɛ wɔkã nyamesom ho nsɛm kyerɛ binom, naaso binom twentwem kakra anaa ɔyɛ hɔn dzen, anaa wɔfɛr, anaa wosuro mpo dɛ wɔbɛyɛ.
Iyi ho ntsi, mususu ndzɛmba anan a, obiara botum ayɛ dzi edzi Agyenkwa no no soma do, dɛ yɛbɛkã asɛmpa no “[a]kyerɛ abɔdze nyina” (N&A 58:64).
Yɛ Kan bi
Asɛm a mepɛ a wɔtaa kã dɛ St. Francis a ofi Asisi na ɔkãe no, kenkan dɛ, “Kã asɛmpa no mber nyina, na sɛ okehia a, fa nsɛmfua kã.”1 Dza ɔhyɛ asɛm yi mu nye ntseasee dɛ asɛmpakã a ɔyɛ ndam no dodowara no, wɔnnkã.
Sɛ yɛwɔ nokwar su na yɛdze hɛn gyinapɛn bɔ bra daa a, nkorɔfo hu. Sɛ yɛkyerɛ dɛw nye ahomkã mfar a, wohu no yie mpo.
Obiara pɛ dɛ onya ahomka. Sɛ hɛn a yɛyɛ Asɔrmba no kyerɛ asɛmpa ne kan ho mfar a, nkorɔfo botum ehu hɛn ahomka tsebea na wɔatse Nyankopɔn No dɔ ho nkã dɛ ɔrehyɛ hɛn abrabɔ mu mbordo. Wɔpɛ dɛ wohu ne siantsir. Wɔpɛ dɛ wɔtse hɛn esumasɛm ase.
Ɔno gya hɔn ma wobisa nsɛmbisa tse dɛ “Dɛn ntsi na enya ahomka dɛm yi? anaa “Dɛn ntsi na aber nyina ihu biribi pa wɔ gyinabew biara mu?” Nokwar, nsɛmbisa yinom ne nyiano no, gya hɛn tɔɔtsenn kɔ Jesus Christ N’asɛmpa nsananan mu ho nkɔmbɔtwetwe.
Pɛ nkɔmbɔ dzi
Erekasa fa nyamesɛm ho—kyerɛ nkanka hɛn anyɛnkofo na adɔfo—botum ayɛ dzen na dwumason. Onnyi dɛ ɔyɛ dɛm. Yɛrekã sunsum mu sũahu anaa yɛrekasa fa Asɔr dwumadzi anaa dza ɔreba ho wɔ nkɔmbɔdzi mu no, botum ayɛ mberɛw na enyigye, sɛ yɛdze akokodur nye nyansa kakra bɛkã ho a.
Mo hokãfo, Harriet, yɛ iyi ho fasusu mapã. Ber a yɛtse Germany no, nna otum nya kwan dze Asɔr ho nsɛm bɛhyɛ n’ayɛnkofo na hɔn a onyim no nkɔmbɔdzi mu. Mfatoho, sɛ obi bisa no fa dza ɔyɛɛ dapɛn ewiei a, ɔbɛkã dɛ, “Kwesida yi yenyaa sũahu tsitsir bi wɔ hɛn asɔr mu! Mfe 16-aberantsɛba bi gyinaa hɛn mboanofo 200 enyim, kasaa kyerɛɛ hɔn faa abrabɔ a ho tsew ho.” Anaa, “Metsee dɛ mfe 90-basia bi ween nkuntu bɔbor 500 dze maa hɛn Asɔr no n’adasamba adɔyɛ asoɛe dɛ wɔmfa nkɛma nkorɔfo a wohia wɔ wiadze nyina mu.”
Nna ɔtaa dɛ, nkorɔfo a wɔtse iyi no pɛɛ dɛ wohu bi so kã ho. Obisaa nsɛmbisa horow. Na ɔno maa kwan ma ɔkasaa faa asɛmpa no ho wɔ nkɔmbɔdzi, na awerɛhyɛmu kwan do a, ɔammfa nhyɛ.
Ndɛ mber yi abɛɛfo Internet nkitsahodzi aba yi a, ɔyɛ mberɛw ndɛ dɛ ibɛkã ndzɛmba yinom ho wɔ nkɔmbɔdzi mu akyɛn ber biara a abasen mu. Dza yehia ara nye akokodur a yɛdze bɛyɛ.
