Ehukihong Kompoakahmw

Ehu rahn ni ahi wie onohnopohng seminary, madamadau kehlail oh kaselel ehu kohdohng ie. Ni ahi wadwadek padahko mandao, I kilangada mesen emen kompoakapahi sang sukuhl oh alehdi pepehm kehlail ehu me I konehng ehukihong serepeino ahi kadehde.

Mendahte pepehm pwuko ahr inenen dehde, I masepwehkte. I perkihda kompoakapaio de kasohwe, pwehki ni mehlel kaidehn ih soangen serepein me kin mwomwen men iangala Mwomwohdiso.

 Ngehi eri tepida medewe duwen padahk ieu sang Sister Mary N. Cook en presidensi lap en Pwihn en Peinakapw Akan me e kangoangehkin kiht sen nantihong aht doadoahk oh en soupeikasal. ¹ I men duwe met, eri I ntinglahng serepeino oh kadehdehki duwen mehlelpen Mwomwohdiso wet oh duwen ahi kin uhdahn kesempwaliki Pwuken Mormon. Eri mandahn rahno I kawailong nan ah ehdo ehu Pwuken Mormon oh nei kisin likouo.

 I pwuriamweiki kompoakapahio eh pwungki esehla rongamwahuo. Tepida rahno, e kin ndaiongie dahme e esehla sang ah onopiki Pwuken Mormon. Wihk kei mwuri, I kapehsehiong ih misineri ko. E ahpw mwadangete alehdi kamehlel sang Ngehn Sarawi me dahme e esehla mehlel. Ngehi oh misineri ko sengiseng ni ah ndahiong kiht ah pepehm kan. Kompoakapahio eri pepdaisla sohte pwand mwurin mwo, oh ah nohno pahpa pwuriamweiki wekidekla kan me wiawihong ih.

 I inenen pereniki ahi kak powehdi ahi masepwehk oh sawas wahdohng rongamwahuo nan ah mour.