Ma Adom Nhyɛ Wo Mã
Ɔyɛ yaw dɛ, ɔnnkyɛr na hɛnho reyɛ haw. Ɔtaa dɛ yɛgye kyim, yebu enyimtsia, na yebua fɔ. Sɛ hɛn bo fuw, yɛkyerɛ ahantan su, anaa yɛhaw nkorɔfo a, adze kor a wɔnnkɔhwehwɛ koraa nye wobohu biribi bio afa hɛnho. Yennkotum ehu nyimpa dodow a woefi Asɔr no mu, anaa wɔammbɔdom da a, ɔnam dza obi dze haaw hɔn anaa wɔdze yaaw hɔn no.
Ndɛ wiadze yi dodowara mmbu adze. Osiandɛ Internet do nnyi w’enyim ntsi, ɔyɛ mberɛw dɛ ebɛkã asɛm fĩ anaa ndzɛmba a otwuw yie wɔ do. Ana onnyi dɛ ihɛn, Christ ɔbrɛfo no n’akãdofo susuampara no, yenya gyinapɛn a ɔkrɔn, na ɔkyerɛ adɔyɛ? Kyerɛwsɛm no kyerɛkyerɛ dɛ, “Hom mma hom kasaa nyɛ dza adom nkyen wɔ mu daa, ama hom eehu dza ɔsɛ dɛ hom dze bua obiara” (Colossaefo 4:6).
Mepɛ adwen no dɛ hɛn nsɛnkã bɛtsew dɛ ewia ketee wi, na adom hyɛ mu mã. Hom botum esusu mbrɛ hɛn ebusua ebusua, ward horow, aman aman, nye wiadze yi mpo bɛyɛ, sɛ yebotum edzi fapɛm kumaa yi do a.
Ma Gyedzi Nhyɛ Wo Mã
Ɔtɔsebi a, sɛ binom gye asɛmpa no a, yɛgye ho nkamfo no anaa mfom no dodow. Ohia tsitsir dɛ yɛbɛkaa dɛ Ewuradze ronnhwehwɛ hɛn dɛ yɛbɛsakyer binom.
Nsakyeree no nndua hɛn nsɛnkã do, mbom odua Sunsun Krɔnkrɔn no som a ofi sor ba. Ɔtɔsebi a, hɛn dasegye anaa sũahu mu kasasin kor ara na ɔma akoma hyɛase gow, anaa obue abobow a otum gya binom ma wodua Sunsum no ne nkenyan do, dze nya nokwar sũahu a ɔkrɔn.
President Brigham Young (1801–77) kãa dɛ ohun dɛ asɛmpa no yɛ nokwar ber a “ohun banyin bi a n’ano nntsewee, na onnyi dɔm mu kasa ho akyɛdze, na ma otumii kãe ara nye, ‘Sunsum Krɔnkrɔn no tum mu no, minyim dɛ Mormon Nwoma no yɛ nokwar, na Joseph Smith yɛ Ewuradze No nkɔnhyɛnyi.’” President Young kãa dɛ ber a ɔtsee dɛm ahobrɛadze dasedzi no, “Sunsum Krɔnkrɔn no a ofi dɛm onyaa no mu no, bɛtseew me ntseasee mu, na kan, enyimnyam, na bɛkyebo [bɛdaa] m’enyim kann.”2
Enuanom na nkyerɛmbaa, hom nya gyedzi dɛ Ewuradze botum ehuhor nsɛm a ekã no, na Ɔama wɔayɛ kɛse. Nyankopɔn mmbisa wo dɛ sakyer obi, mbo Ɔse hom mbue hom ano. Nsakyeree edwuma no nnyɛ hom dze,—mbom ɔyɛ nyia oritsie no, na Sunsum Krɔnkrɔn no.
Asɔrba Biara yɛ Asɛmpasomafo
M’anyɛnkofo adɔfo, ndɛ akwan horow mbordo wɔ hɔ a yɛdze bobue hɛn ano na yɛnye binom akyɛ Jesus Christ asɛmpa no ho engyigyesɛm no. Kwan wɔ hɔ ma obiara —asɛmpasomafo ɔtwentwemfo mpo dɛ ɔdze noho bɛhyɛ dwuma a ɔsõ yi mu. Hɛn nyina botum ehu kwan a yɛdze hɛn ankorankor akyɛdze nye enyigyedze bɔboa ma dwuma a ɔsõ yi, ma kan na nokwar ahyɛ asaase do mã. Ber a yɛyɛ dɛm no, yebenya enyigye no a ɔba nokwafo na akokodurfo hɔ ma wotum “gyina dɛ Nyankopɔn adasefo aber nyina” no (Mosiah 18:9).
© 2013 by Intellectual Reserve, Inc. Wɔakora ho tumdzi nyina. USA na wotsintsimii. English approval: 6/12. Translation approval: 6/12. Translation of ne Nkyerɛasee First Presidency Message, February 2013. Ne Nkyerɛasee wɔ Fante Kasa mu. 10662 502